Канаданиң ванкувер шәһридә тибәт хәлқи билән намайиш


2007.03.12

10- Март күни тибәт қозғилиңиниң 48 йиллиқи мунасивити билән канаданиң ванкувер шәһридә, хитай даирлиригә қарши наразилиқ намайиши өткүзүлди. Бир нәчә саәт давам қилған бу намайишқа инсан һәқлири тәшкилатлириниң вәкиллири, һөкүмәт хадимлири, парламент әзалири вә канададики аммивий тәшкилатниң вәкиллири қатнашқан болуп, уйғур вәкиллириму бу намайиш сепидин йәр алди. Хитай консули алдида өткүзүлгән намайишта, уйғур вәкили сөз қилиш пурситигә еришти. Бу намайишта тибәткә мустәқиллиқ, шәрқи түркистанға мустәқиллиқ дегәндәк шоарлар товланди.

Канаданиң тинч окян қирғиқиға җайлашқан ванкувер шәһиригә уйғурларниң йәрләшкинигә 15 йил болуп қалди. Хитайлар мәркәзлик олтурақлашқан вә хитайниң тәсири күчлүк болған бу шәһәрдә буниңдин илгири уйғурлар тәрипидин хитай һөкүмитигә қарши наразилиқ паалийәтлири елип берилмиған болуп, пәқәт бу йил 2-айниң 5-күни бу шәһәрдики уйғурлар ғулҗа қирғинчилиқиниң 10 йиллиқи мунасивити билән тунҗи қетим наразилиқ намайиши өткүзгәниди. 10-Март күнидики намайиш ванкувердики уйғурларниң хитай һөкүмитигә қарши елип барған 2- қетимлиқ сияси паалийити болуп һесаблиниду. Канаданиң иккинчи чоң шәһири болған ванкуверда 150 әтрапида уйғур аилиси яшайду.

Биз бу мунасивәт билән ванкуверда олтурушлуқ уйғур сияси паалийәтчи өмәрҗан әпәндини зиярәт қилғинимизда у бу қетимқи намайишниң орунлаштурулуш сәвәблири, намайишта товланған шоарлар, бу қетимқи намайиш җәрянида өзиниң сөз қилиш пурситигә әришкәнликини вә демократик дөләтләрдә яшаватқан уйғурларниң, хитайниң бастуруш сиясәтлиригә қарши наразилиқ паалийәтлири елип беришиниң уларниң қануни һоқуқи вә виҗдани бурчи икәнликини баян қилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.