Д у қ вәкиллири 6-нөвәтлик яврупа түрклири мәтбуати йиғиниға қатнашти


2007-06-12
Share

2007-Йили 6-айниң 9-күни голландийиниң амстердам шәһиридә „6-нөвәтлик яврупа түрклири мәтбуат йиғини" өткүзүлди. Бу йиғинға дуняниң һәр қайси әллиридин кәлгән язғучилар, мухбирлар вә мутәхәссисләр қатнашқандин сирт, тәклипкә бинаән дуня уйғур қурултийи яшлар комитетиниң мудири вә „голландийә шәрқий түркистан вәхпи" тәшкилатиниң рәиси бәхтияр шәмшидин әпәнди башчилиқидики бир гуруппа уйғур вәкиллириму иштирак қилған.

Уйғурлар мәсилиси асаси тема қилинған

9-Июн күни, әтигән саәт 10:00 да башлинип, кәч саәт 12:00гә қәдәр давам қилған бу йиғинниң асасий мәқсиди; түркләрниң яврупа бирликиниң сиясий сәһнисидә өз ролини җари қилдуруш мәсилиси болсиму, шәрқий түркистан мәсилиси йәнила асаси темиларниң бири сүпитидә музакирә қилинған. Бу қетимқи йиғинда уйғурларға вәкалитән сөзгә чиққан бәхтияр әпәнди уйғур миллитиниң нөвәттә тартиватқан дәрд-әләмлири һәққидә тәпсили мәлумат берип, йиғин әһлиниң диққитини җәлип қилған.

Бу йиғинниң муһим әһмийәтлиридин бири шу болғанки, шу күни кәчтә елип берилған „қанал яврупа телевизийиси" ниң нәқ мәйдан муназирә программисида, уйғурлар мәсилиси йәнә муһим тема қилинған вә ай - юлтузлуқ көк байрақ җәвлан қилип турған көрүнүш пүтүн дуняға тарқитилған.

Голландийә түрклири уйғурларға алаһидә һесдашлиқ қилиду

Голландийидики түрк тәшкилатлириниң уйғурлар мәсилисигә болған һесдашлиқи алаһидә юқири болуп, 2007 - йили 5 - айда өткүзүлгән „уйғур рәһбәрлирини демократийә вә инсан һәқлири билимлири бойичә тәрбийиләш курси" җәрянида, улар көп қетим мәхсус сорун һазирлап, уйғур тәшкилатлар рәһбәрлирини қизғин күтүвалған вә д у қ ниң рәиси, уйғур миллий һәрикитиниң рәһбири рабийә қадир ханимға салам беришни җиддий бир мәҗбурийәтлири қатарида тонуған, һәмдә уйғур рәһбәрлирини тәрбийиләш курсиниң ечилиш вә йепилиш мурасимлири түрк тәшкилатлириниң паалийәт мәркәзлиридә өткүзүлгән иди.

Йиғинниң ахирида, шәрқий түркистан мәсилисигә мәтбуат җәһәттин ярдәм бериш һәққидә мәхсус қарар қобул қилинған. (Әкрәм)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт