Shilin'ghol wilayitidiki mongghul namayishchilirini tutqun qilish bashlandi

Ichki mongghul xelq partiyisining yaponiyidiki bash katipi kerid kuwasgalt ependi radi'omiz ziyaritini qobul qilip, bügün shilin'ghol wilayitining jenubidiki kök tughluqlar qoshunidiki charwichilar hem nahiye tewesidiki bir qisim amma bolup 300dek kishining namayish qilghanliqini bildürdi.

Kerid ependi özliri rayondin igiligen ehwalni bayan qilip mundaq dédi.

“Igilishimizche, bügün shilin'ghol wilayitining jenubiy qismidiki mongghul charwichiliri we nahiye baziridiki mongghullardin texminen 300dek kishi nahiyilik hökümet aldigha toplinip namayish qilghan. Namayish qilghuchi charwichilar nahiyilik mongghul ottura mektipidiki oqughuchilarni namayishqa dewet qilip, ottura mektep aldigha qeder barghan. Emma qoralliq saqchilar mektep derwazisini qamal qiliwalghini üchün, oqughuchilar namayishqa qatnishalmighan. Bizning rayondin igilishimizche, bügünki kök tughluqlar namayishida yerlik hökümet da'iriliri charwichilardin nechche onlighan kishini, jem'iyetni qalaymiqan qildi dégen bahanide tutup kétiptu. Biz hazir rayondiki weziyetning barghanche jiddiylishiwatqanliqini, hökümet da'irilirining keng kölemlik tutqun qilishni bashlash éhtimali barliqini hés qilmaqtimiz.”

RFA/méhriban

Shilin'ghol wilayitining jenubidiki kök tughluqlar xoshutidin bolghan, hazir shwétsiyide yerleshken mongghul ziyaliysi dolgi'on xatgin ependi, radi'omiz ziyaritini qobul qilip, özi rayondin igiligen emeliy ehwallarni bayan qildi.

Dolgi'on ependining bildürüshiche, yerlik da'iriler 27-maydin bashlap shilin'ghol wilayitini qamal qilghan. Rayondiki herqaysi mekteplerdiki oqughuchilarning sirtqa chiqishi qattiq cheklinip, oqughuchilar mektep ichide öginishke orunlashturulghan. Wilayet da'irisidiki intérnét alaqisi üzüwétilgen. Da'iriler bügünki kök tughluqlar namayishigha nisbeten qattiq qolluq bilen basturush siyasiti qollan'ghan. Rayondiki téléwizor xewerliride sheher ahalisini öz bixeterliki üchün öydin talagha chiqmasliqqa agahlandurghan.

Dolgi'on ependi yene özining öz uruq-tughqan dostliridin igiligen uchurgha asaslan'ghanda, hazirgha qeder kök tughluqlar xoshunidin 30 din artuq kishining “Jem'iyet amanliqini buzdi” dégen bahanide tutup kétilgenlikini, bularning arisida özi ilgiri yéqin ötken 3 neper dostining barliqini bildürdi.

Ichki mongghulning tunglyaw shehiridin ziyaritimizni qobul qilghan almas shirnud ependi, nöwette ichki mongghulning hemmila yéride weziyetning chingip ketkenlikini bildürdi.

Almas ependi sözide, hökümet da'irilirining mongghullar 30-may küni élip barmaqchi bolghan zor kölemlik namayishning aldini élish üchün, kökxot hem tunglyaw qatarliq birnechche sheherlerdiki uniwérsitét, aliy téxnikom hem ottura mekteplerde shenbe we yekshenbe künlirimu birdek ders ötülidighanliqini uqturghanliqini bildürdi.

Almas ependi yene özining ikki kündin buyan xitay dölet bixeterlikini qoghdash xadimliri teripidin agahlandurulghanliqini bildürüp, mundaq dédi.

“25-Maydin bashlap dölet bixeterlikini qoghdash xadimliri birnechche qétim méni izdep keldi. Ular méni agahlandurup, namayishqa a'it resimlerni torgha qoymasliqqa hem chet'el muxbirlirining ziyaritini qobul qilmasliqqa ündidi. Emma hazir yüz bériwatqan bu adaletsizlikler aldida sükütte turalmaymen.”

Kerid ependi ziyaritimiz axirida, shilin'ghol wilayiti hem bashqa jaylarda élip bériliwatqan namayishlarning mongghullarning öz heq-hoquqi hem insaniy ghururini qoghdashni telep qilip élip bériwatqan heqqaniy namayish ikenlikini yene bir qétim tekitlidi. U yene nöwette chet'ellerdiki mongghul teshkilatliri hem mongghullarning rayondiki namayishqa qatnashqan mongghul qérindashlirining nöwettiki ehwalidin ensirewatqanliqini bildürüp, xelq'ara kishilik hoquq teshkilatliri hem gherb démokratik döletlirini jenubiy mongghuliyining ehwaligha yéqindin diqqet qilishqa chaqirdi.