Munapiqlar we ularning insaniyetke bolghan xetiri

Munapiqlar - ikki yüzlimichi mexluqlar bolup, her qandaq bir millette tépilidu. Tarixlargha nezer salidighan bolsaq, köpligen milletlerning mustemlikichilerning tömür tapanliri astigha kirip qélishi, insaniyetning ziyankeshliklerge uchrishi, seltenetlerning qoldin kétishi, insaniyet üchün yaramliq kishilerning düshmenler qolida nabut bolishi we bashqimu nurghunlighan bexitsizlikler ene eshu insaniyet dunyasining shum buyiliri bolghan munapiqlarning satqunliqi, xa'inliqi we heyyarliqi sewebtin bolghan.
Muxbirimiz ömerjan toxti xewiri
2008-06-12
Share

Munapiqlar dunyadiki her qandaq bir jem'iyet, qanun we din nezeride eng rezil we eng peskesh mexluqlar bolup, ular hemishe allah we insanlarning lenitige mehkumdur. Qisqisi, jem'iyetni munapiqlardin saqlash shu jem'iyetning tinchliq - amanliqini, puqralarning bext - sa'aditini kapaletlendüridighan muhim ishtur.

Abdulétip hajim bilen söhbet

Se'udi erebistanining mekke mukerreme shehiride turushluq yash alim abdulétip hajim munapiqlarning rezil mexluqlar ikenliki heqqide toxtulup mundaq dédi:" allah ta'ala qur'an kerimning béshida insanlarni üch türge ayriydu: birinchisi, qur'anning rastinla allahning muhemmed eleyhissalamgha wehiy qilghan sözliri ikenlikige ishen'güchi möminler, ikkinchisi, ishenmeydighanlar, üchinchisi, din'gha ishenmisimu özlirini iman éytqanlar qataridin körsitish arqiliq musulmanlarni aldimaqchi bolghan ikki yüzlimichi munapiqlar bolup, bularning musulmanlargha we insaniyetke bolidighan xetiri ashkara düshmendin elwette yamandur. Shunga allah ta'ala munapiqlar toghruluq13 ayette tepsili xewer bergen we ular toghruluq: ' munapiqlar dozaxning eng astinqi qétida azablinidu ' dep élan qilghan. Ayetlerdiki munapiqlardin meqset peyghember eleyhissalamning zamanidiki munapiqlarla emes, belki her qandaq zaman we her qandaq makanlardiki munapiqlarning hemmisini öz ichige alidu. Peyghember eleyhissalam bir hediside: ' kishilerning eng yamini ikki yüzlimichi munapiqlar bolup, ular uninggha bir yüzi bilen buninggha yene bir yüzi bilen körinidu ' dep körsetken."

Munapiqlar insaniyetning esheddiy düshmenliridur

Abdulétip hajim munapiqlarning xetiri heqqide toxtulup mundaq dédi:" melumki, munapiqlar qaysi zamanda we qaysi jayda bolmisun, ular öz millitining menpe'etige ziyan salidighan, öz wetinining ziyini üchün ishleydighan zeherlik chayanlardur. Eger her qandaq adem özining ichidikilirini shu boyiche dadil ashkara qilidighan we öz burchini aldamchiliqsiz semimiy orunlaydighan bolsa, bügünki insanlar jem'iyiti bextke érishken we her dölet özining xojiliqini mustehkem tikliyeligen bolatti. Bizning Uyghur tariximizgha qaraydighan bolsaqmu, munapiqliqning millitimizge qanchilik köp ziyan salghanliqini, bextni shaqawetke, hörlükni mehkumluqqa aylandurup qoyushqa seweb bolghanliqini, sansizlighan yaramliq, xelqqe menpe'etlik ezimetlirimizning nabut bolushigha sewebchi bolghanliqini körimiz. Abduqadir damollamdek millitimizni aqartqan meripetperwer zatning, abduxaliq Uyghurdek xelqni oyghatqan we millitimizni erkinlikke chaqirghan talantliq kishilirimizning düshmenler qolida shepqetsizlerche qetli qilinishigha biwasite sewebchi bolghanlarmu bizning millettin chiqqan wehshi munapiqlar idi. Hazirmu her sahediki bir türküm munapiqlar millitimizning bextike olturup kelmekte. Munapiqlar haman bir küni shermende bolmay qalmaydu. Axirettimu ular eng qattiq jazagha tartilidu. Allah ta'alaning qur'an kerimde munapiqlarning namazlirinimu oqumasliqqa buyrighanliqimu munapiqlarning qanchilik qedirsiz, rezil we pes mexluqlar ikenlikini biliwélishimiz üchün yéterlik."

Munapiqlarning süpetliri

Abdulétip hajimning éytishiche, peyghember eleyhissalam munapiqlarning eng asasliq süpetlirini bayan qilip:" munapiqlarning süpiti üch bolup, munapiq sözlise yalghan sözleydu, wede qilsa wapa qilmaydu, amanet qoyulsa xiyanet qilidu"dep körsetken.

Bu hedistin melumki, yalghan sözlesh, wedige wapa qilmasliq we amanetke xiyanet qilish eng rezil qiliqlar bolup, munapiqlar bu süpetlerning esli igiliridur. Chünki munapiqlar hemishe zalim bésimdarlarning aldigha bérip, öz millitidin chiqqan yaxshi kishilerni  yalghan - yawidaq sözliri bilen qarilaydu, qewm qérindashliri ulargha ishinip ichki sirlirini éytsa, kéchikmestin derhal bérip zalimlargha ularni sétiwétidu, xelq ishench qilip bezi nersilirini we gep - sözlirini ulargha amanet qilsa, derhal uninggha xiyanet qilidu. Chünki ular shundaq rezillikke könüp ketken, peskesh mexluqlardur. Shunga ulardin yiraq turush, ularni jem'iyettin yeklesh we ulargha héchbir zaman ishench qilmasliq teleb qilinidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet