2008 - Yilliq béyjing olimpik musabiqisigha qarshi chuqan kücheymekte

• Muxbirimiz ekremning bu heqtiki toluq melumati
• Download story audio

2008 - Yilliq béyjing olimpik musabiqisigha bir yil qalghan bügünki künde, xelq'aradiki hökümetsiz teshkilatlarning béyjingge qarshi chuqanliri barghansiri ewj almaqta.Erkinlik, démokratiye we kishilik hoquq kapaletke ige bolmighan döletning olimpik musabiqisi ötküzüsh salahiyiti bolmaydighanliqini asasi téma qilghan murajetler dunya jama'itining diqqitige ulashmaqta.

D u q "olimpikke qarshi komitéti" qurdi

Xelq`ara olimpik musabiqisining simwoli bolghan besh chemberni béyjing olimpik musabiqisige qarshi shekillerge kirgüzüp, mexsus tor sehipiler échip xitaydiki insan heqliri depsendichilikige qarshi shu'ar towlawatqan teshkilatlarning sani künsiri köpeymekte.

D u q bayanatchisi, "olimpikke qarshi komitéti" ning ezasi dilshat réshit ependi bu teshkilatlar bilen d u q ning mas qedemde ish élip bériwatqanliqini tekitlep ötti.

Béyjing olimpik musabiqisini bayqut qilish meqsidide xelq`ara olimpik tenterbiye musabiqisining simwoli bolghan besh chemberning shekillirini her qaysi hökümetsiz teshkilatlar öz aldigha xas shekillerde layihilep chiqqan bolup, beziliri besh chemberni igilip süyi chiqip ketken yaki köz yashliri tamchiwatqan shekillerde yasighan bolsa, beziliri besh chemberni koyza - kishen sheklige we sirtmaq sheklige kirgüzgen, yene beziliri besh chemberdin qan tepchip turghan shekillerni qollan'ghan bolsa, beziliri ölüm jazasining ijra sheklini qollan'ghan hemde axbarat erkinliki, pikir erkinliki we metbu'at erkinlikige qarshi idiyilirini ipadiligen.

Olimpikke qarshi teshwiqat simwolliri köplep barliqqa kelmekte

Bir biridin obrazliq we qiziqarliq bu simwollarda omumen xitaydiki insan heqliri depsendichilikige qarshi idiye roshen gewdilen'gen. Bularning ichide bolupmu xelq`ara kechürüm teshkilati, xeter astidiki milletlerni qoghdash teshkilati, chigrasiz kishilik hoquq teshkilati, wekaletsiz milletler teshkilati, adalet bolmisa téchliq bolmaydu teshkilati qatarliq dangliq teshkilatlarning belgiliri alahide diqqet chékidu.

Bezi teshkilatlar Uyghurlarghila xas boluwatqan hashargha oxshash mejburi emgek zulumlirini ekis ettürüsh arqiliq, Uyghurlargha bolghan hésdashliqini we béyjing hökümitige qarshi iradisini ipadiligen. Bu teshkilatlarning hemmisi d u q bilen zich ish birliki élip barmaqta.

Xitay démokratliri we falünggongchilarning qarshiliq layihilirimu diqqetni tartidu. Ejeplinerliki, tibet herikiti teshkilati xitayning olimpik ötküzishige qarshi meydanini ipadilep alahide layihe ishligen bolsimu, tibet sergerdan hökümiti del eksiche béyjing olimpik musabiqisini qollap usul oynawatqan shekilde layihe ishligen.

D u q ning 2008- yilliq béyjing olimpik musabiqisige qarshi lahiyisi

D u q ning 2008- yilliq béyjing olimpik musabiqisige qarshi layihisi téximu heyran qalarliq bolghan. D u q xelq`ara olimpik musabiqisining simwoli bolghan besh chemberning ichini xitay zulumigha a'it her xil mezmunlar bilen toldurghan bolup, Uyghur millitining nöwettiki dert - hesretlirini janliq gewdilendürüp bergen. Bir qanche kün ilgiri d u q ning miyunxéndiki bash shitabida ötküzülgen qurultay rehberlirining mexsus yighinida, d u q ning béyjing olimpik musabiqisigha qarshi logo(simwolluq belge)si qarardin ötüp maqullan'ghan.

D u q ning qararigha asaslan'ghanda, olimpikning simwoli bolghan besh chemberning özara késishken halqiliri zulumning belgisi süpitide zenjirdin yasalghan. Besh chemberning ichige xitayning diniy zulumi, pilanliq tughut qirghinchiliqi, hashar we Uyghur qizlirining ichkiri xitaygha qulluqqa tutuliwatqanliqi, seleptek bésip kéliwatqan xitay aqqunliri, til, medeniyet, ma'arip, axbarat, metbu'at we pikir erkinlikining boghuliwatqanliqi, ölüm jazasi we heqsiz tutqun qilish qatarliq köpligen mezmunlar kirgüzülgen. Bu layiheni pütküzüsh xizmiti meshhur bir ressamgha tapshurulghan.

D u q rehberlirining bergen melumatlirigha asaslan'ghanda, xitay hökümiti d u q teripidin qurulghan "olimpikke qarshi komitét"ning herikitige jiddiy diqqet - étibarini aghdurghan bolup, xitay jasusliri bu komitétning xizmet pilani we pa'aliyet lahiyilirini qolgha chüshürüsh üchün heriket qilmaqta iken. (Ekrem)