Xitay olimpik tawarlirini ishlep chiqiridighan karxanilarda emgek hoquqini depsende qilish bilen eyiblendi

2007-06-11
Élxet
Pikir
Share
Print

Xelq'ara ishchilar uyushmiliri birleshmisi aldinqi küni doklat élan qilip, 2008 - yili ötküzülidighan béyjing olimpik musabiqisi üchün mehsulat ishlepchiqirish ruxsetnamisi bérilgen xitay karxanilirini, ösmürlerni emgekke sélish we emgekchiler hoquqini éghir derijide depsende qilish bilen eyiblidi. Béyjing olimpik musabiqisini teshkilligüchi organ, ishchilar hoquqini qoghdighuchi xelq'ara teshkilatning bésimi astida ösmürlerni ishletken yaki eng töwen ish heqqi tüzümige xilapliq qilghuchi karxanilar bayqalsa, mehsulat zakaz qilish toxtamnamisi bikar qilinidighanliqini agahlandurdi.

Olimpik mehsulatliri bala ishchilar teripidin ishlepchiqirilmaqta

Xelq'ara ishchilar uyushmiliri birleshmisining 10 - iyun küni élan qilghan yéngi doklatida, béyjing olimpik musabiqisida sétilidighan tawarlar zakaz qilin'ghan bezi xitay karxanilirida bala ishchilarni ishlitish, ishchilargha intayin töwen sewiyide ma'ash bérish qatarliq ishchilar hoquqini depsende qilidighan olimpik rohigha xilap ehwallarning éghir ikenlikini otturigha qoydi we bu ehwallar olimpik rohigha qilin'ghan haqaret, dep körsetti.

Doklatta, olimpik tawarlirini ishlepchiqirish ruxsetnamisigha érishken xitay karxanilirida 12 - 13 yashlardiki bala ishchilarni ishlitish ehwali mewjut bolupla qalmay, ishchilarning ma'ashi pewquladde töwenliki, emgek waqti uzun, ishchilarning künige 12 we 13 sa'et, heptide 7 kün ishleshke mejburlinidighanliqini, ishchilarning salametliki we bixeterliki nezerde tutulmaydighanliqini tenqid qildi.

Doklatta eskertishiche, xelq'ara ishchilar uyushmiliri birleshmisi 2006 - yildin bashlap béyjing olimpik tawarlirini ishlepchiqarghuchi xitay karxanilirini tekshürüshke bashlighan bolup, gu'angdongdiki 4 shirketni yeni féyda shirkiti, féyda bash kiyim shirkiti, yinggé we sujéngchang shirketlirini tekshürgen. Junggo emgek uchurliri mejmu'esining fransiyidiki wekili sey zonggoning eskertishiche, xitayda bala ishchilarni ishlitish ehwali omumyüzlük mewjut bolupla qalmay, belki yéqinqi 2 yildin béri téximu éghirlashmaqta

U, "olimpik musabiqisida bala ishchilar ishlepchiqarghan mehsulatlarni ishlitish olimpik rohigha toghra kelmeydu. Junggo emgek uchurliri yéqinda yollighan bir doklatida bu ehwalni otturigha qoyup, junggoda bala ishchilarni ishlitish ehwalining nahayiti éghirliqini, bolupmu yéqinqi bir nechche yildin béri téximu köpiyiwatqanliqini tekitlidi. Junggo hökümiti bu ehwalning junggodiki mekteptin qélish xahishi bilen munasiwetlik ikenlikidin ensirimekte," deydu.

Xelq'ara we her qaysi dölet ishchilar uyushmilirining xitaydiki emgek hoquqi mesilisini mushu mezgilde tenqid qilghanliqi kishilerni ejeplendürmesliki kérek, dep tekitligen sey zonggo, bu teshkilatlar 2008 - yildiki béyjing olimpik musabiqisini purset bilip, junggo hökümitini ishchilar mesilisige köngül bölüshke, b d t ning iqtisadi, ijtima'iy we medeniyet hoquqi heqqidiki ehdinamisini heqiqi türde emeliyleshtürüshke we xelq'ara emgek hoquqi ölchemlirige ri'aye qilishqa mejburlimaqchi, dep körsetti.

"Uyghur qizlirimu pewquladde töwen ma'ash we nachar shara'itta ishleshke mejburlanmaqta"

Merkizi washin'gtondiki amérika Uyghur jem'iyiti Uyghur qizlirini ichkiridiki zawut -karxanilarda mejburi ishlitishke qarshi xelq'ara heriket qozghimaqchi boliwatqan teshkilatlarning biridur. Mezkur teshkilatning bash katipi alim séytof, "Uyghur qizlirini pewquladde töwen ma'ash we nachar shara'itta ishleshke mejburlash munasiwetlik xelq'ara ehdinamilar we olimpik rohigha xilap qilmishlarning biri," dep körsetti.

Merkizi bilgiyining bryussél shehiridiki xelq'ara ishchilar uyushmiliri birleshmisi 2006 - yili xelq'ara erkin ishchilar uyushmiliri ittipaqi bilen xelq'ara xristiyan ishchilar uyushmiliri ittipaqi, deydighan ikki teshkilatning birlishishidin qurulghan xelq'araliq organ bolup, mezkur organ'gha eza 150 nechche dölettiki 300 din artuq ishchilar uyushmisi bar.

Xelq'ara ishchilar uyushmiliri birleshmisining "ishchilar hoquqi médali bolmighan olimpik," dégen mawzudiki mezkur doklati, xelq'ara olimpik komitéti 2012 - yildiki olimpik musabiqisini ötküzüshke iltimas qilghan namzat sheherlerning biri londonda yighin achmaqchi boliwatqan mezgilde élan qilindi.

Béyjing olimpik yighini 1936 - yili natséstlar gérmaniyide ötküzgen olimpik musabiqisidin kéyin, dunyada eng köp talash - tartish qozghighan olimpik musabiqisi

Xelq'ara ishchilar uyushmiliri birleshmisining doklati élan qilin'ghandin kéyin, béyjing olimpik musabiqisini teshkilligüchi organ düshenbe küni buninggha téz inkas qayturup, bala ishchilarni ishletken yaki eng töwen ma'ash belgilimisige xilapliq qilghan shirketler bayqalsa, ular bilen tüzgen toxtamname bikar qilinidighanliqini jakarlidi.

Béyjing olimpik musabiqisini teshkillesh komitétining mu'awin re'isi jang shawyüy, düshenbe küni xongkongdiki chet'ellik muxbirlar kulubida bergen bayanatida "eger bu karxanilar bizning belgilimimizge xilapliq qilsa, biz buni qattiq bir terep qilimiz. Eger belgilimige éghir derijide xilapliq qilghanlar bayqalsa, ular bilen tüzgen toxtamlirimizni bikar qilishimiz mümkin," deydu.

Merkizi shwétsariyidiki xelq'ara olimpik komitéti olimpik mehsulatlirini biwaste kontrol qilish hoquqi yoqliqini, lékin mezkur organning emgek hoquqi ölchimige ri'aye qilish heqqidiki siyasiti barliqini shundaqla sahibxan döletler we olimpik tawarlirini ishlepchiqarghuchi karxanilar bu belgilimige ri'aye qilishini ümid qildi.

Béyjing olimpik yighini 1936 - yili natséstlar gérmaniyide ötküzgen olimpik musabiqisidin kéyin, dunyada eng köp talash - tartish qozghighan olimpik musabiqisi bolup qaldi. Bezi teshkilatlar béyjing olimpik musabiqisini natséstlar gérmaniyiside ötküzülgen olimpik musabiqisigha oxshatmaqta. (Erkin)

Pikirler (0)
Share
Toluq bet