Norwégiyide Uyghur ösmürler üchün milli telim – terbiye sinipliri échildi


2006-08-03
Share

Hemmimizge melum bolghinidek , ana til bir milletning eng roshen milli xasliqi we milli mewjutluqining ayrilmas bir qismidur. Shunga ana tilimizni qoghdash milletning her bir ezasining bash tartip bolmas milli burchi we mejburiyiti hésablinidu.

Nöwette chet'ellerde yashawatqan Uyghurlar ,ösüp yétiliwatqan perzentlirining ana tilimizni untushi, shuningdek,din we milli örp-adetlirimizdin yiraqlishishtek ortaq bir mesilige duch kelmekte hemde buningdin saqlinishning ünümlük chariliri üstide izdenmekte. Yéqinqi yillardin buyan norwégiyige kélip yerlishiwatqan Uyghurlarning sanining köpiyishige egiship bu dölettiki Uyghurlarmu bu xil mesilige duch kelgen. Chünki hazir norwégiyide yashawatqan Uyghurlarning ichide kichik balilar we téxi qoramigha yetmigen ösmürlerning sanila 100 din ashidu. Bular balilar baghchiliri we mekteplerde yerlik balilar bilen birge oqush we oynash dawamida, ular bilen kün boyi norwégiye tilida alaqilishidan bolghachqa, waqitning ötishi bilen, bularning beziliri Uyghurche sözliyelmeydighan yene beziliri öz meqsitini Uyghurche rawan uqturup bérelmeydighan yaki bolmisa Uyghurchini buzup sözleydighan bir weziyet shekillinishke bashlighan.

Uningdin sirt balilarning sirtqi muhitning tesiride dinimizgha, milli örp – adetlirimizge yat adet we qiliqlarni tizla yuqturwelishimu ata – anilarni xatirjemsiz qilip, jama'etchilik arisida ana til we milli en'ene terbiyisini yolgha qoyush heqqide telepler otturigha chiqishqa bashlighan.

Norwégiye Uyghur komitéti mushu xil zörüriyet we ata – anilarning jiddi telipini nezerde tutup, bu yil etiyaz öz qarmighida milli telim – terbiye bölümi tesis qilip diniy terbiyichi kérem qarimni bölüm mesulliqigha teyinligen idi.

Yéqinda norwégiyining Uyghurlar birqeder topliship olturaqlashqan bérgin we stawan'gir sheherliride arqa – arqidin milli telim – terbiye sinipliri échilip resmiy ish bashlidi. Telim – terbiye siniplirining bérgindiki mesulliqini norwégiye Uyghur komitéti milli telim – terbiye bölümining mes'uli kérim qarim, stawan'girdiki mes'ulluqini norwégiye Uyghur komitétining stawan'gir rayonigha mes'ul mu'awin re'isi élyar hajim öz üstilirige alghan bolup, besh yashtin tartip 18 yashqiche bolghan Uyghur baliliri her yekshenbe küni bir yerge jem bolup, yéshi we sewiyisige qarap ana til, tarix we dini ilimler boyiche ders élishqa bashlighan.

Ilgiri Uyghur balilarning öz-ara bir –biri bilen uchrishish pursiti kem idi, milli telim – terbiye siniplirining échilishi bilen ular her heptide bir yerge jem bolup, oz'ara tonushush we öz ana tilida sözlishish pursitige érishken, bu ehwal ata – anilarnimu, perzentlernimu intayin xoshal qilghan.

Igilishimizche,bu xil telim – terbiye sinipliri norwégiyining Uyghurlar topliship olturaqlashqan oslo we bashqa jayliridimu pat yéqinda échilmaqchi iken.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet