Uyghur türkolog gülzade tengritaghli altun médalgha érishti
2007.04.10

Büyük anatoliye birlikining türkiyidiki herqaysi sheher - wilayet we türkiy milletlerning jem'iyetliri bilen ortaqliship békitishi netijiside 40 türde altun médal tarqitildi. Altun médalgha érishkenlerning ichide Uyghur tilshunas doktor gülzade tengritaghli xanimmu bar bolup, gülzade xanimgha Uyghur medeniyitini türkiyide we yawropada tonutush yolida qilghan xizmetliri üchün bu mukapat bérildi.
2 - Nöwetlik xelq'ara 40 altun mukapatlirining mukapatlash murasimi 4-ayning 5-küni enqerede ötküzüldi. Kojatepe medeniyet sariyida ötküzülgen bu murasimgha türkiye parlamént bashliqi wekili sadiq yaqut, parlamént ezasi néjati chétinkaya, wejdi gönül, enqere sheher bashliqi mélih gökchek qatarliqlar qatnashti. Mukapatlash murasimgha yene her sahe, her kesiptin bolup minglarche kishi qatnashti.
Murasim türkiye jumhuriyitining dölet marshini oqush we bir minutluq sükütte turush bilen bashlidi. Arqidin büyük anadolu birlikining bashliqi yusuf chélik söz qildi. Yusuf chélikning sözidin kéyin mukapatqa érishküchiler bir- birlep sehnige chiqip mukapatlirini tapshuruwaldi. Büyük anatoliye birliki altun médaligha érishkenlerning ichide türkiye bash ministiri rejep tayip erdoghan, milli mudapi'e ministiri wejdi gönül, enqere sheher bashliqi mélih gökcheklermu bar bolup, rejep tayip erdoghanning mukapatini uninggha wakaliten parlamént ezasi nejati chétinkaya aldi. Murasim qizghin keypiyat ichide ötti.
Altun médal bérish murasimi axirlashqandin kéyin biz mikrofonimizni büyük anatoliye birliki bashliqi yusuf chélik ependige uzattuq. U birlikining türkiyidiki 81 wilayet, türkiy jumhuriyetler we türkiy milletlerning ammiwiy teshkilatliridin bolup 1000 din artuq ammiwiy teshkilattin terkip tapqan bir birlik ikenlikini éytip mundaq dédi:
"Anatoliye birliki 81 wilayet, türkiy jumhuriyetler we türkiy milletlerning ammiwiy teshkilatliridin bolup, 1000 din artuq ammiwiy teshkilattin terkip tapqan bir birliktur. Biz bu mingdin artuq ammiwiy teshkilatning namzat körsitishi we muzakire élip bérishi netijiside 2006 -yilidiki muwapiqyetlik kishilerni tallap chiqip ulargha altun médal berduq we bu 2-nöwetlik xelq'araliq altun médal mukapatlash murasimini ötküzduq. Bu ammiwiy teshkilatlarning ray bérishi bilen türkiye jumhuriyitining bash ministiri rejep tayyip erdoghanni 2006-yilidiki eng muwapiqiyetlik dölet erbabi dep bahalap chiqtuq. Yene türkiy milletlerning ammiwiy teshkilatlirining namzat körsitishi bilen dr. Gülzade tengritaghli xanimgha Uyghur medeniyet - sen'itige qoshqan töhpisi üchün altun médal berduq.
Yusuf chélik ependi gülzade tengritaghli xanimgha bu mukapatni bérishtiki meqsitining sherqiy türkistan mesilisini dunyaning küntertipige élip kélish ikenlikini éytip mundaq dédi:
"Sherqiy türkistanliqlar bizning qérindashlirimiz, ammiwiy teshkilat bolush süpitimiz bilen sherqiy türkistanliq birisige bu mukapatni bérishtiki meqsitimiz sherqiy türkistanda boliwatqan zulumgha diqqet tartish shundaqla her da'im sherqiy türkistan xelqini qollap quwwetleydighanliqimizni ipadileshtin ibaret".
Mukapatni tapshurup alghandin kéyin, biz gülzade tengritaghli xanimning mukapatni tapshurup alghandin kéyinki tesiratlirini soriduq.
Munasiwetlik maqalilar
- Yawro asiya ötkili - shinjangning tarixi (1)
- Italiyilik tetqiqatchining Uyghurlar heqqidiki qarashliri
- Fransuz tetqiqatchisining Uyghurlar heqqidiki qarashliri
- Türkiyide türkolog baymirza hayit ependi xatirilendi
- Shwétsiyidiki tunji ewlat Uyghurshunas Gustaf Raquette
- Dru Gladney Kanada CBC téléwiziyiside Uyghurlar heqqide toxtaldi
- Isra'iliyilik Uyghurshunas Yitzhak Shichor bilen söhbet(2)
- Isra'iliyilik Uyghurshunas Yitzhak Shichor bilen söhbet(1)
- Uyghurshunasliq tetqiqatliridiki töhpikar - qazaqistanliq Uyghur tarixshunasi, doktor gégél is'haqop(1)
- Istanbul körgezme we qurultay merkizide türk dunyasi konsért kéchiliki ötküzüldi