Amérikiliq tenheriketchiler olimpikta xitayning tamiqini yémeydu


2008-02-12
Share

Amérika olimpik komitéti 2 yildin béri xitayda yémeklik tekshürüshi élip bardi. Tekshürüsh jeryanida yémeklikning taziliqi, sapliqi we ozuqluq qimmitini tekshürdi. Tekshürüsh netijiside,xitayning yémeklikliride taziliq yétersizliki, zeherlik ximiyiwiy maddilarning tesiri éghir derijide bayqalghan.

Buning bilen amérika olimpik komitéti amérikiliq tenheriketchilerning yémeklikini amérikidin élip bérishni békitti. Bu orunlashturush buyiche, amérikining kollég we tayson yémeklik shirkiti, olimpik bashlinishtin 10 kün burun yéterlik miqdarda gösh we tuxum yötkep apiridu, amérikiliq tenheriketchiler 3 waq tamiqini amérika ashxanisidin yeydu.

Eslide xitay hökümitimu, olimpik tenheriketchilirining tamaq mesilisini hel qilish üchün köp tirishchanliq körsetken. Nyuyork waqti gézitining 2007 ‏- yili 5 ‏- séntebir xewer qilishiche, xitay hökümiti yémeklik süpitini xelq'ara ölchemge yetküzüsh üchün, mexsus, olimpik köktat étizi we olimpik choshqa qotini berpa qilghan.

Olimpik köktat étizidiki köktatlargha ximiyiwiy oghut qollanmasliq, hasharet öltürüsh dorisi qollanmasliq, choshqilarnimu organik ozuqluqlar bilen béqish, yéshil otlar bilen teminlesh, her küni 2 sa'et sirtni aylandurup, choshqilarni tenheriket qildurush qatarliq yéngi tüzümlerni békitken. Emma xitayning olimpik üchün mexsus choshqa béqish charisi chet'ellerdiki xitay démokiratchilirining naraziliqini qozghighan. Xitayning öktichilirining qarishiche, xitay nöwette meyli hawa - kilimat jehettin bolsun, meyli yémek ichmek jehettin bolsun, meyli medeniy ‏-ma'arip jehettin bolsun, olimpikke sahipxanliq qilish layaqitige ige emes. Xitayning dölet meblighighe tayinip turup séliwatqan tenheriket qurulushliri, xitay jemiyitining tebi'iy tereqqiyatining mes'uli emes, u peqet xelqning qan-teri, yigha -zarisi bedilige pütüp chiqqan qurulush؛ chünki nöwette xitay xelqining kechürüwatqan küni olimpik choshqisining turmushidin nachar.

Xitay bu nöwet, özlirining yémek‏-ichmek jehettiki teyyarliqlirighimu köp ishen'gen. Amérika awazi radi'osining muxbiri ötken yil 14 ‏-noyabir küni xitay da'irilirini ziyaret qilghanda, xitay da'iriliri yémeklik mesiliside alahide teyyarliq qilghanliqini, mexsus olimpik koktatliqi,we mexsus olimpik choshqisi béqiwatqanliqini bildürgen we chet'ellik tenheriketchilirining sirttin yémeklik ekilishige hajet yoqluqini bildürgen. Emma nyuyork waqti gézitining bu yil 12 ‏-féwral xewiridin melum bolushiche, amérikiliq tenherketchilerning xitaydin tamaq yémeslik qarari, chet'ellik tenheriketchiler üchün bir bashlan'ghuch herket bolup, bashqa chet'ellik tenherketchilerningmu xitay tamiqini yimesliki éhtimalgha yéqin.

Amérika olimpik komitétining mes'ulliridin xamilton xanimning bildürishiche, u bu yil 7 ‏-ayda, béyjinggha baridu, u béyjing uniwérsitétidiki amérika olimpik chéniqish merkizidiki ashxanini tertipke salidu, uning pilani boyiche, mewjut ashxanining bir neper yardemchi ashpizidin bashqa barliq xizmetchiliri yenggishlinidu, ashxanidiki qazan-chümuchtin tartip barliq saymanlar amérikiningkige almashturilidu. Bügün'ge qeder amérika tenheriketchiliri olimpikta amérika yémekliklirini qoshumche qilghan bolsimu, üch tamiqini özidin yéyish yolini tallimighan. Bu seweptin chet'eldiki xitay öktichiliri, bu weziyetni xitay milliti yoluqqan bir haqaret dep qarashmaqta we buning jawapkarliqini xitay kommunist hakimiyitige yüklimekte.

Amérika olimpik komitétining bildürishiche, ular, gösh, un, köktat qatarliq asasliq yémeklik xam matériyallirini amérikidin aparghandin bashqa, déngiz mehsulatlirini yaponiyidin ekilidu, méwe-chiwini awstraliyidin ekilidu. Amérika tenheriketchiliri xitayning hichqandaq yémek-ichmikige éghiz tegmeydu. (Shöhret hoshur)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet