Мурат насиропниң вапатидин кейинки ишлар


2007-01-30
Share

qaldim-yalghuz-murat.jpg
Мурат насиропниң "қалдим ялғуз" намлиқ албуминиң теши

Атақлиқ уйғур нахша чолпини мурат насиропниң вапат болғиниға он күндин ашти. 37 яшлиқ мурат насиропниң туюқсиз вапати пәқәт униң аилә-тавабәтлиригила қайғу елип кәлмәстин бәлки, униң нахшилирини яқтуруп аңлайдиған вә униң талантиға қайил болған сансизлиған һәр милләт кишилириниң қайғуси вә ечинишини қозғиғанлиқи мәлум.

Болупму, оттура асия җумһурийәтлиридики уйғурлар өзлириниң мәзкур пәхирлик оғланидин вақитсиз айрилип қалғанлиқидин техиму ечиниш һес қилған болуп, һәқиқәтән мурат насироп қазақистан, қирғизистан, өзбекистан вә башқа җумһурийәтләрдә яшайдиған уйғурларниң әң пәхирлинидиған, әң қәдирләйдиған адими болуп қалған иди. Мурат насироп уларниң нәзиридә мәзкур җумһурийәтләрдики уйғурларниң қәддини мәниви җәһәттин болсиму, юқири көтүрүп, уйғурларниң талантлиқ бир хәлқ икәнликиниң символи болуп қалған иди.

Мурат насироп давамлиқ русийә вә оттура асия мәтбуатлирида

Мурат насироп һаят вақтида өзиниң йеқимлиқ нахшилири вә иҗад қилған музикилири һәм актип сәнәт вә җамаәт паалийәтлири арқилиқ русийә вә оттура асия мәтбуатлириниң даимлиқ тәмисиға айланған, униң қолида қәшқәр равабини көтүрүп, уйғур сәнити, уйғур мәдәнийити вә уйғурларниң мәвҗут мәсилилири һәққидә сөзләватқан қияпити русийә телевизийә қаналлирида пат-пат көрүнүп турған болса, униң туюқсиз вапати русийә вә оттура асия мәдәнийәт саһәсидики зор трагедийилик вәқә сүпитидә он нәччә күндин буян мәтбуатларниң даимлиқ темиси болуп кәлмәктә.

Мурат насироп һәққидики учурлар русийә издәш торлирида наһайити коп санни игилигән болуп, рус тилидики издәш торлиридин Rambler.ru" Да мурат насиропқа аит учур 110061 йәрдә, Mail.ru Да 45843 йәрдә, Yandex.ru Да 45798 йәрдә, учрайду. Ғәрб дунясидики атақлиқ торлардин Google ниң русчә қисмида мурат насироп дегән исим 1 милйон 560 миң қетим учрайду. Дәсләпки истатистикилиқ учурларға қариғанда, бу бир шәхскә нисбәтән ғайәт зор сан һесаблинидикән.

Мурат насиропниң һаят вақтида вә вапат болғандин кейин униң һәққидә йезилған учур вә мақалиларниң зади қанчилик икәнликини ениқлаш һазирчә мумкин әмәс. Лекин, униң вапатидин кейин барлиқ дегүдәк русийә вә башқа мустәқил дөләтләр һәмдостлуқи әллириниң агентлиқлири, гезитлири, интернәт сәһипилириниң униң һәққидә давамлиқ учур вә мақалиларни елан қилғанлиқи һәм қиливатқанлиқи мәлум. Буларниң ичидә мәшһур интәрнәт торлиридин http://www.km.ru/ , http://utro.ru Вә башқиларни мисал қилип көрситиш мумкин. Муратқа аит бу мақалиларда униң таланти, нәтиҗилири вә вақитсиз өлүмигә болған ечинишлар шуниңдәк униң һаятиниң ахирқи басқучлиридики иҗадийәтлири һәм иш паалийәтлири йезилған. Бу мақалиларда йәнә мурат насиропниң аилә-тавабатлириниң әһвали вә уларниң һәм муратниң достлириниң әслимлири шуниңдәк башқа көплигән темилар мәркәзлик йорутулмақта.

Омумән, рус тилидики мәтбуатлардики инкасларда мурат насиропниң өлүминиң толиму тәсадипий болғанлиқи вә сирлиқ һәм әҗәблинәрлик түс алғанлиқи оттуриға қоюлмақта.

Муратниң өлүми һәққидики көз қарашлар һәр хил болмақта

Русийә мәтбуатлири русийиниң атақлиқ чолпини, заманиви нахша саһәсиниң падишаһи дәп һөрмәтлиниватқан алла пугачева ханимниң мурат насиропниң өлүмидин ечинип," мурат тәбий талантлиқ вә авазлиқ нахшичи иди. Бизниң сәһнимиз әң талантлиқ бир артистин айрилди" дегән баһа сөзлирини елан қилди.

Омумән, бу мақалиларда мурат насиропқа "атақлиқ нахшичи", "атақлиқ нахша чолпини", "русийә заманиви нахш-музикисиниң вәкиллиридин бири" дегәндәк баһалар берилгән. Мурат туғулған қазақистан җумһурийитиниң мәтбуатлириму мурат насироп һәққидә коп учурларни вә яхши баһа мақалилирини елан қилған болуп, алмута дөләт университетиниң профессори руслан арзийев бу нуқтини тәкитлиди.

Мурат насиропниң әң чоң артуқчилиқи униң милләтпәрвәрлики болуп, у һәммила йәрдә өзиниң уйғурлуқини җакарлап, уйғур мәдәнийитини, уйғурларниң кимликини тонуштурған. Шуңлашқа мурат насиропқа аит йезилған мақалә-учурларда униң уйғур миллитидин икәнлики әскәртилгән. У даим мухбирларға "мән уйғур, алмутида туғулдум, лекин, дадам исмаил сопи қәшқәрдин кәлгән. Анам ғулҗида туғулған" дейишни унутмиған һәтта, уйғурларниң улуғ хәлқ болғанлиқи, өзиниң уйғур миллитиниң улуғлуқидин пәхрлинидиғанлиқини билдүрүп турған. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт