Йеңи "мүлүк қануни" һәққидики муназириләр барғансери кеңәймәктә


2007.03.19

Хитайда 16 ‏-март күни йеңи"мүлүк қануни" мақуллинип үч күн өткәндин кейин, 19 ‏- март күни ху җинтав рәис буйруқи чиқирип, бу қанунниң 10 ‏-айниң 1 ‏- күнидин башлап иҗра қилинидиғанлиқини җакарлиди. Шинхуа агентлиқиму мақалә елан қилип, бу қанундики конкрет бәлгилимиләрни чүшәндүрди. Һазир хәлқ ичидә бу йеңи "мүлүк қануни"һәққидики муназириләр барғансери кеңәймәктә.

Йеңи "мүлүк қануни" җәмийәттә техиму көп җедәл-маҗира пәйда қилиши мумкин

Америка авазиниң баян қилишичә, хитайда мақулланған йеңи "мүлүк қануни" һәққидә асасән икки хил көз қараш бар, буниң бири, йеңи мүлүк қанунида "хусусий мүлүкни қоғдаш"дәп ениқ йезилғанлиқи 1949 ‏- йилидин буянқи тунҗи қетим йүз бәргән иш, бу бирхил илгириләш, дегән көз қараш болса, иккинчи хили, хитайда йәр-земин һоқуқи мәсилиси әң негизлик мәсилә, бу қанунда мәзкур әң негизлик уқум йәнила муҗмәл, кишилик һоқоқи болмиған хәлқниң мүлүк һоқуқи боламду? әмди бу қанун иҗра қилинса, техиму чоң қалаймиқанчилиқ келип чиқиши мумкин, дегән көз қараштин ибарәт. Бу зиялийларниң көз қариши. Әмма хәлқ арисидики көз қараш , мулаһизиләр техиму бивастә һәм кәскин.

Б б с ниң тор бетидики муназириләрдә баян қилинишичә, бәзи тордашлар мавзедуң дәвридила "дөләт мүлки, коллектип мүлки вә шәхсий мүлүк"дегән нәзирийә бар иди. Йеқинда мақулланған бу йеңи "мүлүк қануни"да үч хил мүлүк қоғдилиду, дегән бәлгилиминиң мавзедуң идийисидин пәрқи йоқ, бу қанун йәнила мавзедуң идийисини қанунлаштуруш вә аз санлиқ кишиләрниң қанунсиз мүлкини қоғдаш ролини ойнап, җәмийәттә техиму көп җедәл-маҗира пәйда қилиши мумкин , дәп қаримақта.

Йеңи "мүлүк қануни" уйғурларниң әмәс, хитай көчмәнлириниң мүлкини қанунлаштуруш вә қоғдаш үчүн қоллинилиду

Шинхуа агентлиқи ху җинтавниң рәис буйруқини елан қилғандин кейинла, "мүлүк қануни" дики бәзи конкрет бәлгилимиләргә изаһат бәрди. Униңда "терилғу йәрләрни көтүригә елиш вақити 30 йилғичә, яйлақларни көтүригә елиш вақти 30 йилдин 50 йилғичә, орманлиқларни көтүригә елиш муддити 30 йилдин 70 йилғичә болиду", дәп баян қилинған. явропада нәшр қилинидиған "ғәрб шамили" журнилиниң тәһрири һаҗи абдурешит керими әпәнди бу һәқтә мулаһизә елан қилип, хитайда мақулланған йеңи "мүлүк қануни"ниң уйғур аптоном районида хитай һөкүмити көчүрүп кәлгән хитай көчмәнлириниң мәнпәәтини қанунлаштуруш ролини ойнайду, дәп көрсәтти. (Вәли)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.