Хитай, японийигә қарши намайишқа четилған 16 кишини қолға алди
2005.04.26
Америкида чиқидиған "вашингтон почта гезити" дә елан қилинған хәвәрдә мәлум болушичә, хитай даирилири бу кишиләрниң йәнә 1 - май әмгәкчиләр байрими күнидиму японийигә қарши намайиш уюштурушни пиланлиғанлиқини билдүргән. Хитайниң "яңзи кәчлик гезити" буларниң арисидики 20 яшлиқ шя фамилилик бир яшниң интернеттә хитайдики һәр қайси оқуғучиларни 1 - май күни японийигә қарши намайиш елип беришқа чақирғанлиқини хәвәр қилған. Шундақла у интернеттә һәтта намайиш җәрянида партлаш вәқәси садир қилиш тоғрисидиму сөз қилған.
"Мән бирнемә дейәлмәймән"
Хәвәрдә мәлум болушичә, сақчи даирилири өткән пәйшәнбә күни яңҗудики бир интернет торханисида шя фамилик бу яшни қолға алған һәмдә һазирғичә буниңға четилған 40 нәччә кишини сорақ қилип, уларниң арисидики 16 сини рәсмий қолға алған.
Бу мунасивәт билән биз яңҗу шәһәрлик сақчи идарисиға телефон қилдуқ. Әмма бу йәрдики нөвәтчи хадим өзиниң бу һәқтә бир немә дийәлмәйдиғанлиқини ейтип, бизниң әтә қайта телефон қилип интернетни тәкшүрүш бөлүмидики хадимлар билән сөзлишишимизни билдүрди.
Җяңсу өлкилик җамаәт хәвпсизлик идариси бу һәқтә елан қилған баянатида, хәлқниң вәтәнпәрвәрлик роһини толуқ чүшинидиғанлиқини, әмма намайишниң чоқум җамаәт хәвпсизлик идарилириниң тәстиқини алған асаста қанунлуқ елип берилиши керәкликини билдүргән. Шундақла җ х идарилири йәнә, хәлқниң өз алдиға намайиш орунлаштурмаслиқи һәмдә интенеттә яки қол телефонда болсун намайиш қилишқа қутритидиған һәр қандақ чақириқларға ишәнмәслики керәкликини тәләп қилди.
Охшаш болмиған һессият
- Бу ишларға мән анчә қиззиқмаймән. -Сиз һазир нәнҗиңдики чоң қирғинчилиққа қарита қандақ һесятта боливатисиз. -Адәттикидәк. Өткән иш өтти, униңға саливат әмди. -Сизниң әтрапиңизда сиздәк ойлайдиғанлар көпму? -хели көп. У дегән өтүп кәткән иш әмәсму. Мениңчә өч сақлаш яхши иш әмәс. Биз йәнә бир нәнҗиңлиқ пуқрадин өзиниң бу хилдики намайишларға қатнишишни халайдиған яки халимайдиғанлиқини сориғинимизда, у мундақ дәп җаваб бәрди. -Мән шәхсән өзәмни ейтсам, қатнишшим мумкин. -Сиз һазир нәнҗиң чоң қирғичилиқини ойлисиңиз қандақ һессиятта болисиз? -өчмәнликим қозғилиду. -Әтрапиңизда сиздәк һессиятта боливатқанлар көпму? -һәә, көп. Хитай һөкүмитиниң әндишиси
Интенеттә чиқидиған " чоң пайдилиниш гезити" ниң баш муһәррири ли хоңкуән, әсли хитайниң асасий қанунида, кишиләрниң намайиш уюштуруш һоқуқиға игә икәнликини, әмма хитай асаслиқи намайишни контрол қилалмаслиқтин әндишә қилғанлиқи үчүн, кишиләрни намайишқа чиқмаслиқини үндәйдиғанлиқини билдүрди.
" Хитай һөкүмитиниң нуқтинәзиридин чиқиш қилғанда, хитай асаслиқи намайиш һәрикәтлириниң контроллуқини йоқутушидин әндишә қилиду".
Ли хоңкуән сөзидә йәнә, хитай һөкүмитиниң бир тәрәптин амминиң намайиши арқилиқ японийә һөкүмитигә бесим ишлитишни халиса, йәнә бир тәрәптин, намайишниң ахириға барғанда шәклини өзгәртип, хитайдики кәмбәғәлләр вә байлар оттурисидики пәрқ вә чирикликкә охшаш дөләт ичи мәсилилирини нишанлап қелиштин әндишә қилидиғанлиқини билдүрди. (Пәридә)