Түркийәдики уйғурлар норуз байримини тәбриклиди

• Ихтияри мухбиримиз әркин таримниң бу һәқтики мәлумати
• Download story audio

Түркийиниң һәрқайси җайлирида норуз байрими тәнтәнилик һалда тәбрикләнди. Түркийә оттура асия түркий җумһурийәтлиридин тәклип қилинған сәнәтчиләрниң көрсәткән сәнәт номурлири билән норузни тәбриклиди, әнқәрә шәһридә өткүзүлгән бу норуз байримини тәбрикләш мурасими шәһәрдики һәрқайси чоң кочиларға қоюлған зор екранлиқ телевизийәләрдин нәқ мәйдандин көрситилди. Буниң билән бир вақитта түркийидә паалийәт елип бериватқан шәрқий түркистан тәшкилатлириму һәр хил паалийәтләрни уюштурди вә паалийәтләргә қатнашти.

Қәйсеридә паалийәт елип бериватқан шәрқий түркистан мәдәнийәт вә һәмкарлиқ җәмийити қәйсери, токат вә әнқәрә қатарлиқ шәһәрләрдә өткүзүлгән норуз паалийәтлиригә қатнишип уйғурларниң норуз әнәнилирини тонуштурди. Әнқәрәдә өткүзүлгән паалийәткә түркийә мәдәнийәт министири атилла коч вә оттура асия түркий җумһурийәтлириниң әнқәрәдә турушлуқ баш әлчилири қатнашти, уйғурларға вакалитән д у қ тәптиш һәйити әзаси һайрулла әпәнди қатнашти. Бу йәрдики паалийәт ахирлашқандин кейин шәрқий түркистан мәдәнийәт вә һәмкарлиқ җәмийити гази университетида өткүзүлгән норуз паалийитигә қатнишип уйғурлар тонуштурулған көргәзмә ачти.

Истанбул валилийқиниң уюштуруши билән норуз байримини тәбрикләш паалийити өткүзүлди. Бу паалийәткә уйғурларға вакалитән шәрқий түркистан вәхпи қатнашти.