Хитай һөкүмити тор бәтләрдә уйғур елини "тарихтики әң әвзәл вәзийәттә "дәп тәшвиқ қилмақчи

• Мухбиримиз гүлчеһрәниң бу һәқтики толуқ мәлумати
• Download story audio

Уйғур елиниң һөкүмәт тор бәтлиридә берилгән хәвәрләрдин мәлум болушичә, уйғур ели партком һәмдә һөкүмәт ахбарат тәшвиқат бөлүминиң орунлаштурулуши билән нөвәттә уйғур елигә хитайниң 29 даңлиқ тор бәтлиридин җәмий 100гә йеқин мухбир уйғур елигә тәклип билән кәлтүрүлгән.

Чәтәл мухбирлири қатнаштурулмиған

28 - Сентәбир күни ечилған бу хитай мухбирлирини күтивелиш йиғиниға уйғур аптонум райони партком һәмдә һөкүмәткә вәкил болуп қатнашқан партком муавин секретари нур бәкри, мухбирларни уйғур елини кәң тәшвиқ қилишқа үндәп"уйғур аптонум райони нөвәттә милләтләр иттипақлиқи вәзийити әң яхши, һәр милләт хәлқи партийиниң тоғра миллий сиясити билән тәрәққий қилип бейиған, сиясий иқтисад маарип җәмийәтниң һәр саһәлири тарихтики әң әвзәл вәзийәттә турмақта, уйғур аптонум райониниң тәрәққияти и кәң тәшвиқ қилиңлар, йәниму көп мәбләғ салғучиларни қарши алидиғанлиқимизни яхши тәшвиқ қилиңлар" дегән.

Уйғур аптонум райони һөкүмәт даирилириниң орунлаштурулуши билән елип берилған "ахбарат тор бәтлиридә шинҗаңни тонуштуруш "паалийитигә гәрчә пүтүн хитайниң һәммә җайлиридин дегүдәк мухбирлар тәклип қилинған болсиму, бирму чәтәл ахбарати яки чәтәл мухбири қатнаштурулмиған.

Әмәлийәттин йирақ тәшвиқат

Гәрчә нур бәкри уйғур елиниң иқтисади тәрәққиятиниң һәссиләп юқири көтүрүлгәнликини тилға алған болсиму чаршәнбә күни хитайниң елан қилған ғәрбий районларниң иқтисади тәрәққияти һәққидики доклатида уйғур елини өз ичигә алған ғәрбий районларниң иқтисадиниң башқа районларға қариғанда зор дәриҗидә арқида қалғанлиқи хәлқниң кирим пәрқиниң зорлуқи, иқтисади қийинчилиқ түпәйли маарип қобул қилалмаслиқ, давалиналмаслиқ мәсилилириниң еғирлиқини елан қилған иди.

Бүгүн йәнә шинхуа ториниң хәвиридә көрситишичә хитайниң нуқтилиқ шәһәр аһалилириниң иқтисадий тәрәққият әһвали һәққидә чиқарған статистикисида үрүмчиниң хитай бойичә 43 орунда икәнлики мәлум болған. Бултур елип барған тәкшүрүштә үрүмчи 34 орунда болуп чиққан. Статистикидин мәлум болушичә нөвәттә уйғур елидики хәлқниң турмуш сәвийиси йәнила төвән һесаблинидикән.

Мушуниңға охшаш реални әһваллар билән нур бәкриниң уйғур елиниң сиясий иқтисадий вәзийити һәққидә мухбирларға ейтқан сөзлиридә ипадиләнгән қарму қаршилиқлар, чәтәлләрдики уйғур паалийәтчилиридә қарши инкасларни қозғиған болуп, дуня уйғур қурултийиниң баянатчиси дилшат ришит хитай һөкүмитиниң интернет хәвәр торлирида уйғур елини тәшвиқ қилишқа алаһидә әһмийәт бериватқанлиқиға қарита зияритимизни қобул қилип инкас қайтурди. (Гүлчеһрә)