Корла шәһәр башлиқи мутәллип йүсүп өлүминиң сәвәби ениқ әмәс

• Мухбирмиз пәридәниң бу һәқтики бу һәқтики мәлумати
• Download story audio

Муәллип йүсүп

Биз радиомизға учур бәргән мәлум бир кишидин, корла шәһәр башлиқи мутәллип йүсүпниң қаза қилғанлиқи һәққидә учурға игә болғандин кейин, бу һәқтә техиму көп мәлумат елиш үчүн корла шәһириниң һәр қайси тор бәтлиригә кирип издәндуқ. Әмма бу киши бизгә ейтқандәк, хитай тор бәтлиридә бу һәқтә һечқандақ хәвәр берилмәпту.

Бу кишиниң бизгә ейтип беришичә, һазир җамаәт арисида мутәллип йүсүпниң хиянәтчилик мәсилисигә четилип қалғанлиқи сәвәбидин өзини өлтүривалғанлиқи һәққидә сөз-чөчәк таралған. Шуңа биз йәкшәнбә күни корла шәһәрлик һөкүмәт ишханисиға бивастә телефон қилдуқ.

Һөкүмәт ишханисидин җаваб(1)

Бу һөкүмәт хадими өзиниң бу хәвәрни аңлимиғанлиқини ейтқандин кейин, биз йәнә корла шәһәрлик җамаәт хәвпсизлик идарисиға телефон урдуқ.

-Йеқинда биз корла шәһәр башлиқи мутәллипниң қаза қилғанлиқи тоғрисида хәвәр алдуқ. Мушу ишниң болғини растму? -кәчүрүң. Биз телефонда һечқандақ зиярәт қобул қилмаймиз. -Лекин бу вәқәниң йүз бәргини растму? -билмәймән.

Корла шәһириниң җ х идариси вә шәһәрлик һөкүмәт һәр иккилиси бу хәвәр тоғрисида учур бәрмигәндин кейин, биз дүшәнбә күни уларға йәнә қайта телефон қилдуқ. Лекин бу қетим улар шәһәр башлиқи мутәллип йүсүпниң өлгәнлик хәвирини етирап қилди.

Бу һөкүмәт хадими өзиниң мутәллип йүсүпниң хиянәтчиликкә четишлиқи бар-йоқлиқини уқмайдиғанлиқини ейтти. Униң ейтишичә йәнә, һазир корлидики җамаәт арисида мутәллип йүсүпниң қаза қилғанлиқ хәвири тарилип кәткән. Әмма һөкүмәт мәтбуатлирида бу һәқтә һазирғичә һечқандақ рәсмий хәвәр елан қилинмиған.

Һөкүмәт ишханисидин җаваб(2)

Радиомизға бу хәвәрни йәткүзгән киши бизгә, һазир җамаәт арисидики сөз-чөчәкләрдә, мутәллип йүсүпниң хиянәтчилик делосиға четилип, юқиридин уни тәкшүрүшкә адәм келишниң алдида өзини өлтүривалған дәйдиған гәп боливатқанлиқини билдүрди.

Дүшәнбә күни телефонимизни алған җ х идарисидики бир нәпәр хадим, мутәллипниң өлгәнлик хәвирини етирап қилдию, әмма униң өлиминиң иқтисадий хиянәтчилик мәсилисигә четишлиқи бар-йоқлиқини билмәйдиғанлиқини ейтти.

-У өзини өлтүривалғанму? яки башқилар тәрипидин өлтүрүлгәнму? -өзини өлтүривалған. -У өлүштин бурун, иқтисадий хиянәтчиликкә четилип қалғанмити? -буни мән билмәйдикәнмән. -У қанчә яшларда? -тәхминән 50 яшлардимики -униң қанчә балиси барти? -икки балиси барғу дәймән. -Һазир бу хәвәр мәтбуатларда елан қилиндиму? -яқ.

Биз бу хадимдин йәнә, мутәллип йүсүпниң ахирәтлик ишлириниң қандақ елип бериватқанлиқини һәмдә һөкүмәтниң бу мәсилини қандақ бир тәрәп қиливатқанлиқини соридуқ. Әмма у буниңдин хәвириниң йоқлиқини, уларға һөкүмәттин бу тоғрисида ениқ бир хәвәр кәлмигәнликини ейтти.

Авамниң җаваби

Биз йәнә корла шәһиридики бир қанчә аһалиликләрниң өйигә телефон қилсақ, улар бу хәвәрниң мушу 2-1 күндин буян еғиздин еғизға тарилип йүргәнликини билдүрди. Зияритимизни қобул қилған ваң фамилилик бир кишиниң бу һәқтә аңлиғанлири төвәндикичә:

-Бу хәвәр техи гезитләргиму чиқмиди. Пәқәт ағзакила тарилип йүриду. -Ундақта униң қандақ өлгәнлики тоғрисида немә гәп сөзләр боливатиду? -өзини өлтүривалған охшайду. Қариғанда, қолиниң қан томурини кесип өливапту. -У немә сәвәптин өливалғанду? -еғизда һәр хил гәпләр бар. Шу бәзилири, уни хиянәтчилик қилған охшайду дәйду.

Бу киши сөзидә, һазир һәқиқәтән кишиләрниң арисида, мутәллип йүсүпниң хиянәтчилик делосиға четилип қалғанлиқи тоғрисида сөз-чөчәк боливатқанлиқини, әмма тәпсилий әһвалдин уларниң хәвәрсиз икәнликини билдүрди.

Нөвәттә мутәллип йүсүпниң зади немә сәвәбтин өлгәнлики шундақла хитай һөкүмитиниң немә үчүн бу вәқәни ашкарилимай туриватқанлиқи йәнила намәлум бир мәсилә болмақта.

Корла шәһириниң һөкүмәт тор бетигә бесилған, корла шәһәр башлиқи мутәллип йүсүпниң қисқичә тарихиға асасланғанда, мутәллип йүсүп 1961- йили байнғулин областиниң лопнур наһийисидә туғулған. Шундақ болғанда у бу йил 44 яшқа киргән. У 1984- йили хитай компартийисигә әза болуп, 1986- йили хизмәткә чүшкән. Шундақла у йәнә, 2000 - йили хитайниң мәркизий партийә мәктипиниң игилик башқуруш кәспидә магистирлиқ унванини алған. У қаза қилишниң алдида, корла шәһәрлик парткомниң муавин рәиси вә корла шәһәр башлиқи болуп ишлигән.(Пәридә)