Xitay hökümiti tor betlerde Uyghur élini "tarixtiki eng ewzel weziyette "dep teshwiq qilmaqchi

• Muxbirimiz gülchéhrening bu heqtiki toluq melumati
• Download story audio

Uyghur élining hökümet tor betliride bérilgen xewerlerdin melum bolushiche, Uyghur éli partkom hemde hökümet axbarat teshwiqat bölümining orunlashturulushi bilen nöwette Uyghur élige xitayning 29 dangliq tor betliridin jem'iy 100ge yéqin muxbir Uyghur élige teklip bilen keltürülgen.

Chet'el muxbirliri qatnashturulmighan

28 - Séntebir küni échilghan bu xitay muxbirlirini kütiwélish yighinigha Uyghur aptonum rayoni partkom hemde hökümetke wekil bolup qatnashqan partkom mu'awin sékrétari nur bekri, muxbirlarni Uyghur élini keng teshwiq qilishqa ündep"Uyghur aptonum rayoni nöwette milletler ittipaqliqi weziyiti eng yaxshi, her millet xelqi partiyining toghra milliy siyasiti bilen tereqqiy qilip béyighan, siyasiy iqtisad ma'arip jem'iyetning her saheliri tarixtiki eng ewzel weziyette turmaqta, Uyghur aptonum rayonining tereqqiyati i keng teshwiq qilinglar, yenimu köp meblegh salghuchilarni qarshi alidighanliqimizni yaxshi teshwiq qilinglar" dégen.

Uyghur aptonum rayoni hökümet da'irilirining orunlashturulushi bilen élip bérilghan "axbarat tor betliride shinjangni tonushturush "pa'aliyitige gerche pütün xitayning hemme jayliridin dégüdek muxbirlar teklip qilin'ghan bolsimu, birmu chet'el axbarati yaki chet'el muxbiri qatnashturulmighan.

Emeliyettin yiraq teshwiqat

Gerche nur bekri Uyghur élining iqtisadi tereqqiyatining hessilep yuqiri kötürülgenlikini tilgha alghan bolsimu charshenbe küni xitayning élan qilghan gherbiy rayonlarning iqtisadi tereqqiyati heqqidiki doklatida Uyghur élini öz ichige alghan gherbiy rayonlarning iqtisadining bashqa rayonlargha qarighanda zor derijide arqida qalghanliqi xelqning kirim perqining zorluqi, iqtisadi qiyinchiliq tüpeyli ma'arip qobul qilalmasliq, dawalinalmasliq mesililirining éghirliqini élan qilghan idi.

Bügün yene shinxu'a torining xewiride körsitishiche xitayning nuqtiliq sheher ahalilirining iqtisadiy tereqqiyat ehwali heqqide chiqarghan statistikisida ürümchining xitay boyiche 43 orunda ikenliki melum bolghan. Bultur élip barghan tekshürüshte ürümchi 34 orunda bolup chiqqan. Statistikidin melum bolushiche nöwette Uyghur élidiki xelqning turmush sewiyisi yenila töwen hésablinidiken.

Mushuninggha oxshash ré'alni ehwallar bilen nur bekrining Uyghur élining siyasiy iqtisadiy weziyiti heqqide muxbirlargha éytqan sözliride ipadilen'gen qarmu qarshiliqlar, chet'ellerdiki Uyghur pa'aliyetchiliride qarshi inkaslarni qozghighan bolup, dunya Uyghur qurultiyining bayanatchisi dilshat rishit xitay hökümitining intérnét xewer torlirida Uyghur élini teshwiq qilishqa alahide ehmiyet bériwatqanliqigha qarita ziyaritimizni qobul qilip inkas qayturdi. (Gülchéhre)