Америкилиқ тәнһәрикәтчиләр олимпикта хитайниң тамиқини йемәйду


2008.02.12

Америка олимпик комитети 2 йилдин бери хитайда йемәклик тәкшүрүши елип барди. Тәкшүрүш җәрянида йемәкликниң тазилиқи, саплиқи вә озуқлуқ қиммитини тәкшүрди. Тәкшүрүш нәтиҗисидә,хитайниң йемәкликлиридә тазилиқ йетәрсизлики, зәһәрлик химийивий маддиларниң тәсири еғир дәриҗидә байқалған.

Буниң билән америка олимпик комитети америкилиқ тәнһәрикәтчиләрниң йемәкликини америкидин елип беришни бекитти. Бу орунлаштуруш буйичә, америкиниң коллег вә тайсон йемәклик ширкити, олимпик башлиништин 10 күн бурун йетәрлик миқдарда гөш вә тухум йөткәп апириду, америкилиқ тәнһәрикәтчиләр 3 вақ тамиқини америка ашханисидин йәйду.

Әслидә хитай һөкүмитиму, олимпик тәнһәрикәтчилириниң тамақ мәсилисини һәл қилиш үчүн көп тиришчанлиқ көрсәткән. Нюйорк вақти гезитиниң 2007 ‏- йили 5 ‏- сентәбир хәвәр қилишичә, хитай һөкүмити йемәклик сүпитини хәлқара өлчәмгә йәткүзүш үчүн, мәхсус, олимпик көктат етизи вә олимпик чошқа қотини бәрпа қилған.

Олимпик көктат етизидики көктатларға химийивий оғут қолланмаслиқ, һашарәт өлтүрүш дориси қолланмаслиқ, чошқиларниму органик озуқлуқлар билән беқиш, йешил отлар билән тәминләш, һәр күни 2 саәт сиртни айландуруп, чошқиларни тәнһәрикәт қилдуруш қатарлиқ йеңи түзүмләрни бекиткән. Әмма хитайниң олимпик үчүн мәхсус чошқа беқиш чариси чәтәлләрдики хитай демокиратчилириниң наразилиқини қозғиған. Хитайниң өктичилириниң қаришичә, хитай нөвәттә мәйли һава - килимат җәһәттин болсун, мәйли йемәк ичмәк җәһәттин болсун, мәйли мәдәний ‏-маарип җәһәттин болсун, олимпиккә саһипханлиқ қилиш лаяқитигә игә әмәс. Хитайниң дөләт мәблиғиғә тайинип туруп селиватқан тәнһәрикәт қурулушлири, хитай җәмийитиниң тәбиий тәрәққиятиниң мәсули әмәс, у пәқәт хәлқниң қан-тәри, йиға -зариси бәдилигә пүтүп чиққан қурулуш; чүнки нөвәттә хитай хәлқиниң кәчүрүватқан күни олимпик чошқисиниң турмушидин начар.

Хитай бу нөвәт, өзлириниң йемәк‏-ичмәк җәһәттики тәйярлиқлириғиму көп ишәнгән. Америка авази радиосиниң мухбири өткән йил 14 ‏-ноябир күни хитай даирилирини зиярәт қилғанда, хитай даирилири йемәклик мәсилисидә алаһидә тәйярлиқ қилғанлиқини, мәхсус олимпик коктатлиқи,вә мәхсус олимпик чошқиси беқиватқанлиқини билдүргән вә чәтәллик тәнһәрикәтчилириниң сирттин йемәклик әкилишигә һаҗәт йоқлуқини билдүргән. Әмма нюйорк вақти гезитиниң бу йил 12 ‏-феврал хәвиридин мәлум болушичә, америкилиқ тәнһәркәтчиләрниң хитайдин тамақ йемәслик қарари, чәтәллик тәнһәрикәтчиләр үчүн бир башланғуч һәркәт болуп, башқа чәтәллик тәнһәркәтчиләрниңму хитай тамиқини йимәслики еһтималға йеқин.

Америка олимпик комитетиниң мәсуллиридин хамилтон ханимниң билдүришичә, у бу йил 7 ‏-айда, бейҗиңға бариду, у бейҗиң университетидики америка олимпик чениқиш мәркизидики ашханини тәртипкә салиду, униң пилани бойичә, мәвҗут ашханиниң бир нәпәр ярдәмчи ашпизидин башқа барлиқ хизмәтчилири йәңгишлиниду, ашханидики қазан-чүмучтин тартип барлиқ сайманлар америкиниңкигә алмаштурилиду. Бүгүнгә қәдәр америка тәнһәрикәтчилири олимпикта америка йемәкликлирини қошумчә қилған болсиму, үч тамиқини өзидин йейиш йолини таллимиған. Бу сәвәптин чәтәлдики хитай өктичилири, бу вәзийәтни хитай миллити йолуққан бир һақарәт дәп қарашмақта вә буниң җавапкарлиқини хитай коммунист һакимийитигә йүклимәктә.

Америка олимпик комитетиниң билдүришичә, улар, гөш, ун, көктат қатарлиқ асаслиқ йемәклик хам материяллирини америкидин апарғандин башқа, деңиз мәһсулатлирини японийидин әкилиду, мевә-чивини австралийидин әкилиду. Америка тәнһәрикәтчилири хитайниң һичқандақ йемәк-ичмикигә еғиз тәгмәйду. (Шөһрәт һошур)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.