Moskwadiki 10 - nöwetlik xelq'araliq qur'an oqush musabiqisida Uyghurlar

Sürette, 6 - ayning 20 - 21 - künliri rusiyining paytexti moskwada ötküzülgen 10 - nöwetlik xelqaraliq quran oqush musabiqisigha, uyghurlargha wakaliten qatnashqan hazir finlandiyide yashawatqan obul qasim qari.

Musabiqige qatnashquchilar öz döletliride ötküzülgen qur'an oqush musabiqisida birinchilikke érishken kishiler iken. Bu musabiqida türkiyidin kelgen bunyamin selchuq'oghlu qari birinchilikke, aljiriyidin yasin isma'il qari ikkinchilikke we malayshiyadin abdullah séyit qari üchinchilikke érishken.

Uyghurlargha wakaliten bu musabiqige qatnashqan obul qasim ependi gerche aldinqi üchning qatarigha kirelmigen bolsimu, lékin Uyghurche kiyimliri bilen musulmanlarning diqqet - étibarini qozghighan.

Özining éytishiche moskwada 3 téléwiziye qanilining ziyaritini qobul qilip, xitaylarning Uyghur musulmanlargha élip bériwatqan zulum siyasitini anglatqan. U mikrofonimizgha qilghan sözide, moskwada milyonlarche musulman barliqini, xitayning din siyasiti bilen hazirqi ruslarning din siyasitining asman zémin perqi barliqini éytti.

Obul qasim qari bizge bergen melumatida yene, moskwa islam merkizining mes'uli rawil ghayrettin ependining özidin alahide so'al sorap, Uyghur musulmanlirining bügünki ehwali heqqide melumat alghanliqini, moskwada ötküzülgen bu pa'aliyetke qatnishish arqiliq Uyghur musulmanlirining mesililirini rusiyidiki musulmanlargha shundaqla dunyaning herqaysi jayliridin kelgen musulmanlargha anglitish pursitige ige bolghanliqi üchün özini bexitlik his qiliwatqanliqini éytti.

Yuqiridiki awaz ulinishidin, bu heqtiki melumatimizning tepsilatini anglaysiler.

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar