Prézidént barak obama zhurnalist Daniel Pearl gha béghishlan'ghan metbu'at erkinliki qanunini imzalidi

Süret, amérika prézidénti barak obama, zhurnalist Daniel Pearl gha béghishlanghan dunyada axbarat erkinlikini qollashqa ait qanun maddisigha imza qoyghan paaliyettiki körünüsh.

Prézidént obama imzalighan bu qanunda, Amérika tashqi ishlar ministirliqining pütün dunyadiki metbu'at erkinliki weziyitini muntizim halda közitip turidighanliqi ilgiri sürülgen.

Ammiwi axbarat wastilirigha tosqunluq qilidighan yaki buninggha ehmiyet bermeywatqan döletler qaysi? zhurnalistlarni himaye qilish chariliri qandaq ijra qilinmaqta ? muxbirlargha hujum qilghan yaki öltürgen jinayetchiler tégishlik jazagha tartildimu? dégendek maddilarni öz ichige alghan bu qanunda, barliq zhurnalistlarni qoghdashni meqset qilghan chare - tedbirler qeyt qilin'ghan.

Prézidént obama mezkur qanunning amérika üchün élip éytqandimu nahayiti qimmetlik ikenlikini otturigha qoyghan. Obama yene amérikining, qelem ehlilirini, hayatining xéyim - xeterge uchrushigha qarimay xizmet körsetken zhurnalistlarni öz panahigha alidighanliqini bildürdi.

Amérikidiki nopuzluq "walstrit zhornili" ning muxbiri buningdin 8 yil burun pakistandiki térrorchilar teripidin wehshiylerche öltürülgen bolup, térrorchilar uni öltürüsh jeryanini sin'alghugha élip, pakistandiki amérika elchixanisigha ewetip bergen. Shu chaghda mezkur weqe pütün dunyaning diqqitini qozghighan bir weqege aylan'ghan idi.

Mezkur qanun,2002 ‏- yili pakistanda görüge élinip qetli qilin'ghan amérikiliq zhurnalist, " walstrét zhornili" ning muxbiri Daniel Pearl sheripige tüzülgen bolup, qanun'gha imza qoyush murasimigha, Daniel Perlning ata - anisi, ayali hemde Daniel öltürülüp üch aydin kéyin dunyagha kelgen yalghuz oghli qatnashqan.

18 ‏- May küni küchge ige qilin'ghan bu qanun, mana shu Daniel Perl ning namigha béghishlan'ghan.

Prézidént obama, "daniél périlning ölümi bizge sawaq bolushi kérek. Metbu'at erkinliki nahayiti nazuk we muhim bir mesile, biz metbu'at erkinlikini boghuwatqan döletlerni diqqet bilen közitiwatimiz" dep tekitlidi.

Péshqedem axbaratchi perhat muhemmidi muxbirimizning ziyaritini qobul qilip, xitay hökümitining ammiwi axbarat wastilirigha tosqunluq qilidighan siyasetliri heqqide toxtaldi.

Yuqiridiki awaz ulinishidin, bu heqtiki melumatimizning tepsilatini anglaysiler.