Muxbirlarni qoghdash komitéti yilliq doklat élan qildi


2006-02-21
Share

Yéqinda merkizi nyuyorktiki muxbirlarni qoghdash komitéti mexsus yilliq doklat élan qilip, bultur bir yil ichide dunyadiki 50 tin artuq dölette yüz bergen axbarat erkinlikige a'it mesililerni yeni metbu'atni kontrol qilish we basturush, metbu'atqa tehdit we hujum qilish qatarliq weqelerni bir ‏- birlep otturigha qoyghan.

Muxbirlargha ziyan yetküzüsh yenila éghir

Bultur bir yil ichide 47 neper muxbir hayatidin ayrilghan muxbirlarni qoghdash komitétining yilliq doklatidin melum bolushiche, bultur bir yil ichide, dunyada 125 neper muxbir qolgha élin'ghan hemde 47 neper muxbir bashqilar teripidin öltürülgen. Gerche bultur ölgen muxbirlarning sani ilgiriki yildikidin azraq bolghan bolsimu, ularning köp sandikisi qatillar teripidin qest qilip öltürülgen. Hemde 90% qatilgha ta hazirghiche jaza bérilmigen.

Mezkur doklatta körsitilishiche, muxbirlarni qestlep öltürüsh weqeliri liwan, liwiye we iraq qatarliq döletlerde köprek yüz bergen bolup, ottura sherqning metbu'at saheside zor özgirishlerni keltürüp chiqarghan. Bolupmu iraqta, bultur bir yil ichide 22 neper muxbir bashqilar teripidin öltürülgen. Mezkur doklatta latin amérikidiki metbu'at we muxbirlarning teqdiri heqqidimu toxtalghan. Mesilen, méksika, kolumbiye we braziliye qatarliq jaylarda qatilliq délosi bekmu ewj élip ketken. Hökümet orunliri bu xil délolarni bir terep qilishta keskin bolalmighan.

Xitay, metbu'atni eng qattiq kontrol qilghan döletlerning biri

Merkizi nyuyorktiki muxbirlarni qoghdash komitéti élan qilghan yilliq doklatida, xitaydiki metbu'at mesilisi heqqide alahide toxtalghan bolup, " xitay, dunya boyiche metbu'atni eng qattiq kontrol qilghan dölet bolup hésablinidu hemde bultur bir yil ichide, xitayda jemi 32 neper muxbir qolgha élin'ghan" dep körsetken.

Ötken hepte, xitay tashqi ishlar ministérliqining bayanatchisi chin gang xitay hökümitining intérnét tor betlirini ishlitish mesiliside zor cheklimilerni qoyuwatqanliqigha nurghun bahanilerni körsitip, xitaydiki intérnét tor betliri " nahayiti normal we saghlam halda tereqqi qiliwatidu " dep tekitligen.

Muxbirlarni qoghdash komitéti élan qilghan doklatta yene afriqidiki metbu'at mesilisimu otturigha qoyulghan bolup, mezkur rayonda 15 neper muxbirning türmige tashlan'ghanliqi we 13 neper muxbirning qolgha élin'ghanliqi melum qilin'ghan.

Mezkur doklatta rusiye, qazaqistan, we özbékistan qatarliq döletlerdiki musteqil melumat bérish xizmetlirining zor tosalghu we buzghunchiliqlargha duch kéliwatqanliqi hemde mezkur döletlerdiki dölet rehberlirining térrorluqni bahane qilip, metbu'at siyasitide qattiq qolluq qiliwatqanliqi otturigha qoyulghan. Shuning bilen bir waqitta, mezkur doklatta yene, metbu'at erkinliki heqqidiki bir qisim xosh -xewerlermu melum qilin'ghan.

Mesilen, bérmida qolgha élin'ghan muxbirlarning qoyup bérilgenliki, filippin hökümitining muxbirlarni öltürüsh qatilliq délolirini bir terep qiliwatqanliqi we shundaqla asiyadiki bir qisim rayonlarda axbarat erkinlikining bir qeder ilgiri sürülüwatqanliqi qatarliqlar alahide otturigha qoyulghan. (Méhriban)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet