Xu jintawning shwétsiye ziyariti namayishqa duch keldi

• Muxbirimiz yalqunning bu heqtiki toluq melumati
• Download story audio

Xitay re'isi xujintawning shwétsiye ziyariti munasiwiti bilen xelq'araliq teshkilat bolghan xitaydiki insan heqliri teshkilati shwétsiye shöbisining orunlashturushi bilen 6 ‏- ayning7- küni yeni xu jintawning shiwétsiyege kélish harpisida shwétsiye hökümitige bésim qilish üchün xitay hökümitige qarshi keng kölemlik namayish uyushturdi.

Namayishqa qatnashqan teshkilatlar

Namayishqa, xitaydiki insan heqliri teshkilati shwétsiye shöbisidin bashqa yene, shwétsiye Uyghur komitéti, shwétsiye mongghul komitéti, shwétsiye tibet komitéti, xitay démokratliri we falun'gong teshkilati qatnashti.

Bügünki bu namayishta herqaysi teshkilatlarning wekilliri söz qilip, öz teshwiq waraqlirini tarqatti. Bulardin sirt shwétsiye parlaméntidiki partiyilerdin yéshillar partiyisi, xelq libérallar partiyisi, séntér partiyis, sotsiyal démokratlar partiyisi qatarliq bir qisim partiyilerning parlamént ezaliri sözge chiqip, xitayning -insan heqliri ehwaligha da'ir doklatlarni berdi we shwétsiye hökümitini xitay re'isi xujintaw bilen sözleshkende choqum xitaydiki insan heqliri ehwalini tenqid qilish kéreklikini tekitlidi.

Shwétsiye parlamént ezasi b silsiye xanimning sözi

Shwétsiye parlaméntidiki xelq partiyisidin bolghan parlamént ezasi b silsiye xanim shwétsiye parlaméntidiki Uyghur mesilisige köngül bölidighan yene bir parlamént ezasi bolup, u bügünki sözide mundaq deydu: ¨xitay dunyadiki eng chong diktator dölet, u yerde puqralarning héchqandaq erkinliki mewjut emes, hemme nerse kommunistik partiye teripidin bashqurulidu. Hetta kishilerni kommunistik partiye némini oylighan bolsa shuni oylashqa mejbur qilidu. U yerde yilda nechche ming kishi bigunah halda héchqandaq adil sot tertipi bolmighan ehwalda türmilerde yatidu. Naheq éghir emgeklerge sélinidu. Puqralarning uchurlardin paydilinish erkinliki qattiq cheklen'gen. Kishiler xalighanche intérnét uchurliridin yaki intérnét alaqiliridin paydilinalmaydu."

B silsiye xanim yene, "u yerde -Uyghurgha oxshash étnik milletler xitay hökümitining zerbe bérish nishani bolup qalghan. Uyghurlarning öz tilidin,medeniyitidin paydilinish yaki ularni tereqqi qildurush hoquqi yoq," dédi.

Namayish jeryanida silsiye xanim ziyaritimizni qubul qilip, gerche özining Uyghurlar heqqide köp melumati bolmisimu, emma shwétsiye parlaméntida bashqilar bilen birliship Uyghur mesilisini kötirip chiqishqa tirishiwatqanliqini bildürdi. (Yalqun)