Murat nasiropning wapatidin kéyinki ishlar


2007.01.30
Share on WhatsApp
Share on WhatsApp

qaldim-yalghuz-murat.jpg
Murat nasiropning "qaldim yalghuz" namliq albumining téshi

Ataqliq Uyghur naxsha cholpini murat nasiropning wapat bolghinigha on kündin ashti. 37 Yashliq murat nasiropning tuyuqsiz wapati peqet uning a'ile-tawabetlirigila qayghu élip kelmestin belki, uning naxshilirini yaqturup anglaydighan we uning talantigha qayil bolghan sansizlighan her millet kishilirining qayghusi we échinishini qozghighanliqi melum.

Bolupmu, ottura asiya jumhuriyetliridiki Uyghurlar özlirining mezkur pexirlik oghlanidin waqitsiz ayrilip qalghanliqidin téximu échinish hés qilghan bolup, heqiqeten murat nasirop qazaqistan, qirghizistan, özbékistan we bashqa jumhuriyetlerde yashaydighan Uyghurlarning eng pexirlinidighan, eng qedirleydighan adimi bolup qalghan idi. Murat nasirop ularning neziride mezkur jumhuriyetlerdiki Uyghurlarning qeddini meniwi jehettin bolsimu, yuqiri kötürüp, Uyghurlarning talantliq bir xelq ikenlikining simwoli bolup qalghan idi.

Murat nasirop dawamliq rusiye we ottura asiya metbu'atlirida

Murat nasirop hayat waqtida özining yéqimliq naxshiliri we ijad qilghan muzikiliri hem aktip sen'et we jama'et pa'aliyetliri arqiliq rusiye we ottura asiya metbu'atlirining da'imliq temisigha aylan'ghan, uning qolida qeshqer rawabini kötürüp, Uyghur sen'iti, Uyghur medeniyiti we Uyghurlarning mewjut mesililiri heqqide sözlewatqan qiyapiti rusiye téléwiziye qanallirida pat-pat körünüp turghan bolsa, uning tuyuqsiz wapati rusiye we ottura asiya medeniyet sahesidiki zor tragédiyilik weqe süpitide on nechche kündin buyan metbu'atlarning da'imliq témisi bolup kelmekte.

Murat nasirop heqqidiki uchurlar rusiye izdesh torlirida nahayiti kop sanni igiligen bolup, rus tilidiki izdesh torliridin Rambler.ru" Da murat nasiropqa a'it uchur 110061 yerde, Mail.ru Da 45843 yerde, Yandex.ru Da 45798 yerde, uchraydu. Gherb dunyasidiki ataqliq torlardin Google ning rusche qismida murat nasirop dégen isim 1 milyon 560 ming qétim uchraydu. Deslepki istatistikiliq uchurlargha qarighanda, bu bir shexske nisbeten ghayet zor san hésablinidiken.

Murat nasiropning hayat waqtida we wapat bolghandin kéyin uning heqqide yézilghan uchur we maqalilarning zadi qanchilik ikenlikini éniqlash hazirche mumkin emes. Lékin, uning wapatidin kéyin barliq dégüdek rusiye we bashqa musteqil döletler hemdostluqi ellirining agéntliqliri, gézitliri, intérnet sehipilirining uning heqqide dawamliq uchur we maqalilarni élan qilghanliqi hem qiliwatqanliqi melum. Bularning ichide meshhur internet torliridin http://www.km.ru/ , http://utro.ru We bashqilarni misal qilip körsitish mumkin. Muratqa a'it bu maqalilarda uning talanti, netijiliri we waqitsiz ölümige bolghan échinishlar shuningdek uning hayatining axirqi basquchliridiki ijadiyetliri hem ish pa'aliyetliri yézilghan. Bu maqalilarda yene murat nasiropning a'ile-tawabatlirining ehwali we ularning hem muratning dostlirining eslimliri shuningdek bashqa köpligen témilar merkezlik yorutulmaqta.

Omumen, rus tilidiki metbu'atlardiki inkaslarda murat nasiropning ölümining tolimu tesadipiy bolghanliqi we sirliq hem ejeblinerlik tüs alghanliqi otturigha qoyulmaqta.

Muratning ölümi heqqidiki köz qarashlar her xil bolmaqta

Rusiye metbu'atliri rusiyining ataqliq cholpini, zamaniwi naxsha sahesining padishahi dep hörmetliniwatqan alla pugachéwa xanimning murat nasiropning ölümidin échinip," murat tebiy talantliq we awazliq naxshichi idi. Bizning sehnimiz eng talantliq bir artistin ayrildi" dégen baha sözlirini élan qildi.

Omumen, bu maqalilarda murat nasiropqa "ataqliq naxshichi", "ataqliq naxsha cholpini", "rusiye zamaniwi naxsh-muzikisining wekilliridin biri" dégendek bahalar bérilgen. Murat tughulghan qazaqistan jumhuriyitining metbu'atlirimu murat nasirop heqqide kop uchurlarni we yaxshi baha maqalilirini élan qilghan bolup, almuta dölet uniwérsitétining proféssori ruslan arziyéw bu nuqtini tekitlidi.

Murat nasiropning eng chong artuqchiliqi uning milletperwerliki bolup, u hemmila yerde özining Uyghurluqini jakarlap, Uyghur medeniyitini, Uyghurlarning kimlikini tonushturghan. Shunglashqa murat nasiropqa a'it yézilghan maqale-uchurlarda uning Uyghur millitidin ikenliki eskertilgen. U da'im muxbirlargha "men Uyghur, almutida tughuldum, lékin, dadam isma'il sopi qeshqerdin kelgen. Anam ghuljida tughulghan" déyishni unutmighan hetta, Uyghurlarning ulugh xelq bolghanliqi, özining Uyghur millitining ulughluqidin pexrlinidighanliqini bildürüp turghan. (Ümidwar)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.