Gherb metbu'atliri xitayni "muhitqa yéterlik ehmiyet bermidi" dep tenqidlimekte


2007-05-14
Share

Yéqindin buyan gherb metbu'atlirida, xitaydiki muhit mesilisining yildin -yilgha éghirliship kétiwatqanliqi heqqide arqa -arqidin maqaliler élan qilinmaqta. Gherb metbu'atlirida élan qilin'ghan maqalilerde, xitay dölet rehberliri muhit mesilisige yéterlik köngül bölmeywatqanliqi tüpeylidin qattiq eyiblinip tenqidke uchrighan. Mezkur maqalilerde yene, " xitayning ékologiyilik muhitni weyran qilish arqiliq iqtisadni tereqqiy qildurushi yer sharigha zor tesir yetküzmekte" dep agahlandurushlar bérilgen.

Muhitni weyran qilish peqet xitayghila emes, belki pütün yer sharigha zor tesir yetküzmekte

Gherb metbu'atlirida bériliwatqan maqalilerde, xitay iqtisadining tereqqi qilishi bilen bir waqitta, xitaydiki ékologiyilik muhitning zor derijide buzghunchiliqqa uchrawatqanliqi hemde xitay dölet rehberlirining mezkur mesilige yéterlik köngül bölmeywatqanliqi körsitilmekte. Maqalilerde " xitayning ékologiyilik muhitni weyran qilish arqiliq iqtisadni tereqqiy qildurushi peqet xitayghila emes, belki pütün yer sharigha zor tesir yetküzmekte " dep tekitlen'gen.

Amérikida neshr qilinidighan " dölet " zhornilida, xitay dölet rehberlirining ékologiyilik muhitqa yéterlik köngül bölmeywatqanliqi alahide tekitlinip " béyjing hökümiti muhit mesilisining nahayiti éghir halette ikenlikini bilip turup, mezkur mesilige yenila dégendek köngül bölmeywatidu.

Emeliyette ular bundaq qilishning aqiwitining qandaq bolidighanliqini obdan bilidu. Chünki yéqinda élip bérilghan bu heqtiki tekshürüsh doklatida, mushu esirning axirigha barghanda, xitaydiki ashliq mehsulati% 37 töwenleydu؛ tibettiki muzluq choqqilar érip tügeydu؛ xu'angxé we changjyang deryasi éqinlirida deslepte tashqin, andin qurghaqchiliq apetliri yüz béridu؛ xu'adung déngiz buyi rayonining portugaliye zéminichilik qismi kelgüside hawarayi özgirishi tüpeyli kélip chiqqan tashqin déngiz süyi astida qalidu.

Démek bularning hemmisi xitay hökümitige ayan, shundaq turuqluqmu, xitay dölet rehberliri ékologiye mesilisige yéterlik köngül bölmeywatidu" dep körsitilgen.

Xitaydiki karbon ikki oksidining chiqirilish miqdari dunya buyiche ikkinchi orundin birinchi orun'gha ötush aldida

En'giliye b b s radi'o ‏- téléwiziye shirkitining bu heqte bergen melumatida, xitaydiki karbon ikki oksidining chiqirilish miqdari dunya buyiche ikkinchi orunda turidighanliqi shundaqla pat arida karbon ikki oksidi chiqirishta birinchi orunda turidighan amérikidinmu éship kétidighanliqi tekitlinish bilen bir waqitta, " xitaydiki karbon ikki oksidining bundaq zor miqdarda köpiyishi xitayning éléktir énirgiyisining asasen kömürni yéqilghu qilghanliqidin, buningdin bashqa yene künsayin köpiyiwatqan aptomobilmu kéreksiz gaz chiqirishta asasiy rol oynimaqta" dep körsitilgen.

B b s radi'o ‏- téléwiziye shirkiti élan qilghan mezkur melumatta, muhitni qoghdash mesiliside, xelq'ara jem'iyetning xitaygha intayin muhtaj ikenliki tekitlinip " eger xelq'ara jem'iyet ékologiyilik mesililer tüpeyli kélip chiqiwatqan hawa kélimatining özgirish mesiliside bir ish qilmaqchi bolidiken, undaqta xitaymu buninggha köngül bölüp, birlikte chare - tedbir qollinishqa teyyar bolushi kérek" dep bildürülgen.

San fransisko xewerler gézitide élan qilin'ghan melumatta éytilishiche, bankokta ötküzülgen yer shari hawa kélimati özgirishi mesilisi heqqidiki xelq'ara yighinda, xitay tashqi ishlar ministiri hindistan we amérika bilen birlikte, kéreksiz gazni azaytish pilanigha qoshulmaydighanliqini bildürgen؛chünki ularning neziride, bundaq qilish ularning iqtisadiy tereqqiyatigha cheklime qoyush dégenlik bolup hésablinidiken.

Xitaydiki ékologiyilik muhitning özgirishi chégridash döletlergimu zor tesir körsitidu

Béyjingdiki ey jishin tetqiqat orginining mes'uli wen yenxey ependi" xitay bir chong dölet bolush süpiti bilen, ékologiyilik muhitni qoghdash, bulghinish mesilisini bir terep qilish mesiliside aktip rol oynishi kérek idi. Lékin hazirqi ehwal del eksiche boluwatidu. Bir qisim chirikliship ketken emeldarlar öz menpe'etinila oylap, ammining ortaq menpe'eti bilen kari bolmaywatidu. Shuni bilish kérekki, xitaydiki ékologiyilik muhitning özgirishi etraptiki chégridash döletlergimu zor tesir körsitidu" dep bildürdi.

Wey yenxey ependi sözide yene, xitay hökümitining iqtisadni tereqqiy qildurimiz dep, muhitni qurban qiliwatqanliqi heqqide toxtilip " xitayning aldin iqtisad tereqqiy qilishi kérek dégen siyasiti tüpeylidin, ékologiyilik muhit zor buzghunchiliqqa uchridi. Bundaq siyasetni belgileshning özi bekmu exmiqane bir ish. Özi tereqqi qilimen dep, bashqa döletler bilen kari bolmasliq, xelqning yashash muhiti bilen kari bolmasliq, bu heqiqeten bekmu shexsiyetchilik qilghanliq. Hazir xelq istimal qiliwatqan yémeklik we dora qatarliq mehsulatlarning süpiti barghanséri nacharlashmaqta. Insaniyetning turmushta tayinidighan asasliq yémeklik menbesi zeherlik tesirlerge uchrimaqta. Shunga menche, xelqning mohtaj bolidighini hergizmu xitay hökümiti teshebbus qiliwatqan bu xil tereqqiyat emes" dep körsetti.

Maliye gézitide bérilgen ékologiyilik muhit heqqidiki melumatta, xitay dölet rehberliri qattiq eyiblen'gen bolup, " hazir dunyadiki 10 chong bulghan'ghan sheherning 8 i xitayda bolup, xitayning hawa kélimatining özgirishini keltürüp chiqirishta,halqiliq rol oynighan xitay dölet rehberliri bundaq shara'it astida, quruq shu'ar towlashni toxtitip, emeliy herikitini körsitishi kérek" dep yézilghan. (Méhriban)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet