Sherqiy türkistan medeniyet we hemkarliq jem'iyiti büyük anatoliye mukapatigha érishti

• Ixtiyari muxbirimiz erkin tarimning bu heqtiki melumati
• Download story audio

Xeyrullah efendigil ependi (solda) mukapatni tapshurup aldi.

Bir qanche yillardin béri enqerede aktip pa'aliyet körsitip kéliwatqan sherqiy türkistan medeniyet we hemkarliq jem'iyiti enqere shöbisi büyük anatoliye mukapatigha layiq körüldi. Türkiye büyük anatoliye birliki jem'iyti teripidin bérilgen mukapatni xeyrullah efendigil ependi murasim bilen tapshurup aldi. 2 - Ayning 3 - küni ötküzülgen murasimgha türkiyidiki herqaysi ammiwi teshkilat mes'ulliri we wekilliri qatnashti. Biz bu mukapatni tesis qilghan büyük anatoliye birliki jem'iyti mes'uli yüsüp ependi bilen söhbet élip barduq.

- Hörmetlik yüsüp ependi, aldi bilen bu jem'iyitinglarning pa'aliyiti heqqide melumat bérip ötsingiz qandaq ?

- Bizning jem'iyitimiz ikki yildin béri pa'aliyet körsitip kéliwatidu. Ismi büyük anatoliye birliki jem'iyiti. Meqsitimiz pütün türk dunyasini bir birige tonutush, medeniyet almashturush we öz'ara chüshenche hasil qilish. Mana bu meqsetlik, biz -10ayning -20künidin -29künigiche türkiyidiki 81 wilayet we nahiye shundaqla herqaysi türkiy jumhuriyetler we milletlerning enqerede turushluq jem'iyetliri bilen birliship qedemmu qedem anatoliye féstiwalini ötküzduq. U féstiwalda her yerdin kelgen ömeklerge ayrim ayrim yer ajritip bérip shu yerde özliri kelgen yerning örp -adetlirini, tebi'et güzellikini, medeniyitini eng yaxshi shekilde tonutushini telep qilduq. Wekillermu buninggha bina'en shundaq qilishqa tirishti.

- Yüsüp ependi, bu féstiwalinglarda sherqiy türkistan medeniyet we hemkarliq teshkilatini mukapatqa layiq körüpsiler. Bu heqte radi'o anglighuchilirimizgha sözlep bergen bolsingiz ?

- Shundaq. Ular bu qedemmu qedem anatoliye féstiwaligha qatnashti we sherqiy türkistanni nahayiti ünümlük bir shekilde tonutti. Yaxshi wekillik qildi. Shunga biz ulargha rehmet éytish yüzidin bu mukapatni berduq hem shundaqla ularni pexir eza qilduq.

- Hörmetlik yüsüp ependi, sizche bundaq féstiwallarning qandaq ehmiyiti bar?

- Menche buning ehmiyiti aldi bilen birlik we barawerlik rohini yaritish. Bu xil pa'aliyetler birlik barawerlikning eng muhim ipadiliridin biri. Hemmimiz bir arigha yighilish arqiliq nahayiti yaxshi bir tesir yaratqan bolduq. Bir birimizni yéqindin tonighan, mesililirimizni chüshen'gen bolduq. Mesilen, sherqiy türkistanda insan heqliri depsendiliri bar, bésim bar. Féstiwalimizda bu mesilini nahayiti yaxshi anglitish pursiti yaritildi. U yerdiki bésm we insan heqliri depsendiliri körsitilgen resimler, xewerler körgezme qilindi, hemme kishi buningdin xewerdar boldi. Buning bilen sherqiy türkistanliq qérindashlirimiz özlirining dewasini hem yaxshi tonutqan hem teleplirini otturigha qoyghan boldi. (Erkin tarim)