Jéngju uniwérsitétidiki oqughuchilar isyan kötürüp namayish qilmaqta


2006-06-23
Share

Ötken peyshenbe künidin bashlap, xitaydiki jéngju uniwérsitétigha qarashliq shénda institutining 5000gha yéqin oqughuchisi mektep püttürüsh diplomi mesilisi tüpeylidin mektep rehberlirige qattiq naraziliq bildürüp isyan kötürüshke bashlighan. Ghezeplen'gen oqughuchilar peqet mektep ichidila emes, belki kochilargha chiqip namayish qilghan shundaqla tertip bashqurushqa kelgen saqchilar bilen qattiq toqunushqan.

Xitay da'iriliri weqeni yoshurushqa tirishmaqta

Gerche isyan kötürüwatqan oqughuchilar xitaydiki metbu'at orunlirigha téléfon qilip ularning mezkur mektepke kélip ziyaret qilishini telep qilghan bolsimu, xitay da'iriliri bu heqte héchqandaq melumat bermigen. Hetta ziyaritimizni qobul qilghan mektep etrapidiki saqchi bashqarmisining ademliri intayin qopal halda özlirining bu heqte héchqandaq melumat bérelmeydighanliqini hemde bérish zoröriyitiningmu yoq ikenlikini bildürgen.

Ziyaritimizni qobul qilghan mezkur mektep bashqarma ishxanisidiki xadimlarmu "undaq ish yoq, biz hazir oqughuchilardin imtihan éliwatimiz, oqughuchilar imtihan bériwatidu" dep yüz bériwatqan weqelikni yoshurushqa urun'ghan.

Wediside turmasliq weqege sewebchi bolghan

Jéngju uniwérsitéti xitaydiki dangliq mekteplerning biri bolup, uninggha qarashliq shénda instituti ikkinchi derijilik institut bolup hésablinidiken. Lékin mezkur institutning oqughuchi qobul qilish nizamnamisida 'mezkur institutini püttürgen oqughuchilar mektep püttürgende jéngju uniwérsitétini püttürdi dégen diplomgha érishidu' dep körsitilgen. Lékin mezkur nizamnamisigha qol qoyghan mektep rehberliri öz wediside turmay, oqughuchilar mektep püttürgende, ulargha 'jéngju uniwérsitétini püttürdi' dégen diplom emes belki ' ikkinchi derijilik institutini püttürdi ' dégen diplom bérish qararini chiqarghan. Shuning bilen bu ish oqughuchilarning qattiq nepritini qozghighan bolup, ular "mektep rehberliri 3 yildin buyan bizni aldap, exmeq qilip keldi " dep namayish qilishqa bashlighan.

Gerche xitaydiki metbu'at orunliri bu heqte héchqandaq melumat bermigen bolsimu, oqughuchilarning kündin -kün'ge küchiyiwatqan naraziliq bildürüsh herikiti béyjing ma'arip ministirliqining diqqitini qozghighan. Ular mezkur mektepke adem ewetip, ehwal igilimekchi bolghan. Lékin shuning bilen bir waqitta nechche yüzligen saqchi mektep etrapini qorshiwélip ders tashlap naraziliq bildürüwatqan oqughuchilarni qattiq nazaret qilghan we chare körüshke teyyar bolghan.

Axbarat orunlirining ziyaret qilishi ret qilin'ghan

Ziyaritimizni qobul qilghan mezkur mekteptiki bir oqughuchi ötken peyshenbe küni bashlan'ghan namayishning ta hazirghiche dawamliship kéliwatqanliqini eskertish bilen bir waqitta, yuqirining mezkur mektep mudirini emeldin qaldurup, uning ornigha yéngi bir mudir teyinligenlikini, lékin diplom toghruluq téxiche éniq ipade bildürmeywatqanliqini melum qildi.

Ziyaritimizni qobul qilghan bu oqughuchi bu qétimqi oqughuchilarning mektep rehberlirige naraziliq bildürüp namayish qiliwatqanliqi heqqidiki herqandaq uchurning qattiq kontrol qiliwatqanliqini tekitlep, hetta ziyaret qilmaqchi bolup kelgen shinxu'a agéntliqining muxbirlirimu mektep teripidin ret qilin'ghanliqini hemde oqughuchilarning bu heqte öz aldigha pikir bayan qilishighimu qet'iy yol qoyulmaywatqanliqini körsetti:

"Ziyaret qilsaq dep kelgenler bar, lékin mektep ularning bu heqte melumat bérishige ruxset qilmidi. Hetta resimge tartishqimu yol qoymidi. Shinxu'a agéntliqining muxbirlirimu ziyaret qilimiz dep kelgen idi. Lékin mektep ularning ziyaret qilishini ret qildi. Mektepning tor bétidiki munazire meydanida bayan qilin'ghan pikirlermu u yaqtin chiqsa bu yaqtin élip tashliniwatidu ".

Ziyaritimizni qobul qilghan oqughuchilarning melum qilishiche, mezkur institutta oquwatqan oqughuchilarning köp sandikisi déhqan baliliri bolup, ular jénju uniwérsitétining diplomigha érishish üchün yiligha 10 ming yü'endin oqush puli tapshurup kelgen. (Méhriban)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet