Үрүмчидә гөшниң баһаси әслигә кәлди


2005-03-11
Share

9 - Март күни, үрүмчидә қой һәм кала гөши баһаси бир күн ичидә 70, 80٪ өрләп, он йилдин буянқи әң юқири баһаға чиққан.

Үрүмчидин игилишимизчә чаршәнбә күни, үрүмчидики үч чоң қушханидики қассапларниң, базар башқуруш тармақлириниң баҗни өрлитивалғанлиқиға наразилиқ билдүрүп бир күн иш ташлиши, үрүмчидики бу гөш баһасиниң өрлишигә сәвәб болған.

10 - Марттин башлап, баҗ орунлири қассапларниң пикрини ойлишидиғанлиқини билдүрүшкәндин кейин, иш ташлиған қассаплар қайта иш башлиған болуп, үрүмчидә гөшниң баһаси 11 - март күни асасий җәһәттин әсли баһасиға қайтқан. Йәни қой гөшиниң келоси 14 йерим юәнгә, кала гөшиниң 16 юәнгә чүшкән. Әмма қассапларниң бир күн иш ташлиши уларниң бир күнлүк киримигә зиян көрситипла қалмай, истималчиларғиму еғир тәсир көрсәткән.

Үрүмчидики һазирқи әң чоң қушхана болған тйәнйиң қушханисидики қассаплардин игә болишимизчә, үрүмчи ат чаптуруш мәйданидики мусулманлар қушханиси өткән йили өктәбирдә тақалғандин кейин, у җайдики қассаплар тйәнйиң, хвалиң һәм шисән қушханилириға бөлүнүп иш башлиған болуп, нөвәттә қушханилар тарқақ болғачқа херидарлар азлап, бу үч қушханилар тақилип қалмисиму, тиҗаритини аран дигәндә елип кетиватқан икән.

Түзүмгә хилап баҗ йиғиш

Уйғур ели йәрлик баҗ идариси 2003 - йили 6 - айдин тартип қассаплардин елинидиған мал союш беҗини бикар қилған болсиму, әмма бу үч қушханиниң йәрлик баҗ тармақлири мал сойғучилардин баҗ елишни тохтатмиған.

Шундақла бу арида, башқа мунасивәтлик базар башқуруш, тазилиқ тәкшүрүш, сүпәт тәкшүрүш орунлириму қассаплардин алидиған һәқләрни юқирилатқан. Бу қалаймиған баҗ селиқлар, йеңи қушханиларда әмдила иш башлиған уйғур қассапларниң наразилиқини қозғиған, буниң билән уларниң колликтип иш ташлаш вәқәси һәм келип чиққан.

Гөш баһаси қайта нормаллашти

Тийәнйиң қушханисида тиҗарәт қиливатқан бир уйғур қассап зияритимизни қобул қилип, қассапларниң қайта мал союшқа башлиғанлиқи һәмдә гөш баһасиниң турақлашқанлиқини ейтти.

11 - Март тәңритағ тор бетидә бу һәқтә берилгән хәвәрдә көрситилишичә, қассапларниң иш ташлап бир күн мал соймиғанлиқи һәмдә гөш баһасиниң өрләп кетиши билән, 10 - март пәйшәнбә күни үрүмчи, санҗи, һәмдә фукаңниң сода санаәт башқуруш тармақлири мәзкур вәқә үстидин тәкшүрүш елип барған.

Улар үрүмчидики тйәнйиң, хвалиң һәмдә шисәндики қушханиларда елип барған тәкшүришидин кейин баҗ тармақлириниң улардин мал союш беҗи алмиған бәлки һәр бир тиҗарәтчидин муқим базар һәққи алғанлиқини билдүргән.

Һәр хил һәқләр өрлигән

Әмма зияритимизни қобул қилған қассаплар, баҗ тармақлиридин башқа қушханидики мунасивәтлик башқуруш орунлириниңму қассаплардин алидиған һәр хил һәқләрни өстүривалғанлиқини билдүрди.

Үрүмчи сода тәрәққият идариси нөвәттә, үрүмчи шәһәрлик һөкүмәткә шәхси кирим беҗини тәңшәш һәққидә доклат сунған. (Гүлчеһрә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт