Yéngi "mülük qanuni" heqqidiki munaziriler barghanséri kéngeymekte

• Muxbirimiz welining bu heqtiki toluq melumati
• Download story audio

Xitayda 16 ‏-mart küni yéngi"mülük qanuni" maqullinip üch kün ötkendin kéyin, 19 ‏- mart küni xu jintaw re'is buyruqi chiqirip, bu qanunning 10 ‏-ayning 1 ‏- künidin bashlap ijra qilinidighanliqini jakarlidi. Shinxu'a agéntliqimu maqale élan qilip, bu qanundiki konkrét belgilimilerni chüshendürdi. Hazir xelq ichide bu yéngi "mülük qanuni"heqqidiki munaziriler barghanséri kéngeymekte.

Yéngi "mülük qanuni" jem'iyette téximu köp jédel-majira peyda qilishi mumkin

Amérika awazining bayan qilishiche, xitayda maqullan'ghan yéngi "mülük qanuni" heqqide asasen ikki xil köz qarash bar, buning biri, yéngi mülük qanunida "xususiy mülükni qoghdash"dep éniq yézilghanliqi 1949 ‏- yilidin buyanqi tunji qétim yüz bergen ish, bu birxil ilgirilesh, dégen köz qarash bolsa, ikkinchi xili, xitayda yer-zémin hoquqi mesilisi eng négizlik mesile, bu qanunda mezkur eng négizlik uqum yenila mujmel, kishilik hoqoqi bolmighan xelqning mülük hoquqi bolamdu? emdi bu qanun ijra qilinsa, téximu chong qalaymiqanchiliq kélip chiqishi mumkin, dégen köz qarashtin ibaret. Bu ziyaliylarning köz qarishi. Emma xelq arisidiki köz qarash , mulahiziler téximu biwaste hem keskin.

B b s ning tor bétidiki munazirilerde bayan qilinishiche, bezi tordashlar mawzédung dewridila "dölet mülki, kolléktip mülki we shexsiy mülük"dégen neziriye bar idi. Yéqinda maqullan'ghan bu yéngi "mülük qanuni"da üch xil mülük qoghdilidu, dégen belgilimining mawzédung idiyisidin perqi yoq, bu qanun yenila mawzédung idiyisini qanunlashturush we az sanliq kishilerning qanunsiz mülkini qoghdash rolini oynap, jem'iyette téximu köp jédel-majira peyda qilishi mumkin , dep qarimaqta.

Yéngi "mülük qanuni" Uyghurlarning emes, xitay köchmenlirining mülkini qanunlashturush we qoghdash üchün qollinilidu

Shinxu'a agéntliqi xu jintawning re'is buyruqini élan qilghandin kéyinla, "mülük qanuni" diki bezi konkrét belgilimilerge izahat berdi. Uningda "térilghu yerlerni kötürige élish waqiti 30 yilghiche, yaylaqlarni kötürige élish waqti 30 yildin 50 yilghiche, ormanliqlarni kötürige élish mudditi 30 yildin 70 yilghiche bolidu", dep bayan qilin'ghan. Yawropada neshr qilinidighan "gherb shamili" zhurnilining tehriri haji abduréshit kérimi ependi bu heqte mulahize élan qilip, xitayda maqullan'ghan yéngi "mülük qanuni"ning Uyghur aptonom rayonida xitay hökümiti köchürüp kelgen xitay köchmenlirining menpe'etini qanunlashturush rolini oynaydu, dep körsetti. (Weli)