Dunya bankisining xitayda muhitning bulghinishi we töliniwatqan bedel dégen doklati heqqide inkaslar


2007-07-05
Share

'Pul- mu'amile waqit géziti'de, dunya bankisi yéqinda 'xitayda muhitning bulghinishi we töliniwatqan bedel' dégen bir doklatni teyyarlap chiqqanliqi, bu doklatta 'xitayda hawa we suning bulghinishi her yili 750 ming ademning bi'ejel ölüp kétishige seweb boluwatidu' dep bayan qilin'ghanliqi xewer qilin'ghan idi. Shuningdin kéyin, xelq'arada xitayda hawa we suning bulghinishigha qarita köngül bölüwatqan kishiler barghanséri köpiyiwatidu we jiddiy munazire dawam qiliwatidu.

Kommunist partiye bay boldi, xelq qul boldi

Xitaydiki melum bir sheherdin yézip b b s ning tor bétide élan qilin'ghan bir obzorda mundaq dep bayan qilinidu: kommunist hökümiti özini béyitish üchün, zawutlardin ajralghan zeherlik gazlarni, xuddi gétlér jaza lagérigha qamiwalghan yehudilarni zeherlep öltürüsh üchün gaz qoyup bergendek, bizning asminimizdiki hawagha qoyup bériwatidu. Zawutlardin ajralghan bashqa qalduq zeherlik maddilarni bolsa deryalargha, köllerge qoyup bériwatidu.

Zawutlardin hawagha qoyup bérilgen zeherlik gaz bilen ademlerde peyda boluwatqan herxil rak késelliklirini hazir közimiz körüwatidu. Changjyang deryasidiki, teyxu kölidiki bulghinishnimu közimiz körüwatidu. Kommunist hökümiti peyda qilghan hawadiki, sudiki bulghinishlar xelqni tedriji halda hayatidin bi'ejel ayriwatidu. Kommunist hökümiti buni bilmeydu emes, u adem aldashqa usta.

Buningdin burun, stalindin alghan qerzni tölesh üchün iskilattiki ashliqni wéytnamgha apirip bérip, junggo xelqini acharchiliqta qaldurghanda, hökümet bizge 'wéytnamgha yardem' berduq dep gep toqumighanmidi? déng shawping dewridin kéyin, kommunistlar döletning omum mehsulat qimmitining 90% ni özliri igiliwélip bay boldi, özliri üchün heshemetlik igiz binalarni saldi. Kommunist partiye tereqqi qildi, xelq chöküp ketti. 9 Yüz milyon déhqan qul boldi. Hazir buni 'junggoni tereqqi qildurduq' dewatmamdu? senshi, xénen, sichu'enlerdiki yézilargha, kömür kanlargha , zawutlargha bérip körüp baqsanglar, kommunist partiye dewatqan 'tereqqi qilghan junggo'ning qap- qarangghu tereplirini körisiler.

Yüz milyon xiyanetchi emeldar we mekkar sodigerlerning hemmisini chöl-jezirilerge qoghlash kérek

Tokyodin yézip élan qilin'ghan bir obzorda bayan qilinishiche, kommunist hökümiti xelqtin kündin -kün'ge ashurup éliwatqan baj miqdari bilen xelqning ri'al turmush sewiyisi mas kelmeydu. Kommunist hökümiti xelqtin alidighan bajni iptida'i mehsulat basquchidin tartip qatmu-qat ashurup éliwatidu. Emma chong we ottura hal shirketler bajni kam tapshuridu. Emeliyette ular kam tapshurghan baj kommunistlarning yanchuqigha biwaste kirip kétidu.

Hazir kommunistlarning éghir zulumi astida turghan xelq peqet özliri üchün eqelli ijtima'iy kapalet bolushinila arzu qilidighan derijige chüshüp qaldi. Chünki hazir kommunist hökümiti teshwiq qiliwatqan 'ijtima'iy soghurta', 'dawalinish sughurtisi' dégen gepler pütünley aldamchiliq. Kommunist emeldarliri saghlam turghan xelqning beden ezalirini özige almashturalaydu, emma adettiki xelq undaq qilalmaydu.

Mezkur obzorda teshebbus qilinishiche, junggoda bir milyard 400 milyon adem bar, emma xelq igiliki omum mehsulat qimmitining mutleq köp qismi yüz milyon xiyanetchi emeldar bilen mekkar sodigerning qolida. Xelq bularning zulumidin erkin yashash üchün, mushu kishilerni biraqla chöl -jezirilerge qoghliwitishi kérek!

Lénin, stalinlargha étiqad qilidighan sotsyalizmchilar bilen bolghan chong élishishtin xali bolghili bolmaydu

'Közitish zhurnili'da 7 ‏- ayning 5 ‏- küni élan qilin'ghan bir obzorda bayan qilinishiche, déng shawping zawalliqqa yüzlen'gen kommunist partiyini qutquzush üchün 'kapitalizm yaki sotsyalizm bolushidin qet'i nezer, iqtisad tereqqi qildurulsila boldi' dégendin kéyin, kommunist partiye ezaliri bay bolushqa bashlidi.

1992 ‏- Yili déng shawping yene 'tereqqi qildurush eng küchlük tedbir' dep qaytidin tekitligendin kéyin, sotsiyalizmning qépidin chiqip, kapitalizmning qépigha kiriwalghan kommunist bayliri, yézilardiki térilghu yerlirini igilep heshemetlik binalarni sélishqa, zawutlarni qurushqa bashlidi. Mana hazir xitayda baylar bilen namratlarning chégrisi éniq ayrildi. Hazirqi tereqqiyat kommunist partiye exlaqsizliqqa, xiyanetchilik-parixorluqqa tayinip peyda qilghan tereqqiyat.

Mezkur obzorda bayan qilinishiche, bu xongkongning eng axirqi bash teptishi péng dingkangning tehlili. Bu erbabning qarishiche, lénin, stalinlargha étiqad qilidighan sotsyalizmchilar, meyli némining qépigha kiriwalmisun, dunyaning ular bilen haman bir qétim chong élishidighanliqidin xali bolghili bolmaydu.

Xewer arxipi

Dunya bankisi teyyarlighan 'xitayda muhitning bulghinishi we töliniwatqan bedel' dégen doklatta 'xitayda hawa we suning bulghinishi peyda qilghan késellikler her yili 750 ming ademning bi'ejel ölüp kétishige seweb boluwatidu' dep bayan qilin'ghanliqi heqqidiki xewer deslepte 7 ‏- ayning 2 - küni, xelq'aradiki meshhur gézitlerning biri bolghan 'pul -mu'amile waqit géziti' de élan qilin'ghan idi.

7 ‏- Ayning 3 ‏- künidiki b b s ning xewiride, dunya bankisi xitayning tetqiqat organliri bilen birlikte tetqiq qilip 'xitayda muhitning bulghinishi we töliniwatqan bedel' dégen doklatni teyyarlap chiqqanliqini, xitay hökümiti bu doklattiki bezi sanliq melumatlarni élan qilishqa jiddiy tosqunluq qilghanliqini, bu doklattiki bezi sanliq melumatlar 'jem'iyette dawalghush peyda qilishi mumkin' dep seweb körsetkenlikini bayan qildi.

Birleshme agéntliqining 7 ‏- ayning 5 ‏- küni béyjingdin bayan qilishiche, xitay tashqi ishlar ministirliqining bayanatchisi chin gang xitay hökümiti dunya bankisining doklatidiki bezi sanliq melumatlarni élan qilishqa tosqunluq qilghanliqini étirap qilmay 'junggo hökümiti dunya bankisi telep qilghan sanliq melumatlarni kéchiktürgini yoq. Dunya bankisining doklatidiki bezi mesililer téxiche muzakire qiliniwatidu' dégen. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet