Nobél tinchliq mukapati amérikining sabiq mu'awin prézidénti al gorgha bérildi


2007-10-12
Share

Sabiq amérika mu'awin prézidénti el gor we birleshken döletler teshkilati muhit mesililer komitéti dunya kilimati özgirishi tetqiqat guruppisigha bérildi. AFP Photo

Bu yilliq nobél tinchliq mukapati amérikining sabiq mu'awin prézidénti, al gorgha we birleshken döletler teshkilati muhit mesililer komitéti dunya kilimati özgirishi tetqiqat guruppisigha bérildi.

B b s radi'osida nobél komitétining éytqanlirini neqil élip körsitishiche, mezkur mukapat al gor we birleshken döletler teshkilatining kilimat özgirishi tetqiqat komitétigha, ularning insaniyet keltürüp chiqarghan kilimat özgirishige qarita bashqilarning diqqitini jelp qilishta körsetken tirishchanliqi we tarqatqan uchurliri üchün bérilgen iken.

" Qulaysiz heqiqet" namliq höjjetlik filimi bultur oskar mukapatigha érishken

Bu yil 59 yashqa kirgen al gor burun bil klinton hökümitide mu'awin prézidént bolup ishligen bolup, 2001- yili hazir wezipe ötewatqan jorj bush bilen prézidéntliq riqabitide yéngilip qalghan idi. U shuningdin kéyin sayisidin qoli uzun ijtima'iy pa'aliyetler bilen shughullinip kéliwatqan bolup, uning özi bash bolup dunya hawa kilimatining özgirishi insaniyetke élip kélishi mumkin bolghan apetler heqqide ishlep chiqqan " qulaysiz heqiqet" dégen höjjetlik filimi bultur oskar mukapatigha érishken idi.

Al gor mezkur filimde insaniyetni dunya hawa kilimatidiki ghelite özgirishlerge nisbeten téximu segek bolushqa heydekchilik qilghan we ilmiy pakitlar arqiliq yer shari hawa kilimatida issip kétish hadisisi meydan'gha kéliwatqanliqini, eger bu heqte hazir derhal tedbir élinmisa buning kelgüside insanlargha mölcherligüsiz balayi'apet apetlerni élip kélidighanliqini sherhligen.

Norwégiye nobél komitéti: al gor heqqide toxtilip "u yer shari xaraktérlik kilimat özgirishige nisbeten choqum chare qollanmisa bolmaydighanliqini pütün dunyagha hés qildurushta eng kop hesse qoshqan adem" dédi.

Birleshken döletler teshkilati kilimat özgirishi tetqiqat komitétimu nobélgha érishti

Bu yilliq nobél tinchliq mukapati al gor bilen birlikte birleshken döletler teshkilati kilimat özgirishi tetqiqat komitétigha bérilgen bolup, mezkur komitétining re'isi özining heyran qalghanliqini ipadilidi.

Hérald munbiri zhurnilida birleshken döletler teshkilati kilimat özgirishi tetqiqat komitétining re'isi rajendra pachurining éytqanlirini neqil élip körsitishiche, pachuri özining heyran qalghanliqini ipadiligen. U "men quliqimgha ishenmey qaldim. Heyran qaldim" dégen.

Bu yili birleshken döletler teshkilatining muhit özgirish tetqiqat komitéti yer shari xaraktérlik issip kétish hedisisi heqqide doklat élan qilghan bolup, mezkur doklatta, 50 yildin béri shekillinishke bashlighan yer shari xaraktérlik issip kétish hadisining 90 pirsentini insaniyet keltürüp chiqarghan dep körsitilgen idi.

Rabiye qadir xanim: "Uyghur dawasi nobél mukapati namzatliq bosughisigha élip kélindi"

Nobél tinchliq mukapati Uyghurlar üchün qanchilik yiraqliqta? bunisi bizge téxi namelum. Emma 2005-, 2006- we 2007- yilliri Uyghur milliy herikitining rehbiri rabiye qadir xanim uda üch qétim nobél tinchliq mukapati namzatliqigha körsitilgen bolsimu, her üchla qétim nobél tinchliq mukapati Uyghurlargha nésip bolmidi.

Uyghur milliy herikitining yétekchisi rabiye qadir xanimning éytishiche, u her qétim nobél mukapati namzatliqigha körsitilgende pütün dunyadiki tinchliq söyer kishilerning rabiye xanimning nobél mukapatigha érishishni tiligenlikini, gerche Uyghur xelqige bu bext nésip bolmighan bolsimu, emma özining namzatliqqa körsitilishi bilen Uyghur dawasining yene bir qétim dunya sehniside tilgha élin'ghanliqidin özini yenila bextlik hés qilidighanliqini bildürdi.

U yene, bu nöwetlik nobél tinchliq mukapatining al gor ependige bérilgenlikidin xushal bolidighanliqini hem uni tebrikleydighanliqini ipadilidi.

Rabiye qadir xanim: " Uyghurlar üchün küresh qilish manga bérilgen nobél mukapati"

Rabiye qadir xanim özining bu nöwetlik nobél mukapatigha özining érishelmigenlikidin héchqandaq ümidsizlik hés qilmaydighanliqini eksiche pexirlinidighanliqini otturigha qoydi.

U axirida, özining Uyghurlarning kishilik hoquqi, hör- erkinliki üchün küresh qilish imkaniyitige érishkenlikini özige bérilgen nobél mukapati dep tonuydighanliqimni bildürdi. (Jüme)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet