Бейҗиң олимпик тәнһәрикәт йиғини һәққидики муназириләр күчәймәктә (1)


2007-08-14
Share

Хитай һөкүмитиниң 8‏- авғуст күни бейҗиңда 2008‏- йиллиқ бейҗиң олимпик тәнһәрикәт йиғиниға бир йил қалғанлиқини тәнтәнилик мурасимлар билән қарши елиши билән бирликтә, узундин бери 2008‏- йиллиқ олимпик тәнһәрикәт йиғиниға саһипханлиқ қилиш һоқуқиниң бейҗиңға берилгәнликиниң тоғра бир қарар болуп- болмиғанлиқи һәққидә елип бериливатқан муназириләр техиму күчийишкә башлиди.

Хәлқара җамаәт, 2008‏- йиллиқ олимпик бейҗиңға хата берилгән дәп қаримақта

Хәлқара кишилик һоқуқ тәшкилатлири, нурғунлиған мәтбуат, сиясийонлар вә демократийә паалийәтчилири, хитайниң кишилик һоқуқ хатирисиниң начарлиқи, хитай һөкүмитиниң уйғур ели вә тибәттә елип бериватқан бастуруш сиясити шундақла дарфурдики қирғинчилиқниң баш пиланлиғучиси болған судан һөкүмитини қоллаватқанлиқи түпәйли, 2008‏- йиллиқ олимпик тәнһәрикәт йиғиниға саһипханлиқ қилиш һоқуқиниң бейҗиңға берилгәнликини хата бир қарар дәп көрсәтмәктә.

Уларниң ейтишичә, 2008‏-йиллиқ олимпик тәнһәрикәт йиғининиң бейҗиңда өткүзүлүши, коммунист хитай һөкүмитигә тепилмас бир тәшвиқат пурсити яритип бериду һәмдә уни кишилик һоқуқни дәпсәндә қилиш мәсилсидә техиму җасарәтләндүриши мумкин.

11‏-Авғуст күни исраилийиниң й нит хәвәр тор бетидә елан қилинған бир мақалидә, 2008‏-йиллиқ бейҗиң олимпик тәнһәрикәт йиғини, 1936‏- йили фашист германийиниң пайтәхти берлинда өткүзүлгән олимпик тәнһәрикәт йиғини билән селиштурулған.

Гелад натһан тәрипидин елан қилинған мақалидә мундақ дейилгән" вәймәр җумһурийитиниң ахирқи күнлиридә 1936‏- йиллиқ олимпик тәнһәрикәт йиғининиң саһипханлиқ һоқуқи берлин шәһиригә берилди. Вәймәр җумһурийитиниң гумран болуши билән германийидә фашистлар һакимийәт бешиға чиқти. Гитлерниң һакимийәт бешиға келиши, олимпик тәнһәрикәт йиғининиң берлинда өткүзүлүши тоғрисида бәзи муназириләр қозғиған болсиму, лекин һечқандақ бир дөләт уни байқут қилишини халимиди."

"72 Йил өткәндин кейин, дуня 1936 - йилидики хаталиқни йәнә өткүзүватиду"

Гитлер һөкүмитиниң 1936‏- йиллиқ олимпик тәнһәрикәт йиғинидин өзиниң қудрити намаян қилиш үчүн чоң бир тәшвиқат қорали сүптидә пайдиланғанлиқини тәкитлигән гелад натһан мақалисини давамлаштуруп мундақ дәйду ": олимпик тәнһәрикәт йиғини фашист германийигә охшаш диктатор бир дөләттә өткүзүш хаталиқидин 72 йил өткәндин кейин, дуня олимпик тәнһәрикәт йиғинини өткүзүш шәрипини йәнә бир диктаторлуққа йәни хитайға бериватиду."

Мақалисидә, гәрчә әркин базар иқтсадий системисини йолға қойған болсиму, хитайниң һелиму дөләтни сталин һакимийитиниң башқуруш усуллири билән башқуруватқанлиқини тәкитлигән гелад натһан мундақ дәйду ": хитай очуқ-ашкара өз пуқралириниң кишилик һоқуқ вә җәмийәт һоқуқини дәпсәндә қиливатқан бир дөләт болуп, дуня базарлириға наһайити төвән иш һәққи билән ишлитиливатқан ишчилар тәрипидин ишләп чиқирилған әрзан вә сүпти төвән таварларни експорт қиливатиду һәмдә иқтисадий тәрәққиятини давамлаштуруш үчүн һава, су вә йәрни кәк-чегрисиз булғаватиду. Хитай шундақла дуняда өлүм җазаси әң көп иҗра қилиниватқан дөләт болуп, хитай даирилири һеч әймәнмәй өлүм һөкүми иҗра қилинған кишиләрниң ич органлирини сатмақта.

Мақалисидә, хитайдики мәвҗут һакимийәтниң диктаторлуқ вә капитализимдин тәшкил тапқанлиқини тәкитлигән аптур, әмди хитай һөкүмити гитлергә охшаш олимпик тәнһәрикәт йиғинидин пайдилинип өз күч вә қудритини дуняға көрситишкә тәйярланмақта, дегән. (Өмәр қанат)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт