Xitayning namratliq ölchimi qattiq tenqidke uchrimaqta

• Muxbirimiz méhribanning bu heqtiki toluq melumati
• Download story audio

Yéqinda xitayning yuqiri derijilik emeldarlirining ashkarilishiche, hazir xitayda 100 milyondin artuq namrat xelq hökümet teripidin bérilidighan héchqandaq yardemge érishelmigen shundaqla xitayda hazir namratliq ölchimidin töwen qatlamda yashawatqanlar sani23 milyondin ashqan.

Xitayning ölchimi xelq'ara ölchemdin köp töwen

Xitay hökümitining namratlargha bolghan ölchimi boyiche, yilliq kirimi 680 yü'endin töwen bolghanlar namratlar qatarigha kiridiken. Yéqinda xitayning yuqiri derijilik bir emeldari xitay hökümiti teripidin békitilgen bu ölchemning xelq'ara ölchemdin bekla yiraq ikenlikini tekitlep, mezkur ölchemni melum derijide yuqiri kötürüsh kéreklikini otturigha qoydi. Xitay hökümitining yuqiri derijilik bu emeldari yene gerche xitay hökümiti namratliq ölchimini hazirqidin örletken halettimu, az dégende yene 130 milyon'gha yéqin kishi meyli yémek - ichmek jehette bolsun, yaki kiyim -kéchek jehette bolsun hökümetning qutquzush puligha mohtaj bolidiken.

Amérikidiki xitay ishliri tor bétining mes'uli wu fen ependi xitay hökümitining namratlar heqqide békitken ölchimini qattiq tenqidlep, " yilliq kirimi 680 yü'en bolghan kishilerni xitaydek bir dölette namratlar qatarida emes, belki héchnémisi yoq tilemchiler qatarida hésablash kérek. Chünki bu pul bilen jan baqqanlar künige bir jing gürüchtin bashqa héch nersige érishelmeydu. Ular üchün élip éytqanda, tok, su, kiyim ‏-kéchek, ma'arip, dawalinish, dégendek jehetlerdin éghiz échish mumkin emes. Ular kembeghelliktin yashiyalmighudek derijige yetken. Shunga biz ularni namrat démey, tilemchi yaki qelender dések bolidu" dep bildürdi.

Xitay hökümiti teripidin bérilgen munasiwetlik melumatlarda körsitilishiche, hazir xitaydiki namratlarning asasiy qismi gherbi we shimaliy rayonlargha jaylashqan shundaqla taghliq rayonlardiki yéza ‏- igilik tereqqiyati arqida qalghan jaylarda bolghan.

Uyghur élining ehwali téximu éghir

Radi'omizning heqsiz léniyisige kéliwatqan téléfonlardin melum bolushiche, Uyghur élining jenubiy rayonidiki bir qisim yézilarda, turmush ehwali bir qeder yaxshi dep hésablan'ghan déhqanlarning yilliq kirimi aran 1000 yü'en etrapida bolup, köp sandiki déhqanlar her yili dégidek hökümetke qerz bolup qalidiken shundaqla hökümetning qutquzush puligha moxtaj bolghan déhqanlar mu xéli köp sanni igileydiken.

Köpligen analizchilar "xitay iqtisadining tereqqiy qilishi bilen, xitaydiki namratlar sanimu barghanséri köpeygen hetta sheherlerdimu namratlar mesilisi éghir bir ijtima'iy mesilige aylan'ghan" dep körsetmekte. Ular yene " bundaq bolushtiki seweb, yéqinqi yillardin buyan, xitay hökümiti peqet dölet kadirliri bilen herbiylerningla ma'ashini östürüp, töwen qatlamdiki xelqning turmush ehwali bilen kari bolmaywatqanliqidin" dep bildürmekte.

Radi'omizning ziyaritini qobul qilghan obzorchi sidiq haji ependi bu heqte toxtilip, qarashlirini otturigha qoydi.

Xitay hökümitining namratlar üchün békitken ölchimide, yillardin buyan özgirip turghan bolup, 1990 ‏- yili yilliq kirimi 300 yü'endin töwen bolghanlar, 1996 ‏- yili yilliq kirimi 640 yü'endin töwen bolghanlar, hazir bolsa yilliq kirimi 680 yü'endin töwen bolghanlar dep békitilgen. (Méhriban)