Xitay, yaponiyige qarshi namayishqa chétilghan 16 kishini qolgha aldi

• Muxbirimiz peridening bu heqtiki programmisi
• Download story audio

Amérikida chiqidighan "washin'gton pochta géziti" de élan qilin'ghan xewerde melum bolushiche, xitay da'iriliri bu kishilerning yene 1 - may emgekchiler bayrimi künidimu yaponiyige qarshi namayish uyushturushni pilanlighanliqini bildürgen. Xitayning "yangzi kechlik géziti" bularning arisidiki 20 yashliq shya famililik bir yashning intérnétte xitaydiki her qaysi oqughuchilarni 1 - may küni yaponiyige qarshi namayish élip bérishqa chaqirghanliqini xewer qilghan. Shundaqla u intérnétte hetta namayish jeryanida partlash weqesi sadir qilish toghrisidimu söz qilghan.

"Men birnéme déyelmeymen"

Xewerde melum bolushiche, saqchi da'iriliri ötken peyshenbe küni yangjudiki bir intérnét torxanisida shya familik bu yashni qolgha alghan hemde hazirghiche buninggha chétilghan 40 nechche kishini soraq qilip, ularning arisidiki 16 sini resmiy qolgha alghan.

Bu munasiwet bilen biz yangju sheherlik saqchi idarisigha téléfon qilduq. Emma bu yerdiki nöwetchi xadim özining bu heqte bir néme diyelmeydighanliqini éytip, bizning ete qayta téléfon qilip intérnétni tekshürüsh bölümidiki xadimlar bilen sözlishishimizni bildürdi.

Jyangsu ölkilik jama'et xewpsizlik idarisi bu heqte élan qilghan bayanatida, xelqning wetenperwerlik rohini toluq chüshinidighanliqini, emma namayishning choqum jama'et xewpsizlik idarilirining testiqini alghan asasta qanunluq élip bérilishi kéreklikini bildürgen. Shundaqla j x idariliri yene, xelqning öz aldigha namayish orunlashturmasliqi hemde inténétte yaki qol téléfonda bolsun namayish qilishqa qutritidighan her qandaq chaqiriqlargha ishenmesliki kéreklikini telep qildi.

Oxshash bolmighan héssiyat

- Bu ishlargha men anche qizziqmaymen. -Siz hazir nenjingdiki chong qirghinchiliqqa qarita qandaq hésyatta boliwatisiz. -Adettikidek. Ötken ish ötti, uninggha saliwat emdi. -Sizning etrapingizda sizdek oylaydighanlar köpmu? -xéli köp. U dégen ötüp ketken ish emesmu. Méningche öch saqlash yaxshi ish emes. Biz yene bir nenjingliq puqradin özining bu xildiki namayishlargha qatnishishni xalaydighan yaki xalimaydighanliqini sorighinimizda, u mundaq dep jawab berdi. -Men shexsen özemni éytsam, qatnishshim mumkin. -Siz hazir nenjing chong qirghichiliqini oylisingiz qandaq héssiyatta bolisiz? -öchmenlikim qozghilidu. -Etrapingizda sizdek héssiyatta boliwatqanlar köpmu? -he'e, köp. Xitay hökümitining endishisi

Inténétte chiqidighan " chong paydilinish géziti" ning bash muherriri li xongku'en, esli xitayning asasiy qanunida, kishilerning namayish uyushturush hoquqigha ige ikenlikini, emma xitay asasliqi namayishni kontrol qilalmasliqtin endishe qilghanliqi üchün, kishilerni namayishqa chiqmasliqini ündeydighanliqini bildürdi.

" Xitay hökümitining nuqtineziridin chiqish qilghanda, xitay asasliqi namayish heriketlirining kontrolluqini yoqutushidin endishe qilidu".

Li xongku'en sözide yene, xitay hökümitining bir tereptin ammining namayishi arqiliq yaponiye hökümitige bésim ishlitishni xalisa, yene bir tereptin, namayishning axirigha barghanda sheklini özgertip, xitaydiki kembegheller we baylar otturisidiki perq we chiriklikke oxshash dölet ichi mesililirini nishanlap qélishtin endishe qilidighanliqini bildürdi. (Peride)