Тәрәпләр бейҗиң олимпик комитетиниң чәтәл мухбирлириниң әркин зиярәт қилиши һәққидики вәдисигә гуман билән қаримақта


2006-09-29
Share
Бейҗиң шәһириниң башлиқи вә бейҗиң 2008 олимпик йиғини комитетитиниң башлиқи ваң чисән 2004 – йили 29 – авғуст күни гретсийиниң пайтәхти афенада олимпик байриқини ләпилдәтмәктә. AFP

Йеқинда бейҗиңда ечилған бейҗиң олимпик комитетиниң биринчи нөвәтлик дуня мәтбуат йиғинида, бейҗиң олимпик комитетиниң рәиси лю чи 2008 ‏- йили ечилидиған олимпик тәнтәрбийә йиғини җәрянида, чәтәл мухбирлири әркин саяһәт қилиш вә әркин зиярәт қилиш һоқуқиға игә болиду, биз һәрқайси мәтбуат орунлиридин бейҗиңға кәлгән достларниң турмушиниң көңүллүк, зияритиниң оңушлуқ болушини үмид қилимиз" дәп билдүрди. У йәнә "чәтәл мухбирлири қолиға виза алған заман қандақ йәргә берип саяһәт яки зиярәт қилимән десә, өз ихтияри" дәп көрсәтти.

Хитай жорналист: хитай һөкүмити вәдисидә турса яхши болатти

Америкида хитай тилида нәшр қилинидиған "дуня гезити "ниң тәнтәрбийә бетигә мәсул мухбир бав юң мәтбуат саһәсиниң бейҗиң һөкүмитидин йәнила үмид күтидиғанлиқини билдүрүп, "әгәр бейҗиң һөкүмити һәқиқәтән гепидә туруп, қилған вәдилирини әмәлгә ашурған болса бәкму яхши болатти, биз мухбирларниң әң чоң арзуйимизму дәл мушу " дәп көрсәтти.

Хитай һөкүмити техи бундин 10 күн илгири чәтәл мәтбуатлириниң хитайда ахбарат елан қилишта, чоқум шинхуа агентлиқиниң бир туташ башқурушиға бойсунуши керәкликини әскәртип, нурғун чәклимиләрни бекиткән иди. Бу қетим бейҗиңда ечилған дуня мәтбуат йиғинида, бейҗиң олимпик комитетиниң рәиси лю чиниң дегән сөзи хитай һөкүмитиниң йеқинда елан қилған чәтәл мәтбуатлирини чәкләш һәққидики бәлгилимидә көрситилгән мәзмун билән қариму -қарши болуп, анализчиларниң гуманини қозғимақта. "Дуня гезити" ниң мухбири бав юңму "бейҗиң һөкүмити бәлким олимпик йиғинини сақ -саламәт өткүзивелиш үчүнла вақитлиқ айрим вәдә бериватқан болуши мумкин" дәп билдүрди.

Д у қ: хитай даирилири вәдисидә туруши натайин

Дуня уйғур қурултийиниң баш катипи долқун әйса әпәнди бейҗиң олимпик комитетиниң биринчи нөвәтлик дуня мәтбуат йиғинида қилған бу қетимқи вәдиси һәққидә тохтилип, өзиниң хитай һөкүмити тәрипидин берилгән һечқандақ вәдиләргә ишәнмәйдиғанлиқини тәкитлиди.

Дуня уйғур қурултийиниң баянатчиси дилшат ришит әпәндиму бу һәқтә өзиниң долқун әйса әпәндигә охшаш көз қарашта икәнликини билдүрди. У сөзидә йәнә, "бейҗиң олимпик комитетиниң рәиси лю чиниң 2008 ‏- йили ечилидиған олимпик тәнтәрбийә йиғини җәрянида, чәтәл мухбирлири әркин саяһәт қилиш вә әркин зиярәт қилиш һоқуқиға игә болиду" дегини пүтүнләй ялған. Бәлким улар пәқәт тәнтәрбийәгә аит хәвәрләрни беришқила рухсәт қилиши мумкин, сиясәткә тақишидиған һәр қандақ хәвәрниң берилиши һәргизму мумкин әмәс" дәп билдүрди. Дуня уйғур қурултейиниң баянатчиси дилшат ришит әпәнди хитай һөкүмитиниң олимпик йиғинини өткүзүш үчүн нурғун ялған вәдиләрни қилғанлиқини вә һечқачан өз вәдисидә турмиғанлиқини тәкитләп, дуня уйғур қурултийиниң‏, олимпик йиғининиң бу нөвәт бейҗиңда ечилишиға қәтий қарши икәнликини билдүрди. (Меһрибан)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт