Bush bilen kerriy dölet ichi mesiliside munazire ötküzdi

Amérika prézdénti jorj W bush, saylam riqabetchisi kéngesh patala ezasi jon kerriy bilen charshenbe küni kechte üchinchi qétimliq munazire élip bérip, iqtisad we jem'iyet mesililiride munazirleshti. Bu prézdént saylimi aldidiki eng axirqi qétimliq munazire hésablinidu.

Bir yérim sa'et dawamlashqan munazire jeryani amérika simliq téléwiziyiside neq meydandin biwaste tarqitilghan bolup, bush bilen kerriy her ikkilisi munazire bashqurghuchining su'allirigha jawap berdi hemde özlirining herqaysi mesililerge bolghan oxshimighan köz qarashlirini tonushturdi.

Munazire témisi baj, soda, ishsizliq, dawalinish sughurta, pénsiye puli, bala aldurush, ölüm jazasi, énérgiye, muhit, iraq urushi we köchmenler mesilisi qatarliq keng da'iridiki iqtisadiy we ijtima'iy mesililerni öz ichige aldi.

Kerriy: bushning baj qisqartish siyasiti baylarni menpe'etdar qilidu

Dimokratchilar partiyisining prézdént kandidati jon kerriy munazire jeryanida, bushning baj qisqartish siyasitige qarshi chiqip, buning otturahal sewiyidiki xelqlerge héchqandaq payda élip kelmeydighanliqini bildürdi.

Kerriy sözide, prézdént bushning balilarning oqushigha kapalet qilish layihesini qobul qilmay, 500ming oqughuchining mektepke kirish pursitini yoqitishigha sewep bolushtin sirt yene, eksiche baylargha köp menpe'et yetküzidighan baj qisqartish siyasitini yolgha qoyghanliqini eyiplidi.

Emma jorj bush kerriyning baj qisqartish siyasiti üstidiki eyiplishini ret qilip, buning otturahal sewiyidiki kishilerge payda élip kélidighanliqida ching turdi.

Bush hökümetning ma'arip siyasitini aqlidi

Bush yene, özining ma'arip siyasitini qoghdap, uning hökümitining oqughuchilarning oqush mesilisini ilgiri sürüsh üchün bir yürüsh jiddiy tedbirlerni qollan'ghanliqini bildürdi. Hemde kerriyning bundaq diyishining, uning bu heqtiki chüshenchisining kemchillikini körsitidighanliqini éytti.

Munazire témilirining muhim bir qismi bolghan ishsizliq mesilisi toghrisida toxtalghan jon kerriy jorj bushqa biwaste hujum qilip, ishsizliq mesiliside bushning, buningdin awalqi 11 prézdéntta körülüp baqmighan yeni 72 yildin buyanqi eng nachar xatirini yaratqanliqini eskertti.

Kerriy sözide yene, özining kishilerni xizmet pursitige ige qilidighan téximu ünümlük pilani barlighini, hemde prézdénlikke saylinip, ishsizliq mesilisini yaxshi hel qilip bolghandin kéyinla, jem'iyet parawanliq mesilisini yaxshilaydighanliqini wede qildi.

Jorj bush buninggha qarita, ötkenki 13 aydin buyan amérikida 2 milyon'gha yéqin xizmet pursiti köpeygenlikini bildürgen bolsa, kerriy bush prézdént bolghan qisqighine 4 yil ichide amérika 1milyon 600 ming xizmet pursitini yoqatqanliqini eskertti.

Kerriy: ittipaqdash döletler bilen heqiqiy hemkarlashqanda, amérika eng qudretlik bolidu

Gerche bu qétimliq munazire asasliqi dölet ichidiki mesililerni merkez qilghan bolsimu, lékin térrorchiliq, dölet bixeterliki we amérika qisimlirining orunlashturulishi qatarliq bashqa témilarghimu chétildi. Prézdént kandidati jon kerriy bushning toghra höküm qilish iqtidarigha ige emeslikini, hemde yaxshi xelq'ara munasiwet ornitalmighanliqini eyiplidi. U sözide, " bizning qoralliq qisimlirimizni bésimdin qutuldurushtiki eng muhim nuqta: biz ittipaqdashlirimiz bilen heqiqiy hemkarlashqandila, andin amérika eng qudretlik bolidu" dédi.

Bush bu témigha qarita, afghansitandiki dimokratik saylam we sadam hüseyin hakimiyitining aghdurulishini eskertip, kéler yili iraqtimu dimokratik saylam élip bérilidighanliqini tekitlidi.

Bu qétimliq munazire her ikki kandidat üchün intayin muhim rol oynaydu. Prézdént saylimi 11 - ayning 2- küni yeni 3 heptidin kéyin élip bérilidighan bolup, shu chaqqiche her ikkila kandidat florida, néwada we wiskansén qatarliq bir qanche shitatlargha bérip saylamgha awaz toplaydu. (Peride)