Obama amérikining elqa'idige qarshi urushqa atlan'ghanliqini jakarlighandin kéyinki teywen mesilisi

Amérika prézidénti obama amérikining elqa'idige qarshi urushqa atlan'ghanliqini jakarlighandin kéyinla, amérikining teywen jem'iyiti shu küni kéchide teybéyde, amérikining teywen'ge bashqurulidighan bombidin mudapi'e körüsh séstimisi sétip béridighanliqini jakarlighan idi.
Muxbirimiz weli
2010-01-11
Élxet
Pikir
Share
Print
Süret, prézidént obamaning rodzhistiwa bayrimi künidiki térrorluq hujumdin kéyin, térror mesilisi toghrisida nutuq bériwatqan körünüshi.
Süret, prézidént obamaning rodzhistiwa bayrimi künidiki térrorluq hujumdin kéyin, térror mesilisi toghrisida nutuq bériwatqan körünüshi.
www.whitehouse.gov Din élindi.

Shuningdin kéyin xitay tashqi ishlar ministirliki 3 kün ichide 5 qétim bayanat élan qilip, amérikigha naraziliq bildürdi. Teywende dawamlishiwatqan ottura mezgillik saylamda bolsa, gomindang partiyisi nahayiti zor meghlubiyetke uchridi. Emdi bügün xitay bashqurulidighan bomba mudapi'e séstimisigha qarshi sinaq élip bardi. Erkin asiya radi'osining obzorchisi, hazir teywende turuwatqan lin bawxu'a ependi bu heqte mulahize élan qildi.
 
Amérika prézidénti obama 1 ‏ - ayning 8‏ - küni, amérikining elqa'idige qarshi urushqa atlan'ghanliqini jakarlighandin kéyinla, amérikining teywen jem'iyiti shu küni kéchide teybéyde, amérikining teywen'ge bashqurulidighan bombidin mudapi'e körüsh séstimisi sétip béridighanliqini jakarlighan idi. Mulahizichilerning qarishiche, bu, yéngi weziyette, amérikining teywenni özining bashqurulidighan bombigha taqabil turush séstimisigha kirgüzgenlikidin dérek béridu.

Boshün tor gézitining bayan qilishiche, teywenning amérikining ilghar qorallirigha ige boluwatqanliqidin xewer tapqan xitay buninggha qarita, 3 kün ichide 5 qétim bayanat élan qilip, amérikigha naraziliq bildürdi. Xitay élan qilghan bu bayanatlarning hemmiside, amérikining teywen'ge qoral sétishini derhal toxtitishni meqset qildi.

Merkizi agéntliqining bayan qilishiche, teywende dawamlishiwatqan ottura mezgillik saylamda, gomindang partiyisi zor meghlubiyetke uchridi.

Xitayning shixu'a agéntliqining bayan qilishiche, xitay bügün 1‏ - ayning 11 ‏ - küni, chong quruqluqta bashqurulidighan bomba séstimisigha qarshi turush séniqi élip bardi.

Dunya xitay kommunist partiyisini yaqturmaydu

-‏ - Teywen prézidénti ma yingjyu béyjinggha teslim bolghan idi, ‏ -‏- deydu erkin asiya radi'osining obzorchisi, hazir teywende turuwatqan xitay mesililiri mutexessisi lin bawxu'a ependi bu heqte élan qilghan obzorida, -- emma xitay elchisi chén yünlin teywen'ge kelgende, teywen xelqi qattiq qarshi turghanliqtin we teywende dawamlishiwatqan ottura mezgillik saylamda, gomnidang partiyisige bérilgen awaz bekla azlap ketkenliktin, ma yingjyu herikitini bir az astilatti. Bundaq ehwal astida, xitay herbiy jehettin küch körsitish taktikisini qollinip, teywen xelqini bésim bilen qorqutmaqchi bolup, bir turup amérikigha qarshi bayanat élan qilsa, yene bir jehettin teywen'ge qarshi bashqurulidighan bomba sinaq qildi.

Obamaning xitaygha qilghan mu'amilisi yumshaq bolghanliqtin, xitay uni közige ilmidi, elqa'idimu közige ilmidi

Lin bawxu'a ependining qarishiche, amérika prézidénti obama xitaygha siliq mu'amile qilghan idi, u, amérika bilen xitay otturisidiki diplomatik munasiwetning janliq bolushini közligen elbette. Emma obamaning xitaygha qilghan mu'amilisi yumshaq bolghanliqtin, xitay uni közige ilmidi, elqa'idimu uni közige ilmidi. Xitay we elqa'ide uni közge ilmighansiri, herxil weqe körülüshke bashlidi, amérika xelqi ichide, obamaning abruyi töwenlep ketti.

Hazir xitay kommunist partiyisi bilen dost boluwalghan bashqa dölet bashliqlirining inawiti chüshüp ketti

Bundaq ehwal amérikidila emes, bashqa döletlerdimu körüldi. Xitaygha yéqinchiliq qilghan yaponiye bash minsitiri yuki'o xatoyamanimu yaponiyide qollaydighan awaz azlap ketti. Xitaygha yéqinchiliq qilghan teywen prézidénti ma yingjyuningmu teywende inawiti töküldi.

Démek, dunya xitay kommunist partiyisini yaqturmaydu. Shunglashqa xitay kommu'ist partiyisi bilen dost boluwalghan kishilerning inawiti chüshüp ketti.

Xitay kommunist partiyisi küchlüktin qorqidighan yawashni bozek qilidighan bir uchum lükchek

Lin bawxu'a ependining bayan qilishiche, amérika prézidénti obama bultur 11‏ - ayda xitayni ziyaret qilghanda, amérikining teywen munasiwiti qanunini tilgha almighan idi, xitay bu pursettin paydilinip, teywen'ge bolghan bésimni kücheytsh bilen bille, amérikini teywenni qoghdash mejburiyitidin waz kechtürmekchi boldi. Xitay kommunist partiyisi bir uchum lükchek. Lükchek dégen shundaq, küchlüktin qorqidu, yawashni bozek qilidu.

Xitayda hazir herbiy ofitsérlarmu dölet ishliri toghrisida bayan élan qilidighan ghelite hadise peyda bolup qaldi

Lin bawxu'a ependining qarishiche, xelq'ara qa'ide buyiche, döletler arisidiki ishlar toghrisida döletning tashqi ishlar ministirliqi otturigha chiqip sözleydu, her kim chiqip öz aldigha qalaymiqan sözlimeydu. Emma xitayda hazir kim xalisa, chiqip qalaymiqan bayanat élan qilidighan hadise peyda bolup qaldi. Mesilen, xitayning lo yu'en dégen bir général mayur derijilik herbiy ofitséri otturigha chiqip, bashqa döletlerge qarita bayanat élan qilip, bir dem amérikini, birdem teywenni tillap ketti.

Buningdin qarighanda, hazir xu jintaw herbiylerni bashquralmaydighan yaki herbiyler mushundaq qa'i'idisizlik qilish arqiliq xu jintawgha, özining siyasiy jehette tesiri barliqini ipadilep qoymisa bolmaydighan halgha chüshüp qalghan bolsa kérek.

Yuqiridiki awaz ulinishidin, bu heqtiki melumatimizning tepsilatini anglaysiler.
 
Toluq bet