Бирләшкән дөләтләр тәшкилати омумий йиғинида өлүм җазасини әмәлдин қалдуруш һәққидики тәклип мақулланди

Бирләшкән дөләтләр тәшкилати омумий йиғинида, өлүм җазасини әмәлдин қалдуруш һәққидә оттуриға қоюлған тәклип бәзи дөләтләрниң қаршилиқиға учриған болсиму, йәнила көп санлиқниң қоллишиға еришти.

Бирләшмә агентлиқиниң баян қилишичә, бирләшкән дөләтләр тәшкилатиниң 12 ‏- айниң 18 ‏- күнидики омум йиғинида өлүм җазасини әмәлдин яки қалдурмаслиқ һәққидә аваз қойғанда, 192 әза дөләтниң 104 ниң қоллиши, 54 ниң қарши туруши, 29 ниң һоқуқидин ваз кечиши билән, өлүм җазасини әмәлдин қалдуруш һәққидики бу тәклип ахир мақуллуқтин өтти.

Хәвәрдә баян қилинишичә, өткән йилида пүтүн дуня бойичә 5628 адәмгә өлүм җазаси берилгән болуп, буниң 5000 и хитайда, қалған 600 нәччә адәмниң көпинчиси коммунист дөләтлиридә иҗра қилинған.

Хәвәрдә баян қилинишичә, б д т ниң түнүгүнки омумий йиғинида, баш катип бан кимун һәммә дөләтни бу қарарға әһмийәт беришкә, пүтүн дуняда өлүм җазасини бикар қилишниң биринчи қәдимини бесишқа чақирғанда, мисир, малайшия, бенгал, сүрийә қатарлиқ ислам дөләтлири һәр бир дөләтниң игилик һоқуқиға дәхли - тәриз қилинмаслиқини тәкитлиди. Хитайниң вәкили болса, бу мәсилиниң һәрбир дөләтниң қануниға берип тақилидиған мәсилә икәнликини, бу һәқтә һәрбир дөләт сирттин арилишиш йүз бәрмигән әһвал астида өзи қарар чиқириши лазимлиқини тәкитлиди. (Вәли)