Нобел тинчлиқ мукапати америкиниң сабиқ муавин президенти ал горға берилди


2007-10-12
Share

Сабиқ америка муавин президенти әл гор вә бирләшкән дөләтләр тәшкилати муһит мәсилиләр комитети дуня килимати өзгириши тәтқиқат гурупписиға берилди. AFP Photo

Бу йиллиқ нобел тинчлиқ мукапати америкиниң сабиқ муавин президенти, ал горға вә бирләшкән дөләтләр тәшкилати муһит мәсилиләр комитети дуня килимати өзгириши тәтқиқат гурупписиға берилди.

Б б с радиосида нобел комитетиниң ейтқанлирини нәқил елип көрситишичә, мәзкур мукапат ал гор вә бирләшкән дөләтләр тәшкилатиниң килимат өзгириши тәтқиқат комитетиға, уларниң инсанийәт кәлтүрүп чиқарған килимат өзгиришигә қарита башқиларниң диққитини җәлп қилишта көрсәткән тиришчанлиқи вә тарқатқан учурлири үчүн берилгән икән.

" Қулайсиз һәқиқәт" намлиқ һөҗҗәтлик филими бултур оскар мукапатиға еришкән

Бу йил 59 яшқа киргән ал гор бурун бил клинтон һөкүмитидә муавин президент болуп ишлигән болуп, 2001- йили һазир вәзипә өтәватқан җорҗ буш билән президентлиқ риқабитидә йеңилип қалған иди. У шуниңдин кейин сайисидин қоли узун иҗтимаий паалийәтләр билән шуғуллинип келиватқан болуп, униң өзи баш болуп дуня һава килиматиниң өзгириши инсанийәткә елип келиши мумкин болған апәтләр һәққидә ишләп чиққан " қулайсиз һәқиқәт" дегән һөҗҗәтлик филими бултур оскар мукапатиға еришкән иди.

Ал гор мәзкур филимдә инсанийәтни дуня һава килиматидики ғәлитә өзгиришләргә нисбәтән техиму сәгәк болушқа һәйдәкчилик қилған вә илмий пакитлар арқилиқ йәр шари һава килиматида иссип кетиш һадисиси мәйданға келиватқанлиқини, әгәр бу һәқтә һазир дәрһал тәдбир елинмиса буниң кәлгүсидә инсанларға мөлчәрлигүсиз балайиапәт апәтләрни елип келидиғанлиқини шәрһлигән.

Норвегийә нобел комитети: ал гор һәққидә тохтилип "у йәр шари характерлик килимат өзгиришигә нисбәтән чоқум чарә қолланмиса болмайдиғанлиқини пүтүн дуняға һес қилдурушта әң коп һәссә қошқан адәм" деди.

Бирләшкән дөләтләр тәшкилати килимат өзгириши тәтқиқат комитетиму нобелға еришти

Бу йиллиқ нобел тинчлиқ мукапати ал гор билән бирликтә бирләшкән дөләтләр тәшкилати килимат өзгириши тәтқиқат комитетиға берилгән болуп, мәзкур комитетиниң рәиси өзиниң һәйран қалғанлиқини ипадилиди.

Һералд мунбири журнилида бирләшкән дөләтләр тәшкилати килимат өзгириши тәтқиқат комитетиниң рәиси раҗәндра пачуриниң ейтқанлирини нәқил елип көрситишичә, пачури өзиниң һәйран қалғанлиқини ипадилигән. У "мән қулиқимға ишәнмәй қалдим. Һәйран қалдим" дегән.

Бу йили бирләшкән дөләтләр тәшкилатиниң муһит өзгириш тәтқиқат комитети йәр шари характерлик иссип кетиш һәдисиси һәққидә доклат елан қилған болуп, мәзкур доклатта, 50 йилдин бери шәкиллинишкә башлиған йәр шари характерлик иссип кетиш һадисиниң 90 пирсәнтини инсанийәт кәлтүрүп чиқарған дәп көрситилгән иди.

Рабийә қадир ханим: "уйғур даваси нобел мукапати намзатлиқ босуғисиға елип келинди"

Нобел тинчлиқ мукапати уйғурлар үчүн қанчилик йирақлиқта? буниси бизгә техи намәлум. Әмма 2005-, 2006- вә 2007- йиллири уйғур миллий һәрикитиниң рәһбири рабийә қадир ханим уда үч қетим нобел тинчлиқ мукапати намзатлиқиға көрситилгән болсиму, һәр үчла қетим нобел тинчлиқ мукапати уйғурларға несип болмиди.

Уйғур миллий һәрикитиниң йетәкчиси рабийә қадир ханимниң ейтишичә, у һәр қетим нобел мукапати намзатлиқиға көрситилгәндә пүтүн дунядики тинчлиқ сөйәр кишиләрниң рабийә ханимниң нобел мукапатиға еришишни тилигәнликини, гәрчә уйғур хәлқигә бу бәхт несип болмиған болсиму, әмма өзиниң намзатлиққа көрситилиши билән уйғур давасиниң йәнә бир қетим дуня сәһнисидә тилға елинғанлиқидин өзини йәнила бәхтлик һес қилидиғанлиқини билдүрди.

У йәнә, бу нөвәтлик нобел тинчлиқ мукапатиниң ал гор әпәндигә берилгәнликидин хушал болидиғанлиқини һәм уни тәбрикләйдиғанлиқини ипадилиди.

Рабийә қадир ханим: " уйғурлар үчүн күрәш қилиш маңа берилгән нобел мукапати"

Рабийә қадир ханим өзиниң бу нөвәтлик нобел мукапатиға өзиниң еришәлмигәнликидин һечқандақ үмидсизлик һес қилмайдиғанлиқини әксичә пәхирлинидиғанлиқини оттуриға қойди.

У ахирида, өзиниң уйғурларниң кишилик һоқуқи, һөр- әркинлики үчүн күрәш қилиш имканийитигә еришкәнликини өзигә берилгән нобел мукапати дәп тонуйдиғанлиқимни билдүрди. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт