Нур бәкри бейҗиңдики икки чоң йиғинда хуҗинтавниң муһим йолйоруқиниң роһини аңлатқан

Бүгүн б б с ниң тор бетидә, тор әһлиниң бу икки чоң йиғин һәққидики обзорлири елан қилинди. Йәнә бәзи учур вастилири хитай коммунист партийә мәркизи комитетиниң әзаси, шинҗаң партком секретари ваң лечүәнниң икки чоң йиғинға қатнишиватқан 'шинҗаң вәкиллири' дәп аталған кишиләрни йоқлап кәлгәнликини вә уйғур аптоном район рәиси нур бәкриниң хитай коммунист партийә мәркизи комитетиниң рәиси хуҗинтавниң икки чоң йиғинға қатнишиватқан коммунист партийә вәкиллириниң мәсуллириға қилған сөзиниң роһини аңлатқанлиқини хәвәр қилди.
Мухбиримиз вәли
2010-03-05
Елхәт
Пикир
Share
Принт
Сүрәт, 2004 - йили 27 - ийул, нур бәкриниң уйғур аптоном районлуқ 3 - қетимлиқ тил - йезиқ хизмити йиғинида сөзлигән сөзидин нусха.
Сүрәт, 2004 - йили 27 - ийул, нур бәкриниң уйғур аптоном районлуқ 3 - қетимлиқ тил - йезиқ хизмити йиғинида сөзлигән сөзидин нусха.
RFA Photo / Һөҗҗәтни аңлиғучилиримиз тәминлигән.

Бейҗиңда ечиливатқан хитайниң икки чоң йиғини давам қиливатиду. Б б с тор бетидә бүгүн, бейҗиңда ечиливатқан икки чоң йиғин һәққидики җәмийәт инкаслири елан қилинди. Униңда баян қилинишичә, шенҗен шәһиридин йезилған бир обзорда ' бу қетим йәнила партийә қол полаңлитиватиду, хәлқ қурултийи қол көтүрүватиду, сиясий кеңәш чавак челиватиду, халас' дәп қәйт қилинған.

Намсиз йезилған йәнә обзорда 'икки чоң йиғинда болуватқан гәпләр ниң һәммиси коммунист партийиниң тәшвиқат материяллири, буни вәкил дегән кишиләр һәммиси ениқ билиду, уни бизму обдан билимиз, бу ваң -чуңниң өзила бир оюн, бу оюнни көрүшкә вақтимиз йоқ' дәп баян қилинған.

Шаңхәйдин йезилған бир обзорда 'бу вәкилләрниң ичидә җуңгода көп санлиқ болуватқан ишсизлар вәкили йоқ', 'бу йиғиндики һазирқи вәкилләрниң вәкиллик қиливатқини пәқәт бипәрвалиқ, әхмәқлиқ, дөтлүк, сиқинҗи вә чил бөриниң хиялидин ибарәт' дәп көрситилгән.

Ваң лечүән 'шинҗаң вәкиллири'ни йоқлап кәлгән

'Теңшүн хәвәрлири' дегән тор гезити бүгүн, бу икки чоң йиғин һәққидә елан қилған хәвиридә, хитай коммунист партийә мәркизи комитетиниң әзаси, шинҗаң партком секретари ваң лечүәнниң бейҗиңда ечиливатқан икки чоң йиғинға қатнашқан 'шинҗаң вәкиллири' дәп аталған кишиләрни йоқлап кәлгәнликини баян қилди.
 
Бу тор гезитиниң мухбири ваң шинхоң мақалисида, ваң лечүәнниң 'шинҗаң вәкиллири' дәп аталған кишиләрни йоқлиғили 'шинҗаң меһманханиси'ға кәлгәндә, қәшқәрдики һейтгаһ мәсчитиниң хатипи җүмә тайир билән ток шотисида учришип, интайин қизғин көрүшкәнлики, интайин йеқимлиқ һал - әһвал сорашқанлиқи вә хизмәтләр һәққидә тәпсили доклат аңлиғанлиқини алаһидә гәвдиләндүрүп тәсвирлиди.

Нур бәкри 'шинҗаң вәкиллири'гә хуҗинтавниң йолйоруқиниң роһини аңлатқан

'Теңшүн', 'яшин' дәп атилидиған икки тор гезити бирлишип елан қилған йәнә бир хәвәрдә, уйғур аптоном район рәиси нур бәкри бу икки чоң йиғинға қатнишиватқан 'шинҗаң вәкиллири' дәп аталған кишиләргә хитай коммунист партийә мәркизи комитетиниң рәиси хуҗинтавниң икки чоң йиғинға қатнашқан коммунист партийә вәкиллириниң мәсуллириға қилған сөзиниң роһини аңлатқанлиқини баян қилди. Әмма бу гезит нур бәкриниң аңлатмисиниң мәзмунини ашкарилимиди.

Һазир америкида туруватқан мустәқил тәтқиқатчи илшат әпәндиниң қаришичә, хуҗинтав уйғурлар үчүн яхшилиқ елип кәлгән әмәс, униң бу қетимқи йолйоруқи вә нур бәкриниң уни иҗра қилиши уйғурлар үчүн техиму еғир ақивәтләрни кәлтүрүши мумкин.

Нур бәкри 2004‏ - йили җаң земин, ваң лечуәнләрниң йолйоруқиниң роһини қандақ аңлатқан иди?

Мәлум бир киши ашкарилиған нур бәкриниң 'аптоном районлуқ 3 ‏ - қетимлиқ тил -йезиқ йиғинида сөзлигән сөзи' дегән һөҗҗәтниң фото кописигә асасланғанда, нур бәкри 2004‏ - йил 27‏ - июл күни аптоном районлуқ 3 ‏ - қетимлиқ тил -йезиқ йиғинида, сабиқ хитай коммунист партийә мәркизи комитет рәиси җаң земинниң 'тилниң раван болмаслиқи, бекинмилик, қалақлиқ аз санлиқ милләтләрниң тәрәққиятини чәклимигә учрутидиған һалқилиқ мәсилә' дегән 'йолйоруқи'ни вә хитай коммунист партийиниң уйғур аптоном район секретари ваң лечүәнниң 'асасий қатламлардики аз санлиқ милләт кадирлириниң хәнзу тилини өгиниши вә пуқта билиши интайин тәхирсиз вәзипә' дегән 'муһим йолйоруқи'ни аңлитип, уйғур тилиниң йоқитилиш тәқдири көрсәткән иди.

Нур бәкри шу қетимқи тил -йезиқ йиғинида җаң земин, ваң лечуәнләрниң 'йолйоруқиниң роһи'ни аңлатқанда, 'ну бәкриниң сөзи' дәп аталған 24 бәтлик бу һөҗҗәттики 'тил -йезиқ қоллунуш һәрби кишигә, дөләтниң бирликигә тақилиду', 'аптоном районимиз тил -йезиқ компютер техникисиға йетишәлмәйватиду', 'хәнзу тили дуняда әң йеңи күчлүк тил', 'хәнзу тилини өгәнсә йеңи яшаш усулини өгүнүп реқабәт күчини ашуриду', 'тил -йезиқ мәдәнийәт һадисиси, әмма бир милләтниң бәлгиси әмәс', 'тил -йезиқ өзиниң қанунийити буйичә, барлиққа келиш, тәрәққи қилиш, йоқулуш басқучини бесип өтиду', 'бүгүнки дуня иқтисадиниң бир гәвдилишишигә әгишип, қошулуп кетиш тарихниң асаси еқимиға айланди' дегән сөзләрни алаһидә гәвдиләндүрүш арқилиқ, уйғур аптоном районида уйғур тил - йезиқиниң йоқитилиш нишанини ениқ көрсәткән.

Учур архиплириға қариғанда, нур бәкри 1989‏ - йили шинҗаң университетиниң яшлар иттипақиниң секретари болған. Мәркизи партийә мәктипидә билим ашуруп кәлгәндин кейин, сәндоң өлкиси фейчең шәһириниң қошумчә муавен шәһәр башлиқи, қәшқәр велайитиниң муавен валийси, үрүмчи шәһириниң муавен шәһәр башлиқи, уйғур аптоном районлуқ һөкүмәтниң муавен баш катиби, аптоном районлуқ парткомниң муавен секретари болған. 2007 ‏ - Йилидин башлап уйғур аптоном районниң вакаләт рәиси вә рәиси болуп кәлмәктә.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

 
Пикирләр (0)
Share
Толуқ бәт