Obama amérikining elqa'idige qarshi urushqa atlan'ghanliqini jakarlidi

Süret, prézidént obamaning rodzhistiwa bayrimi künidiki térrorluq hujumdin kéyin, térror mesilisi toghrisida nutuq bériwatqan körünüshi.

'Emdi elqa'idichilerni tinchliqperwer musulmanlar arisidin qoghlap chiqirishimiz lazim '

Obama tünügün elqa'idichilerge qarshi urushqa atlan'ghanliqini jakarlighanda, 'bizge ayanki, musulmanlarning köp sanliqi elqa'idichilerni ret qilidu. Emma elqa'idichiler tinch yashawatqan biguna xelqni öltürüsh üchün, ottura sherqtila emes, afriqida we bashqa jaylardimu, özining térrorchi teshkilatliri arqiliq, sépige qatnishishni xalaydighan tonulmighan térrorchilarni toplap süyiqest pilanlap kéliwatidu. Emdi biz ularni tinchliqperwer musulmanlar arisidin qoghlap chiqirishimiz lazim' dep körsetti.

Obama sözide yene, amérikining bixeterlik organlirigha buyruq chüshürüp, xelqning tinch, bixeter we öz ghurori bilen yashishigha kapaletlik qilish üchün 'yéngi istratégiye qollinish lazim,' dédi.

Amérikining tashqi siyasiti özgerdi, buningdin kéyin washin'gtonda we dunyadiki munasiwetdashliri arisida amérikining yéngi awazi jaranglaydu

Roytrs agéntliqning myunixtin bayan qilishiche, mu'awén prézidént baydén bügün gérmaniyide, amérikining tashqi siyasiti özgergenlikini jakarlidi. U sözide 'buningdin kéyin washin'gtonda we dunyadiki munasiwetdashlar arisida amérikining yéngi awazi jaranglaydu. Men bügün yawropagha buni anglatqili keldim. Buningdin kéyin amérika herbiy küch diplomatiyisni kücheytidu. Amérika özi ishni köprek qilidu, shundaqla, hemme ittipaqdashlirini yükni köprek üstige élishqa chaqiridu. Amérika hazir pütün dunyaning yardimige muhtaj, xuddi pütün dunya amérikining yardimige muhtaj bolghandek' dédi.

B b s bügünki xewiride, amérikining tashqi siyasitide özgirish bolghanliqini, buningdin kéyin amérika diplomatiye jehette nishanliq yarem bérish siyasiti qollinidighanliqini bayan qildi.

Amérikidiki her qaysi uchur wastiliri, en'giliyide chiqidighan 'télégraf géziti' qatarliq dunyadiki bashqa chong uchur wastilirimu bügün, amérikining elqa'idige qarshi urushqa atlan'ghanliqi, buninggha egiship amérikining tashqi siyasitimu özgergenliki heqqide yéngi mulahize, obzor we her xil munazirilerni élan qildi.

Xitay bügünki bayanatida amérikini 'xitay bilen bolghan herbiy jehettiki ishenchlik munasiwetni buzdi ' dep eyiblidi

Fransiye agéntliqining bayan qilishiche, xitay bügün, amérikining teywen'ge yéngi tipliq ilghar bashqurulidighan bomba séstimisi sétip bérishni testiqlighanliqini 'amérikining xitay bilen bolghan herbiy jehettiki ishenchlik munasiwetni buzghanliqi' dep eyiblep, qattiq naraziliq bildürdi.

Xewerde éytilishiche, xitay mudapi'e ministirliqining bayanatchisi xu'ang shöping bügünki bayanatida, amérika jorji bush hökümitining pilanlirigha warsliq qilip we uni jahilliq bilen ijra qilip, teywen mesiliside xitay bilen amérika otturisidiki ishenchlik herbiy munasiwetni buzdi, dep jakarlidi.

Roytrs agéntliqining ashkarilishiche, amérikining teywen jem'iyiti tünügün kéchide, amérikining lokt martin shirkiti teywen'ge, derijisi örlitilgen 'wetenperwer üch' belgilik bashqurulidighan bombilarni atidighan esliheliri bilen bille sétip béridighanliqini jakarlighan idi.

Xewerde éytilishiche yene, bashlan'ghuj basquchtiki 'wetenperwer üch' belgilik bashqurulidighan bomba séstimisigha üch dane oq uchi qachilinidighan bolup, bu qétim teywen'ge bérilidighan ilghar tipliq 'wetenperwer üch' belgilik bashqurulidighan bomba séstimisigha 16 oq uchi qachilash mumkin iken. Bu qétim testilan'ghan pilan yene, U60 qara lachin belgilik ilghar tik uchar, ET2 belgilik aldin ségnal bérish séstimisi, binepshe nur qollinidighan su asti paraxoti we bu bir yürüsh séstimigha munasip qomandanliq shitab layihisini öz ichige alidiken.