Буш билән кәррий дөләт ичи мәсилисидә муназирә өткүзди


2004-10-14
Share

Америка презденти җорҗ W буш, сайлам риқабәтчиси кеңәш патала әзаси җон кәррий билән чаршәнбә күни кәчтә үчинчи қетимлиқ муназирә елип берип, иқтисад вә җәмийәт мәсилилиридә муназирләшти. Бу прездент сайлими алдидики әң ахирқи қетимлиқ муназирә һесаблиниду.

Бир йерим саәт давамлашқан муназирә җәряни америка симлиқ телевизийисидә нәқ мәйдандин бивастә тарқитилған болуп, буш билән кәррий һәр иккилиси муназирә башқурғучиниң суаллириға җавап бәрди һәмдә өзлириниң һәрқайси мәсилиләргә болған охшимиған көз қарашлирини тонуштурди.

Муназирә темиси баҗ, сода, ишсизлиқ, давалиниш суғурта, пенсийә пули, бала алдуруш, өлүм җазаси, енергийә, муһит, ирақ уруши вә көчмәнләр мәсилиси қатарлиқ кәң даиридики иқтисадий вә иҗтимаий мәсилиләрни өз ичигә алди.

Кәррий: бушниң баҗ қисқартиш сиясити байларни мәнпәәтдар қилиду

Димократчилар партийисиниң прездент кандидати җон кәррий муназирә җәрянида, бушниң баҗ қисқартиш сияситигә қарши чиқип, буниң оттураһал сәвийидики хәлқләргә һечқандақ пайда елип кәлмәйдиғанлиқини билдүрди.

Кәррий сөзидә, прездент бушниң балиларниң оқушиға капаләт қилиш лайиһәсини қобул қилмай, 500миң оқуғучиниң мәктәпкә кириш пурситини йоқитишиға сәвәп болуштин сирт йәнә, әксичә байларға көп мәнпәәт йәткүзидиған баҗ қисқартиш сияситини йолға қойғанлиқини әйиплиди.

Әмма җорҗ буш кәррийниң баҗ қисқартиш сиясити үстидики әйиплишини рәт қилип, буниң оттураһал сәвийидики кишиләргә пайда елип келидиғанлиқида чиң турди.

Буш һөкүмәтниң маарип сияситини ақлиди

Буш йәнә, өзиниң маарип сияситини қоғдап, униң һөкүмитиниң оқуғучиларниң оқуш мәсилисини илгири сүрүш үчүн бир йүрүш җиддий тәдбирләрни қолланғанлиқини билдүрди. Һәмдә кәррийниң бундақ дийишиниң, униң бу һәқтики чүшәнчисиниң кәмчилликини көрситидиғанлиқини ейтти.

Муназирә темилириниң муһим бир қисми болған ишсизлиқ мәсилиси тоғрисида тохталған җон кәррий җорҗ бушқа бивастә һуҗум қилип, ишсизлиқ мәсилисидә бушниң, буниңдин авалқи 11 прездентта көрүлүп бақмиған йәни 72 йилдин буянқи әң начар хатирини яратқанлиқини әскәртти.

Кәррий сөзидә йәнә, өзиниң кишиләрни хизмәт пурситигә игә қилидиған техиму үнүмлүк пилани барлиғини, һәмдә презденликкә сайлинип, ишсизлиқ мәсилисини яхши һәл қилип болғандин кейинла, җәмийәт параванлиқ мәсилисини яхшилайдиғанлиқини вәдә қилди.

Җорҗ буш буниңға қарита, өткәнки 13 айдин буян америкида 2 милйонға йеқин хизмәт пурсити көпәйгәнликини билдүргән болса, кәррий буш прездент болған қисқиғинә 4 йил ичидә америка 1милйон 600 миң хизмәт пурситини йоқатқанлиқини әскәртти.

Кәррий: иттипақдаш дөләтләр билән һәқиқий һәмкарлашқанда, америка әң қудрәтлик болиду

Гәрчә бу қетимлиқ муназирә асаслиқи дөләт ичидики мәсилиләрни мәркәз қилған болсиму, лекин террорчилиқ, дөләт бихәтәрлики вә америка қисимлириниң орунлаштурулиши қатарлиқ башқа темиларғиму четилди. Прездент кандидати җон кәррий бушниң тоғра һөкүм қилиш иқтидариға игә әмәсликини, һәмдә яхши хәлқара мунасивәт орниталмиғанлиқини әйиплиди. У сөзидә, " бизниң қораллиқ қисимлиримизни бесимдин қутулдуруштики әң муһим нуқта: биз иттипақдашлиримиз билән һәқиқий һәмкарлашқандила, андин америка әң қудрәтлик болиду" деди.

Буш бу темиға қарита, афғанситандики димократик сайлам вә садам һүсәйин һакимийитиниң ағдурулишини әскәртип, келәр йили ирақтиму димократик сайлам елип берилидиғанлиқини тәкитлиди.

Бу қетимлиқ муназирә һәр икки кандидат үчүн интайин муһим рол ойнайду. Прездент сайлими 11 - айниң 2- күни йәни 3 һәптидин кейин елип берилидиған болуп, шу чаққичә һәр иккила кандидат флорида, невада вә вискансен қатарлиқ бир қанчә шитатларға берип сайламға аваз топлайду. (Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт