Норвегийидә уйғур өсмүрләр үчүн милли тәлим – тәрбийә синиплири ечилди


2006-08-03
Share

Һәммимизгә мәлум болғинидәк , ана тил бир милләтниң әң рошән милли хаслиқи вә милли мәвҗутлуқиниң айрилмас бир қисмидур. Шуңа ана тилимизни қоғдаш милләтниң һәр бир әзасиниң баш тартип болмас милли бурчи вә мәҗбурийити һесаблиниду.

Нөвәттә чәтәлләрдә яшаватқан уйғурлар ,өсүп йетиливатқан пәрзәнтлириниң ана тилимизни унтуши, шуниңдәк,дин вә милли өрп-адәтлиримиздин йирақлишиштәк ортақ бир мәсилигә дуч кәлмәктә һәмдә буниңдин сақлинишниң үнүмлүк чарилири үстидә издәнмәктә. Йеқинқи йиллардин буян норвегийигә келип йәрлишиватқан уйғурларниң саниниң көпийишигә әгишип бу дөләттики уйғурларму бу хил мәсилигә дуч кәлгән. Чүнки һазир норвегийидә яшаватқан уйғурларниң ичидә кичик балилар вә техи қорамиға йәтмигән өсмүрләрниң санила 100 дин ашиду. Булар балилар бағчилири вә мәктәпләрдә йәрлик балилар билән биргә оқуш вә ойнаш давамида, улар билән күн бойи норвегийә тилида алақилишидан болғачқа, вақитниң өтиши билән, буларниң бәзилири уйғурчә сөзлийәлмәйдиған йәнә бәзилири өз мәқситини уйғурчә раван уқтуруп берәлмәйдиған яки болмиса уйғурчини бузуп сөзләйдиған бир вәзийәт шәкиллинишкә башлиған.

Униңдин сирт балиларниң сиртқи муһитниң тәсиридә динимизға, милли өрп – адәтлиримизгә ят адәт вә қилиқларни тизла юқтурвәлишиму ата – аниларни хатирҗәмсиз қилип, җамаәтчилик арисида ана тил вә милли әнәнә тәрбийисини йолға қоюш һәққидә тәләпләр оттуриға чиқишқа башлиған.

Норвегийә уйғур комитети мушу хил зөрүрийәт вә ата – аниларниң җидди тәлипини нәзәрдә тутуп, бу йил әтияз өз қармиғида милли тәлим – тәрбийә бөлүми тәсис қилип диний тәрбийичи керәм қаримни бөлүм мәсуллиқиға тәйинлигән иди.

Йеқинда норвегийиниң уйғурлар бирқәдәр топлишип олтурақлашқан бергин вә ставангир шәһәрлиридә арқа – арқидин милли тәлим – тәрбийә синиплири ечилип рәсмий иш башлиди. Тәлим – тәрбийә синиплириниң бергиндики мәсуллиқини норвегийә уйғур комитети милли тәлим – тәрбийә бөлүминиң мәсули керим қарим, ставангирдики мәсуллуқини норвегийә уйғур комитетиниң ставангир райониға мәсул муавин рәиси еляр һаҗим өз үстилиригә алған болуп, бәш яштин тартип 18 яшқичә болған уйғур балилири һәр йәкшәнбә күни бир йәргә җәм болуп, йеши вә сәвийисигә қарап ана тил, тарих вә дини илимләр бойичә дәрс елишқа башлиған.

Илгири уйғур балиларниң өз-ара бир –бири билән учришиш пурсити кәм иди, милли тәлим – тәрбийә синиплириниң ечилиши билән улар һәр һәптидә бир йәргә җәм болуп, озара тонушуш вә өз ана тилида сөзлишиш пурситигә еришкән, бу әһвал ата – аниларниму, пәрзәнтләрниму интайин хошал қилған.

Игилишимизчә,бу хил тәлим – тәрбийә синиплири норвегийиниң уйғурлар топлишип олтурақлашқан осло вә башқа җайлиридиму пат йеқинда ечилмақчи икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт