Нур бәкри гуаңдуң қатиллириға чапан япти, үрүмчи намайишчилирини қарилиди

Сүрәт, уйғур аптоном райониниң рәиси нур бәкриниң 6 - ийул күни, шинҗаң телевизийиси вә хитай мәркизи хәлқ телевизийисидә сөз қилип, шавгүән вәқәси вә үрүмчи намайиши һәққидә ипадә билдүрүватқан көрүнүш.

Нур бәкриниң билдүрүшчә, шавгүән вәқәси, уйғур ишчиларниң бир хитай қизиға чахчақ қилип бозәк қилғанлиқи үчүн келип чиққан. Йәни шу күни бир нәпәр хитай қизи, уйғур ишчиларниң ятиқиға уқушмастин кирип қалған. Уйғур ишчилар, хитай қизға чахчақ қилип, уни ахмақ қилған.

Бу әһвални уққан хитай ишчилар уйғур ишчиларниң ятиқиға бастуруп кирип урған. Нур бәкри бу сөзлири арқилиқ шавгүән вәқәсиниң тәсаддипий бир вәқә икәнликини, қанлиқ вәқәниң сәвәбсиз келип чиқмиғанлиқини, уйғур ишчилардинму хата кетип қалған ишлар барлиқини билдүрүшкә тиришти; әмма шавгүән шәһәрлик һөкүмәт вәқәгә башқичә изаһат бәргән иди йәни вәқәниң бир сахта хәвәр сәвәбидин келип чиққанлиқини, сахта хәвәр тарқатқан җу пәмилилик хитайниң қолға елинғанлиқини билдүргән иди.

Нур бәкриниң изаһати бойичә, шавгуән һөкүмити җу пәмилилик хитайни наһәқ җазалиған болиду. Әмма нур бәкри шавгүән һөкүмитини вәқәгә җиддий көңүл бөлди вә вақтида арилашти дәп мәдһийилиди. У сақчиларниң вәқә йүз берип 5 саәттин кейин нәқ мәйданға йетип кәлгәнлики, уйғур ишчиларниң уруп өлтүрүлишини тамаша қилғанлиқи қатарлиқ пакитларға көз юмди.

Шавгүән вәқәсини мумкин қәдәр кичиклитип көрситишкә тиришқан вә йәнә шавгүән қатиллирини һечқандақ әйиблимигән нур бәкри, үрүмчи намайишини, пиланлиқ, тәшкиллик елип берилған уруш-чеқиш вә от қоюш зораванлиқ вәқәси дәп әйиблиди. У үрүмчи намайишини чәтәлдики бөлгүнчи күчләр билән дөләт ичидики дүшмән күчләрниң бирликтә уюштурғанлиқини, дөләт сиртида рабийә қадир ханимниң, дөләт ичидә болса "уйғурбиз" тор бети вә "диярим" тор бетиниң үрүмчи намайишиға қутратқулуқ қилғанлиқини билдүрди.

Нур бәкриниң мәзкур намайиш сәвәблик уйғурбиз тор бетини әйиблиши, нөвәттә өч елиш дәп қаралмақта. Чүнки мустәқил тәтқиқатчи илһам тохти 3 айниң алдида радиомизда баянат берип, нур бәкриниң лаяқәтсизликини вә уйғур миллитигә вәкиллик қилалмайдиғанлиқини билдүргән иди. У бу сөзлири сәвәблик 1 ай нәзәрбәнт астиға елинған вә уйғурбиз тор бети 6 - қетим тақалған иди.

Нур бәкриниң бу қетимқи тәнқиди, илһам тохтиға қарита иккинчи қетимлиқ өч елиш дәп қаралмақта. Игилишимизчә, илһам тохти икки күндин бери қайтидин йәнә нәзәрбәнт астиға елинған вә бүгүн әтигән үрүмчи намайиши сәвәблик сораққа тартилған; әмма униң сорақтин кейин қоюветилгәнлики яки сақчилар тәрипидин тутуп турулуватқанлиқи мәлум әмәс.

Нур бәкриниң шавгүән вәқәси һәққидики баянати 11 күн кечикти. Баянатниң кечикиши уйғурларда наразилиқ пәйда қилған болса; баянатниң мәзмуни кишиләрни ғәзәпләндүрди. Болупму униң шавгүән вәқәсидин ибарәт рәһимсиз бир қатиллиқ вәқәсигә икки еғиз наразилиқ билдүрәлмәслики, униң кишилик пәзилитидики инсаний ғорур вә мәйданиғиму гуман пәйда қилди.

Бундин кейинки програмилиримизда, бу һәқтики инкаслардин вақип болсиләр.