Dunya Uyghur qurultiyi we amérika Uyghur birleshmisi xitay jama'et xewpsizlik ministirliqining mexpiy höjjiti heqqide inkas bildürdi

• Muxbirimiz eqidening bu heqtiki toluq melumati
• Download story audio

Metbu'atlarda xitay da'irilirining, olimpik murasimi mezgilidiki weziyetning bixeterlikige kapalet qilish üchün, chégra sirtida pa'aliyet élip bériwatqan sherqiy türkistanchilargha qaratqan nazaretchilikini alahide kücheytkenliki shuningdek 11 tür buyiche 43 xil obikitni chégra ichi we sirtidiki düshmen küchler dep qarap, olimpiktin qet'iy yiraq tutush toghrisida mexpiy höjjet chüshürgenliki ashkarilandi.

Bu munasiwet bilen dunya Uyghur qurultiyi qatarliq Uyghur teshkilatliri öz inkaslirini bildürdi.

Metbu'atlarda

Xitay jama'et xewpsizlik ministirliqi, herqaysi ölke, aptonom rayon we xitay merkizi hökümitige biwaste qarashliq sheherlerning jama'et xewpsizlik idariliri we nazaretlirige 2008 ‏- yilliq béyjing olimpik yighinigha qatnishidighan xadimlarning arqa körinishini qattiq tekshürüsh heqqide mexpiy uqturush tarqatqan we olimpik jeryanida tekshürüsh obiktini 11 tür buyiche 43 xilgha ayrip turup közitish kéreklikini otturigha qoyghan.

Uqturushta yene, chégra ichi we sirtidiki " sherqiy türkistanchi 3 xil küchler" ge qaritilidighan nazaretchilikni alahide kücheytish lazimliqi alahide tekitlen'gen.

Bu arida amérikida chiqidighan "boshün" tor bétide " béyjing, olimpik tenterbiye murasimigha kapalet qilish üchün, chégra sirtidiki sherqiy türkistan müsteqilchilirige qaratqan nazaretchilikni kücheytti " dégen témida xewer élan qilinip, "xitayning sherqiy türkistanchi üch xil küchler" ge qaritilghan nazaretchilikni alahide kücheytkenliki bolupmu, rabiye qadir, erkin aliptékin qatarliq 9 neper kishini nuqtiliq közitish we nazaret qilishni tekitlen'genliki otturigha qoyulghan.

D u q we amérika Uyghur birleshmisining inkasi

Dunya Uyghur qurultiyining mu'awin re'isi memet toxti ependi xitay jama'et xewpsizlik ministirliqining olimpik heqqidiki mexpiy uqturushi heqqide öz köz qarashlirini otturigha qoydi.

Memet toxti ependi, xitay da'irilirining 2008 ‏- yili olimpik tenheriket yighinining " bixeterliki" bilen " sherqiy türkistan térrorchiliri " arisida aldin "munasiwet qurup", eger olimpik jeryanida birer weqe yüz berse, uning jinayi jawabkarlirini aldin belgilep qoyush taktikisi oynawatqanliqini inkas qildi.

Dunya Uyghur qurultiyi ijra'iye komitétining re'isi we amérika Uyghur birleshmisining bayanatchisi alim séyitof ependimu bu heqte ziyaritimizni qobul qilip öz qarashlirini bildürdi. (Eqide)