Nur bekri béyjingdiki ikki chong yighinda xujintawning muhim yolyoruqining rohini anglatqan

Bügün b b s ning tor bétide, tor ehlining bu ikki chong yighin heqqidiki obzorliri élan qilindi. Yene bezi uchur wastiliri xitay kommunist partiye merkizi komitétining ezasi, shinjang partkom sékrétari wang léchüenning ikki chong yighin'gha qatnishiwatqan 'shinjang wekilliri' dep atalghan kishilerni yoqlap kelgenlikini we Uyghur aptonom rayon re'isi nur bekrining xitay kommunist partiye merkizi komitétining re'isi xujintawning ikki chong yighin'gha qatnishiwatqan kommunist partiye wekillirining mes'ullirigha qilghan sözining rohini anglatqanliqini xewer qildi.
Muxbirimiz weli
2010-03-05
Élxet
Pikir
Share
Print
Süret, 2004 - yili 27 - iyul, nur bekrining uyghur aptonom rayonluq 3 - qétimliq til - yéziq xizmiti yighinida sözligen sözidin nusxa.
Süret, 2004 - yili 27 - iyul, nur bekrining uyghur aptonom rayonluq 3 - qétimliq til - yéziq xizmiti yighinida sözligen sözidin nusxa.
RFA Photo / Höjjetni anglighuchilirimiz teminligen.

Béyjingda échiliwatqan xitayning ikki chong yighini dawam qiliwatidu. B b s tor bétide bügün, béyjingda échiliwatqan ikki chong yighin heqqidiki jem'iyet inkasliri élan qilindi. Uningda bayan qilinishiche, shénjén shehiridin yézilghan bir obzorda ' bu qétim yenila partiye qol polanglitiwatidu, xelq qurultiyi qol kötürüwatidu, siyasiy kéngesh chawak chéliwatidu, xalas' dep qeyt qilin'ghan.

Namsiz yézilghan yene obzorda 'ikki chong yighinda boluwatqan gepler ning hemmisi kommunist partiyining teshwiqat matériyalliri, buni wekil dégen kishiler hemmisi éniq bilidu, uni bizmu obdan bilimiz, bu wang -chungning özila bir oyun, bu oyunni körüshke waqtimiz yoq' dep bayan qilin'ghan.

Shangxeydin yézilghan bir obzorda 'bu wekillerning ichide junggoda köp sanliq boluwatqan ishsizlar wekili yoq', 'bu yighindiki hazirqi wekillerning wekillik qiliwatqini peqet biperwaliq, exmeqliq, dötlük, siqinji we chil börining xiyalidin ibaret' dep körsitilgen.

Wang léchüen 'shinjang wekilliri'ni yoqlap kelgen

'Téngshün xewerliri' dégen tor géziti bügün, bu ikki chong yighin heqqide élan qilghan xewiride, xitay kommunist partiye merkizi komitétining ezasi, shinjang partkom sékrétari wang léchüenning béyjingda échiliwatqan ikki chong yighin'gha qatnashqan 'shinjang wekilliri' dep atalghan kishilerni yoqlap kelgenlikini bayan qildi.
 
Bu tor gézitining muxbiri wang shinxong maqalisida, wang léchüenning 'shinjang wekilliri' dep atalghan kishilerni yoqlighili 'shinjang méhmanxanisi'gha kelgende, qeshqerdiki héytgah meschitining xatipi jüme tayir bilen tok shotisida uchriship, intayin qizghin körüshkenliki, intayin yéqimliq hal - ehwal sorashqanliqi we xizmetler heqqide tepsili doklat anglighanliqini alahide gewdilendürüp teswirlidi.

Nur bekri 'shinjang wekilliri'ge xujintawning yolyoruqining rohini anglatqan

'Téngshün', 'yashin' dep atilidighan ikki tor géziti birliship élan qilghan yene bir xewerde, Uyghur aptonom rayon re'isi nur bekri bu ikki chong yighin'gha qatnishiwatqan 'shinjang wekilliri' dep atalghan kishilerge xitay kommunist partiye merkizi komitétining re'isi xujintawning ikki chong yighin'gha qatnashqan kommunist partiye wekillirining mes'ullirigha qilghan sözining rohini anglatqanliqini bayan qildi. Emma bu gézit nur bekrining anglatmisining mezmunini ashkarilimidi.

Hazir amérikida turuwatqan musteqil tetqiqatchi ilshat ependining qarishiche, xujintaw Uyghurlar üchün yaxshiliq élip kelgen emes, uning bu qétimqi yolyoruqi we nur bekrining uni ijra qilishi Uyghurlar üchün téximu éghir aqiwetlerni keltürüshi mumkin.

Nur bekri 2004‏ - yili jang zémin, wang léchu'enlerning yolyoruqining rohini qandaq anglatqan idi?

Melum bir kishi ashkarilighan nur bekrining 'aptonom rayonluq 3 ‏ - qétimliq til -yéziq yighinida sözligen sözi' dégen höjjetning foto kopisige asaslan'ghanda, nur bekri 2004‏ - yil 27‏ - iyul küni aptonom rayonluq 3 ‏ - qétimliq til -yéziq yighinida, sabiq xitay kommunist partiye merkizi komitét re'isi jang zéminning 'tilning rawan bolmasliqi, békinmilik, qalaqliq az sanliq milletlerning tereqqiyatini cheklimige uchrutidighan halqiliq mesile' dégen 'yolyoruqi'ni we xitay kommunist partiyining Uyghur aptonom rayon sékrétari wang léchüenning 'asasiy qatlamlardiki az sanliq millet kadirlirining xenzu tilini öginishi we puqta bilishi intayin texirsiz wezipe' dégen 'muhim yolyoruqi'ni anglitip, Uyghur tilining yoqitilish teqdiri körsetken idi.

Nur bekri shu qétimqi til -yéziq yighinida jang zémin, wang léchu'enlerning 'yolyoruqining rohi'ni anglatqanda, 'nu bekrining sözi' dep atalghan 24 betlik bu höjjettiki 'til -yéziq qollunush herbi kishige, döletning birlikige taqilidu', 'aptonom rayonimiz til -yéziq kompyutér téxnikisigha yétishelmeywatidu', 'xenzu tili dunyada eng yéngi küchlük til', 'xenzu tilini ögense yéngi yashash usulini ögünüp réqabet küchini ashuridu', 'til -yéziq medeniyet hadisisi, emma bir milletning belgisi emes', 'til -yéziq özining qanuniyiti buyiche, barliqqa kélish, tereqqi qilish, yoqulush basquchini bésip ötidu', 'bügünki dunya iqtisadining bir gewdilishishige egiship, qoshulup kétish tarixning asasi éqimigha aylandi' dégen sözlerni alahide gewdilendürüsh arqiliq, Uyghur aptonom rayonida Uyghur til - yéziqining yoqitilish nishanini éniq körsetken.

Uchur arxiplirigha qarighanda, nur bekri 1989‏ - yili shinjang uniwérsitétining yashlar ittipaqining sékrétari bolghan. Merkizi partiye mektipide bilim ashurup kelgendin kéyin, sendong ölkisi féychéng shehirining qoshumche mu'awén sheher bashliqi, qeshqer wélayitining mu'awén waliysi, ürümchi shehirining mu'awén sheher bashliqi, Uyghur aptonom rayonluq hökümetning mu'awén bash katibi, aptonom rayonluq partkomning mu'awén sékrétari bolghan. 2007 ‏ - Yilidin bashlap Uyghur aptonom rayonning wakalet re'isi we re'isi bolup kelmekte.

Yuqiridiki awaz ulinishidin, bu heqtiki melumatimizning tepsilatini anglaysiler.

 
Toluq bet