Terepler béyjing olimpik komitétining chet'el muxbirlirining erkin ziyaret qilishi heqqidiki wedisige guman bilen qarimaqta

• Muxbirimiz méhribanning bu heqtiki toluq melumati
• Download story audio

Béyjing shehirining bashliqi we béyjing 2008 olimpik yighini komitétitining bashliqi wang chisen 2004 – yili 29 – awghust küni grétsiyining paytexti afénada olimpik bayriqini lepildetmekte. AFP

Yéqinda béyjingda échilghan béyjing olimpik komitétining birinchi nöwetlik dunya metbu'at yighinida, béyjing olimpik komitétining re'isi lyu chi 2008 ‏- yili échilidighan olimpik tenterbiye yighini jeryanida, chet'el muxbirliri erkin sayahet qilish we erkin ziyaret qilish hoquqigha ige bolidu, biz herqaysi metbu'at orunliridin béyjinggha kelgen dostlarning turmushining köngüllük, ziyaritining ongushluq bolushini ümid qilimiz" dep bildürdi. U yene "chetel muxbirliri qoligha wiza alghan zaman qandaq yerge bérip sayahet yaki ziyaret qilimen dése, öz ixtiyari" dep körsetti.

Xitay zhornalist: xitay hökümiti wediside tursa yaxshi bolatti

Amérikida xitay tilida neshr qilinidighan "dunya géziti "ning tenterbiye bétige mes'ul muxbir baw yung metbu'at sahesining béyjing hökümitidin yenila ümid kütidighanliqini bildürüp, "eger béyjing hökümiti heqiqeten gépide turup, qilghan wedilirini emelge ashurghan bolsa bekmu yaxshi bolatti, biz muxbirlarning eng chong arzuyimizmu del mushu " dep körsetti.

Xitay hökümiti téxi bundin 10 kün ilgiri chet'el metbu'atlirining xitayda axbarat élan qilishta, choqum shinxu'a agéntliqining bir tutash bashqurushigha boysunushi kéreklikini eskertip, nurghun cheklimilerni békitken idi. Bu qétim béyjingda échilghan dunya metbu'at yighinida, béyjing olimpik komitétining re'isi lyu chining dégen sözi xitay hökümitining yéqinda élan qilghan chet'el metbu'atlirini cheklesh heqqidiki belgilimide körsitilgen mezmun bilen qarimu -qarshi bolup, analizchilarning gumanini qozghimaqta. "Dunya géziti" ning muxbiri baw yungmu "béyjing hökümiti belkim olimpik yighinini saq -salamet ötküziwélish üchünla waqitliq ayrim wede bériwatqan bolushi mumkin" dep bildürdi.

D u q: xitay da'iriliri wediside turushi natayin

Dunya Uyghur qurultiyining bash katipi dolqun eysa ependi béyjing olimpik komitétining birinchi nöwetlik dunya metbu'at yighinida qilghan bu qétimqi wedisi heqqide toxtilip, özining xitay hökümiti teripidin bérilgen héchqandaq wedilerge ishenmeydighanliqini tekitlidi.

Dunya Uyghur qurultiyining bayanatchisi dilshat rishit ependimu bu heqte özining dolqun eysa ependige oxshash köz qarashta ikenlikini bildürdi. U sözide yene, "béyjing olimpik komitétining re'isi lyu chining 2008 ‏- yili échilidighan olimpik tenterbiye yighini jeryanida, chet'el muxbirliri erkin sayahet qilish we erkin ziyaret qilish hoquqigha ige bolidu" dégini pütünley yalghan. Belkim ular peqet tenterbiyege a'it xewerlerni bérishqila ruxset qilishi mumkin, siyasetke taqishidighan her qandaq xewerning bérilishi hergizmu mumkin emes" dep bildürdi. Dunya Uyghur qurultéyining bayanatchisi dilshat rishit ependi xitay hökümitining olimpik yighinini ötküzüsh üchün nurghun yalghan wedilerni qilghanliqini we héchqachan öz wediside turmighanliqini tekitlep, dunya Uyghur qurultiyining‏, olimpik yighinining bu nöwet béyjingda échilishigha qet'iy qarshi ikenlikini bildürdi. (Méhriban)