Дуня банкисиниң хитайда муһитниң булғиниши вә төлиниватқан бәдәл дегән доклати һәққидә инкаслар


2007-07-05
Share

'Пул- муамилә вақит гезити'дә, дуня банкиси йеқинда 'хитайда муһитниң булғиниши вә төлиниватқан бәдәл' дегән бир доклатни тәйярлап чиққанлиқи, бу доклатта 'хитайда һава вә суниң булғиниши һәр йили 750 миң адәмниң биәҗәл өлүп кетишигә сәвәб болуватиду' дәп баян қилинғанлиқи хәвәр қилинған иди. Шуниңдин кейин, хәлқарада хитайда һава вә суниң булғинишиға қарита көңүл бөлүватқан кишиләр барғансери көпийиватиду вә җиддий муназирә давам қиливатиду.

Коммунист партийә бай болди, хәлқ қул болди

Хитайдики мәлум бир шәһәрдин йезип б б с ниң тор бетидә елан қилинған бир обзорда мундақ дәп баян қилиниду: коммунист һөкүмити өзини бейитиш үчүн, завутлардин аҗралған зәһәрлик газларни, худди гетлер җаза лагериға қамивалған йәһудиларни зәһәрләп өлтүрүш үчүн газ қоюп бәргәндәк, бизниң асминимиздики һаваға қоюп бериватиду. Завутлардин аҗралған башқа қалдуқ зәһәрлик маддиларни болса дәряларға, көлләргә қоюп бериватиду.

Завутлардин һаваға қоюп берилгән зәһәрлик газ билән адәмләрдә пәйда болуватқан һәрхил рак кесәлликлирини һазир көзимиз көрүватиду. Чаңҗяң дәрясидики, тәйху көлидики булғинишниму көзимиз көрүватиду. Коммунист һөкүмити пәйда қилған һавадики, судики булғинишлар хәлқни тәдриҗи һалда һаятидин биәҗәл айриватиду. Коммунист һөкүмити буни билмәйду әмәс, у адәм алдашқа уста.

Буниңдин бурун, сталиндин алған қәрзни төләш үчүн искилаттики ашлиқни вейтнамға апирип берип, җуңго хәлқини ачарчилиқта қалдурғанда, һөкүмәт бизгә 'вейтнамға ярдәм' бәрдуқ дәп гәп тоқумиғанмиди? дең шавпиң дәвридин кейин, коммунистлар дөләтниң омум мәһсулат қиммитиниң 90% ни өзлири игиливелип бай болди, өзлири үчүн һәшәмәтлик игиз биналарни салди. Коммунист партийә тәрәққи қилди, хәлқ чөкүп кәтти. 9 Йүз милйон деһқан қул болди. Һазир буни 'җуңгони тәрәққи қилдурдуқ' дәватмамду? сәнши, хенән, сичуәнләрдики йезиларға, көмүр канларға , завутларға берип көрүп бақсаңлар, коммунист партийә дәватқан 'тәрәққи қилған җуңго'ниң қап- қараңғу тәрәплирини көрисиләр.

Йүз милйон хиянәтчи әмәлдар вә мәккар содигәрләрниң һәммисини чөл-җәзириләргә қоғлаш керәк

Токйодин йезип елан қилинған бир обзорда баян қилинишичә, коммунист һөкүмити хәлқтин күндин -күнгә ашуруп еливатқан баҗ миқдари билән хәлқниң риал турмуш сәвийиси мас кәлмәйду. Коммунист һөкүмити хәлқтин алидиған баҗни иптидаи мәһсулат басқучидин тартип қатму-қат ашуруп еливатиду. Әмма чоң вә оттура һал ширкәтләр баҗни кам тапшуриду. Әмәлийәттә улар кам тапшурған баҗ коммунистларниң янчуқиға бивастә кирип кетиду.

Һазир коммунистларниң еғир зулуми астида турған хәлқ пәқәт өзлири үчүн әқәлли иҗтимаий капаләт болушинила арзу қилидиған дәриҗигә чүшүп қалди. Чүнки һазир коммунист һөкүмити тәшвиқ қиливатқан 'иҗтимаий соғурта', 'давалиниш суғуртиси' дегән гәпләр пүтүнләй алдамчилиқ. Коммунист әмәлдарлири сағлам турған хәлқниң бәдән әзалирини өзигә алмаштуралайду, әмма адәттики хәлқ ундақ қилалмайду.

Мәзкур обзорда тәшәббус қилинишичә, җуңгода бир милярд 400 милйон адәм бар, әмма хәлқ игилики омум мәһсулат қиммитиниң мутләқ көп қисми йүз милйон хиянәтчи әмәлдар билән мәккар содигәрниң қолида. Хәлқ буларниң зулумидин әркин яшаш үчүн, мушу кишиләрни бирақла чөл -җәзириләргә қоғливитиши керәк!

Ленин, сталинларға етиқад қилидиған сотсялизмчилар билән болған чоң елишиштин хали болғили болмайду

'Көзитиш журнили'да 7 ‏- айниң 5 ‏- күни елан қилинған бир обзорда баян қилинишичә, дең шавпиң заваллиққа йүзләнгән коммунист партийини қутқузуш үчүн 'капитализм яки сотсялизм болушидин қәти нәзәр, иқтисад тәрәққи қилдурулсила болди' дегәндин кейин, коммунист партийә әзалири бай болушқа башлиди.

1992 ‏- Йили дең шавпиң йәнә 'тәрәққи қилдуруш әң күчлүк тәдбир' дәп қайтидин тәкитлигәндин кейин, сотсиялизмниң қепидин чиқип, капитализмниң қепиға киривалған коммунист байлири, йезилардики терилғу йәрлирини игиләп һәшәмәтлик биналарни селишқа, завутларни қурушқа башлиди. Мана һазир хитайда байлар билән намратларниң чегриси ениқ айрилди. Һазирқи тәрәққият коммунист партийә әхлақсизлиққа, хиянәтчилик-парихорлуққа тайинип пәйда қилған тәрәққият.

Мәзкур обзорда баян қилинишичә, бу хоңкоңниң әң ахирқи баш тәптиши пең диңкаңниң тәһлили. Бу әрбабниң қаришичә, ленин, сталинларға етиқад қилидиған сотсялизмчилар, мәйли неминиң қепиға киривалмисун, дуняниң улар билән һаман бир қетим чоң елишидиғанлиқидин хали болғили болмайду.

Хәвәр архипи

Дуня банкиси тәйярлиған 'хитайда муһитниң булғиниши вә төлиниватқан бәдәл' дегән доклатта 'хитайда һава вә суниң булғиниши пәйда қилған кесәлликләр һәр йили 750 миң адәмниң биәҗәл өлүп кетишигә сәвәб болуватиду' дәп баян қилинғанлиқи һәққидики хәвәр дәсләптә 7 ‏- айниң 2 - күни, хәлқарадики мәшһур гезитләрниң бири болған 'пул -муамилә вақит гезити' дә елан қилинған иди.

7 ‏- Айниң 3 ‏- күнидики б б с ниң хәвиридә, дуня банкиси хитайниң тәтқиқат органлири билән бирликтә тәтқиқ қилип 'хитайда муһитниң булғиниши вә төлиниватқан бәдәл' дегән доклатни тәйярлап чиққанлиқини, хитай һөкүмити бу доклаттики бәзи санлиқ мәлуматларни елан қилишқа җиддий тосқунлуқ қилғанлиқини, бу доклаттики бәзи санлиқ мәлуматлар 'җәмийәттә давалғуш пәйда қилиши мумкин' дәп сәвәб көрсәткәнликини баян қилди.

Бирләшмә агентлиқиниң 7 ‏- айниң 5 ‏- күни бейҗиңдин баян қилишичә, хитай ташқи ишлар министирлиқиниң баянатчиси чин гаң хитай һөкүмити дуня банкисиниң доклатидики бәзи санлиқ мәлуматларни елан қилишқа тосқунлуқ қилғанлиқини етирап қилмай 'җуңго һөкүмити дуня банкиси тәләп қилған санлиқ мәлуматларни кечиктүргини йоқ. Дуня банкисиниң доклатидики бәзи мәсилиләр техичә музакирә қилиниватиду' дегән. (Вәли)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт