Gérmaniye muxter tiliwaldini xitaygha qayturdi

• Ixtiyari muxbirimiz ekremning bu heqtiki melumati
• Download story audio

Bügün 7 – ayning 13 – küni, gérmaniye hökümiti muxter tiliwaldi isimlik bir Uyghurni xitaygha qayturdi. Muxter tiliwaldi ürümchidin bolup, 1998 – yili gérmaniyige kélip siyasiy panahliq tiligen. Hazirgha qeder gérmaniyining Meinz dégen shehride yashap kelgen.

D u q bash katipi dolqun eysa ependining bergen melumatigha asaslan'ghanda, muxter tiliwaldining siyasiy panahliq telipi izchil ret bolup kelgen. Sewebi, özining siyasiy salahiyitige gérmaniye da'irlirini ishendürelmigen. Texminen 2001 – yili axirqi qétim ret kelgendin bashlap hazirgha qeder, gérmaniyide qanunsiz yashighan. Olturum ijazetnamisimu bolmighan. Gérmaniye sot mehkimilirige naraziliq erzimu yazmighan.

Bundin üch hepte ilgiri, gérmaniye saqchi da'iriliri muxter tiliwaldini tutup, uni xitaygha qaytip kétishni ret qilghanliq we hazirgha qeder nopuzsiz yashighanliq gunahi üchün turmigha solighan. Bu weqedin xewer tapqan d u q xadimliri mexsus adwukat tutup, uning xitaygha qayturulup kétishining aldini élish üchün pa'al heriket qilghan. Bu ishqa xelq'ara kechürüm teshkilati, xeter astidiki milletlerni qutquzush teshkilati we bashqa insan heqliri teshkilatlirimu ariliship, muxter tiliwaldining xitaygha qayturulup kétishning aldini élishqa ortaq küch chiqarghan. Emma gérmaniye sot mehkimisining axirqi qararini özgertish mumkin bolmighan.

Muxter tiliwaldi bügün gérmaniye waqti sa'et 12 bilen ikki neper gérmaniye saqchisining nazaritide ayrupilan bilen béyjinggha yolgha séln'ghan.

Muxter tiliwaldining adwokatining éytishiche, uning xitaygha qayturulishining aldini élish üchün qollinish mumkin bolghan eng axirqi chare gérmaniye pirézdéntining yaki parlaméntining mexsus siyaset belgilep chiqarghan qararigha érishish iken. Emma nöwette buning mümkinchiliki yoq iken.

Bu heqtiki tepsili melumatlarni, gérmaniyidiki ixtiyari muxbirimiz ekremdin anglang.