Ürümchide göshning bahasi eslige keldi


2005-03-11
Share

9 - Mart küni, ürümchide qoy hem kala göshi bahasi bir kün ichide 70, 80٪ örlep, on yildin buyanqi eng yuqiri bahagha chiqqan.

Ürümchidin igilishimizche charshenbe küni, ürümchidiki üch chong qushxanidiki qassaplarning, bazar bashqurush tarmaqlirining bajni örlitiwalghanliqigha naraziliq bildürüp bir kün ish tashlishi, ürümchidiki bu gösh bahasining örlishige seweb bolghan.

10 - Marttin bashlap, baj orunliri qassaplarning pikrini oylishidighanliqini bildürüshkendin kéyin, ish tashlighan qassaplar qayta ish bashlighan bolup, ürümchide göshning bahasi 11 - mart küni asasiy jehettin esli bahasigha qaytqan. Yeni qoy göshining kélosi 14 yérim yu'en'ge, kala göshining 16 yu'en'ge chüshken. Emma qassaplarning bir kün ish tashlishi ularning bir künlük kirimige ziyan körsitipla qalmay, istimalchilarghimu éghir tesir körsetken.

Ürümchidiki hazirqi eng chong qushxana bolghan tyenying qushxanisidiki qassaplardin ige bolishimizche, ürümchi at chapturush meydanidiki musulmanlar qushxanisi ötken yili öktebirde taqalghandin kéyin, u jaydiki qassaplar tyenying, xwaling hem shisen qushxanilirigha bölünüp ish bashlighan bolup, nöwette qushxanilar tarqaq bolghachqa xéridarlar azlap, bu üch qushxanilar taqilip qalmisimu, tijaritini aran digende élip kétiwatqan iken.

Tüzümge xilap baj yighish

Uyghur éli yerlik baj idarisi 2003 - yili 6 - aydin tartip qassaplardin élinidighan mal soyush béjini bikar qilghan bolsimu, emma bu üch qushxanining yerlik baj tarmaqliri mal soyghuchilardin baj élishni toxtatmighan.

Shundaqla bu arida, bashqa munasiwetlik bazar bashqurush, taziliq tekshürüsh, süpet tekshürüsh orunlirimu qassaplardin alidighan heqlerni yuqirilatqan. Bu qalaymighan baj séliqlar, yéngi qushxanilarda emdila ish bashlighan Uyghur qassaplarning naraziliqini qozghighan, buning bilen ularning kolliktip ish tashlash weqesi hem kélip chiqqan.

Gösh bahasi qayta normallashti

Tiyenying qushxanisida tijaret qiliwatqan bir Uyghur qassap ziyaritimizni qobul qilip, qassaplarning qayta mal soyushqa bashlighanliqi hemde gösh bahasining turaqlashqanliqini éytti.

11 - Mart tengritagh tor bétide bu heqte bérilgen xewerde körsitilishiche, qassaplarning ish tashlap bir kün mal soymighanliqi hemde gösh bahasining örlep kétishi bilen, 10 - mart peyshenbe küni ürümchi, sanji, hemde fukangning soda sana'et bashqurush tarmaqliri mezkur weqe üstidin tekshürüsh élip barghan.

Ular ürümchidiki tyenying, xwaling hemde shisendiki qushxanilarda élip barghan tekshürishidin kéyin baj tarmaqlirining ulardin mal soyush béji almighan belki her bir tijaretchidin muqim bazar heqqi alghanliqini bildürgen.

Her xil heqler örligen

Emma ziyaritimizni qobul qilghan qassaplar, baj tarmaqliridin bashqa qushxanidiki munasiwetlik bashqurush orunliriningmu qassaplardin alidighan her xil heqlerni östüriwalghanliqini bildürdi.

Ürümchi soda tereqqiyat idarisi nöwette, ürümchi sheherlik hökümetke shexsi kirim béjini tengshesh heqqide doklat sun'ghan. (Gülchéhre)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet