Norwégiyide milletler ara dostluq putbol musabiqisi ötküzüldi

Putbol musabiqisi norwégiye Uyghur yashliri putbol komandisi bilen norwégiyide yashawatqan türk, tatarlardin teshkillen'gen türk -tatar birleshme komandisi, özbék komandisi we yerlik norwégiyiliklerning komandisidin ibaret 4 komanda otturisida élip bérildi. Musabiqe her bir komanda nöwet bilen bashqa üch komanda bilen musabiqilishishtek aylanma musabiqe usulida élip bérildi. Musabiqe chüsh sa'et 12 de qizghin keypiyat ichide bashlandi. Tunji meydanda norwégiye Uyghur yashlar komandisi bilen norwégiyiliklerning komandisi we türk-tatar komandisi bilen özbék komandisi oynidi. Netijide Uyghur yashlar komandisi birge qarshi ikki netije bilen norwég komandisini yengdi. Kéyinki musabiqilerde norwégiye Uyghur yashlar komandisi ayrim -ayrim halda türk-tatar komandisi we özbék komandiliri bilen oynidi. Netijide norwégiye Uyghur yashlar komandisi bashqa ikki komandini yéngip bir komanda bilen tengliship omumi nomurda mutleq üstünlük qazinip bügünki musabiqining chémpiyonluqini qazandi. Musabiqe chüshtin kéyin sa'et 5 te ghelibilik tamamlandi. Musabiqe özining kütken meqsitige yarisha, bashtin axiri dostluq, inaqliq keypiyati ichide élip bérildi. Biz bügünki bu musabiqe pa'aliyiti heqqidiki tesiratini bilip béqish üchün musabiqe tamashibinlirini ziyaret qilduq. Oslo etrapidiki ski'en shehiridin kelgen erkin ependi chet'ellerde Uyghur yashlirining putbol komandilirini teshkillesh we mushu xil musabiqilerni ötküzüshining ehmiyiti heqqide toxtaldi. Putbolchi yashlardin mirshat özining xushalliqini ipadilidi.