Korla sheher bashliqi mutellip yüsüp ölümining sewebi éniq emes


2005-09-26
Share
mutellip.gif
Mu'ellip yüsüp

Biz radi'omizgha uchur bergen melum bir kishidin, korla sheher bashliqi mutellip yüsüpning qaza qilghanliqi heqqide uchurgha ige bolghandin kéyin, bu heqte téximu köp melumat élish üchün korla shehirining her qaysi tor betlirige kirip izdenduq. Emma bu kishi bizge éytqandek, xitay tor betliride bu heqte héchqandaq xewer bérilmeptu.

Bu kishining bizge éytip bérishiche, hazir jama'et arisida mutellip yüsüpning xiyanetchilik mesilisige chétilip qalghanliqi sewebidin özini öltüriwalghanliqi heqqide söz-chöchek taralghan. Shunga biz yekshenbe küni korla sheherlik hökümet ishxanisigha biwaste téléfon qilduq.

Hökümet ishxanisidin jawab(1)

Bu hökümet xadimi özining bu xewerni anglimighanliqini éytqandin kéyin, biz yene korla sheherlik jama'et xewpsizlik idarisigha téléfon urduq.

-Yéqinda biz korla sheher bashliqi mutellipning qaza qilghanliqi toghrisida xewer alduq. Mushu ishning bolghini rastmu? -kechürüng. Biz téléfonda héchqandaq ziyaret qobul qilmaymiz. -Lékin bu weqening yüz bergini rastmu? -bilmeymen.

Korla shehirining j x idarisi we sheherlik hökümet her ikkilisi bu xewer toghrisida uchur bermigendin kéyin, biz düshenbe küni ulargha yene qayta téléfon qilduq. Lékin bu qétim ular sheher bashliqi mutellip yüsüpning ölgenlik xewirini étirap qildi.

Bu hökümet xadimi özining mutellip yüsüpning xiyanetchilikke chétishliqi bar-yoqliqini uqmaydighanliqini éytti. Uning éytishiche yene, hazir korlidiki jama'et arisida mutellip yüsüpning qaza qilghanliq xewiri tarilip ketken. Emma hökümet metbu'atlirida bu heqte hazirghiche héchqandaq resmiy xewer élan qilinmighan.

Hökümet ishxanisidin jawab(2)

Radi'omizgha bu xewerni yetküzgen kishi bizge, hazir jama'et arisidiki söz-chöcheklerde, mutellip yüsüpning xiyanetchilik délosigha chétilip, yuqiridin uni tekshürüshke adem kélishning aldida özini öltüriwalghan deydighan gep boliwatqanliqini bildürdi.

Düshenbe küni téléfonimizni alghan j x idarisidiki bir neper xadim, mutellipning ölgenlik xewirini étirap qildiyu, emma uning ölimining iqtisadiy xiyanetchilik mesilisige chétishliqi bar-yoqliqini bilmeydighanliqini éytti.

-U özini öltüriwalghanmu? yaki bashqilar teripidin öltürülgenmu? -özini öltüriwalghan. -U ölüshtin burun, iqtisadiy xiyanetchilikke chétilip qalghanmiti? -buni men bilmeydikenmen. -U qanche yashlarda? -texminen 50 yashlardimiki -uning qanche balisi barti? -ikki balisi barghu deymen. -Hazir bu xewer metbu'atlarda élan qilindimu? -yaq.

Biz bu xadimdin yene, mutellip yüsüpning axiretlik ishlirining qandaq élip bériwatqanliqini hemde hökümetning bu mesilini qandaq bir terep qiliwatqanliqini soriduq. Emma u buningdin xewirining yoqliqini, ulargha hökümettin bu toghrisida éniq bir xewer kelmigenlikini éytti.

Awamning jawabi

Biz yene korla shehiridiki bir qanche ahaliliklerning öyige téléfon qilsaq, ular bu xewerning mushu 2-1 kündin buyan éghizdin éghizgha tarilip yürgenlikini bildürdi. Ziyaritimizni qobul qilghan wang famililik bir kishining bu heqte anglighanliri töwendikiche:

-Bu xewer téxi gézitlergimu chiqmidi. Peqet aghzakila tarilip yüridu. -Undaqta uning qandaq ölgenliki toghrisida néme gep sözler boliwatidu? -özini öltüriwalghan oxshaydu. Qarighanda, qolining qan tomurini késip öliwaptu. -U néme seweptin öliwalghandu? -éghizda her xil gepler bar. Shu beziliri, uni xiyanetchilik qilghan oxshaydu deydu.

Bu kishi sözide, hazir heqiqeten kishilerning arisida, mutellip yüsüpning xiyanetchilik délosigha chétilip qalghanliqi toghrisida söz-chöchek boliwatqanliqini, emma tepsiliy ehwaldin ularning xewersiz ikenlikini bildürdi.

Nöwette mutellip yüsüpning zadi néme sewebtin ölgenliki shundaqla xitay hökümitining néme üchün bu weqeni ashkarilimay turiwatqanliqi yenila namelum bir mesile bolmaqta.

Korla shehirining hökümet tor bétige bésilghan, korla sheher bashliqi mutellip yüsüpning qisqiche tarixigha asaslan'ghanda, mutellip yüsüp 1961- yili bayn'ghulin oblastining lopnur nahiyiside tughulghan. Shundaq bolghanda u bu yil 44 yashqa kirgen. U 1984- yili xitay kompartiyisige eza bolup, 1986- yili xizmetke chüshken. Shundaqla u yene, 2000 - yili xitayning merkiziy partiye mektipining igilik bashqurush kespide magistirliq unwanini alghan. U qaza qilishning aldida, korla sheherlik partkomning mu'awin re'isi we korla sheher bashliqi bolup ishligen.(Peride)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet